¹ Ako' koo, Yesus natapotn tujuh puluh urokng panuno nang laine, lalu Io nyuruh be'ido' ampus baduo-duo nyingkadohoi' Io kasatiap koto ba tampat nang Io ampusio'. ² Ja kata-E ka ne'ido', "Asel anyian memang manyak sidi, tapi pakarajaane kahe ado sadikit. Karamo koo, minto'lah ka Ampu' nang bahanyi koo biar ngutus pakarajo- pakarajo sa' ngumpulan asel anyian-E koo." ³ "Ampuslah!Aku ngutus kau angayo anak domba katangoh-tangoh kumpulan sarigalo. ⁴ Ame nabanan tampat duit,tas, atopun sandal. Lalu ame ngatai' sapepun doopm pajaanan. ⁵ Ka rumoh mae pun nang kau namai', katootnlah doho', 'Damai sajohtaro atas rumoh nyian.' ⁶ Kalo' urokng nang ado di koo cinta damai, damai sajohtarongu koo pasti diopm dikoo, tapi kalo ino, damai sajohtarongu koo pasti muokng ka kau agi'. ⁷ Diopmlah ka rumoh koo. makotnlah ba nyocoklah dameo nang ne'ido' sadiootn ka kau, karamo seko' urokng pakarajo pantasnamu upahe. Ame ba pindoh-pindoh ampat ka rumoh nang sege' ka rumoh nang lain agi'. ⁸ Satiap kai kau taamo' ka sabuoh koto lalu urokng-urokng di naun nyambut kau, tajarlah makanan nang ne'ido' nyadiootn ka adapatn ngu. ⁹ Samuhotn urokng-urokng nang rongko' nang diopm ka naun, lalu katootn ka ne'ido', 'Karajaan Allah dah samak ka kau.' ¹⁰ Tapi, kalo' kau taamo' kasabuoh kampokng lalu urokng-urikng kana'un bai' narimo' kau, ampuslah ka marago-marago koto koo lalu ba kato, ¹¹ 'Sakaipun dabu ampat ka koto ngu nyian nang ngarebet ka poho kami pasti kami kibasotn ka adapotn ngu. ingatotnlah nyian: Karajaan Allah dah samak.' ¹² Aku bakato ka kau: pado ari koo, tanggongan sodom pasti labih rehetn daripado tanggongan koto koo." PARINGATOTN BAGI NANG NOLAK YESUS ¹³ Cilakolah kau, Khorazim! cilakolah kau, Betsaida! Misale Aku ngarajaan mukjizat-mukjizat nang sabayo ka Tirus ba Sidon, jadi ne'ido' pasti dah lamo batobat sambil duduk make saput kabung ba abu. ¹⁴ Tapi, pado waktu pangakiman, tanggongan Tirus ba Sidon labih rehetn daripado tanggonganngu. ¹⁵ Lalu kau, Kapernaum, mungkin ge kau diangkat ka sarugo? Ino', kau pasti ditabakotn ka dunio urokng mati! ¹⁶ Sapepun nang nangarotn kau, nangarotn Aku. Tapi, sape nang mai'an kau, io ugo' mai'an Aku. Lalu, sape nang mai'an Aku, io mai'an Io nang ngutus Aku." SETAN-SETAN TUNDUK KA PANUNO' YESUS ¹⁷ Ako' koo katujuh puluh panuno' koo puokng ba sukocita sambil bakato, "Tuhan, setan-setan pun tunduk ka kami doopm dama-Ngu." ¹⁸ Yesus bakato ka ne'ido', "Aku nanang Ibilis janto' ampat ka angit angayo kilat. ¹⁹ Tahui'lah bahawo Aku dah mare' kau kuaso sa' ninyak uar ba kalo, ugo' kuaso atas sagalo kakoatotn musuh. pasti ino' ado nang nyakiti' kau. ²⁰ Tapi, amelah kau basukocita karamo roh-roh koo tunduk ka kau, malainkan basukocitalah karamo damangu tatulis ka sarugo." YESUS BADO'A KA BAPO' ²¹ Pado waktu koo, basukocitalah Yesus kadoopm Roh Kudus lalu ba kato, "Aky basyukur ka Kau Bapo', Tuhan atas angit ba dunio, sabab Kau napukotn hal-hal nyian ka urokng nang bijaksano ba pintar.Tapi, Kaunojokotn io ka kamudo'-kamudo'. Oh Bapo', karamo koolah nang baik ka adapatn- Ngu. ²² Bapo'-Ku dah nyarohotn sagalo sasuatue ka Aku lalu ino' seko' urokng pun nang kanal Anak kacuali Bapo'.Lalu, ino' seko' urokng pun nang kanal Bapo' kacuali Anak ba urokng-urokng nang ka ne'ido' Anak ba kahandak sa' nyatootn io." ²³ Ako' koo, Yesus mamaik ka murid-murid-E ngalakar ka ne'ido' sacaro diam-diam, "Repolah mato nang nanang dameo nang kau tanang, ²⁴ sabab Aku bakato ka kau: manyak nabi ba rajo nang mao sidi nanango hal-hal nang kau nanang kanio', tapi ne'ido ino' biso nanang io. Lalu, mao' sidi nangari' hal-hal nang kau nangar kanio', tapi ne'ido' ino' biso nangar io." UROKNG SAMARIA NANG BABALAS KASIH ²⁵ Ako'koo, seko' urokng ahli Hukum Taurat badiri mao' nyoboo' Yesus, ja katae, "Guru, dameo nang arus aku karajaan supayo namu idup nang kakal?" ²⁶ Yesus nyahuti' io, "Dameo nang tatulis doopm Hukum Taurat? Dameo nang kau baco kadoopme?" ²⁷ Urokng koo, nyahuti', "Kasihi'lah Tuhan, Allahngu,ba saganap atingu, ba saganap jiwangu, ba saganap kakoatatnngu, lalh ba saganap akal budingu. Lalu, kasihi'lah sabayangu manusio angaho kau ngasihi' diri'ngu sorokng." ²⁸ Yesus bakato ka io, "sahutatngu koo tapat. Karajaanlah koo, jadi kau pasti idup." ²⁹ Tapi, urokng koo mao' mabanaro' diri'e, jadi io bakato ka Yesus, "Lalu sape ge sabayaku manusio?" ³⁰ Yesus nyahuti' io sambil bakato, "Ado seko' urokng nang turutn ampat ka Yerusalem ka Yerikho, io janto ka kokot paro parampok nang ngarampas pakeane sambil mangkongi' io, ako' koo io ningootn gadokng-gadokng doopm kaadaan ampir mati. ³¹ Kabatolan, seko' urokng imam ngaintas ka marago koo. Pas io nanang urokng koo, io ampus jakoo ihan bajootn ka sisi marago nang lain. ³² Jakoo ugo' karajaan seko' urokng Lewi, pas atokng ka tampat koo sambil nanang urokng koo, io ngaintasi' sambil bajoot ka marago nang lain. ³³ Tapi, ado urokng Samaria nang tangoh bajootn ngaintas dikoo. Lalu, pas io nanang urokng koo, io maraso kasih ka io. ³⁴ Lalu, urokng Samaria koo nyeketi' io, lalu mabat uko'-uko' e. Io meesi' ba minyak ngan anggor, lalu io naikotn urokng koo ka atas keledai-e lalu io nabanan ka sabuoh panginapon, lalu io ngarawat urokng koo. ³⁵ Ampagie, urokng Samaria koo ngauarotn duit 2 dinar lalu mareotn ka panjago panginapotn koo sambil bakato, 'Rawatlah urokng nang uko' nyian. Lalu, sangape pun ongkose pasti aku ganti nunggu aku atokng agi'."' ³⁶ Lalu, Yesus bakato, "Manurut kau, sape ge diantaro urokng batalu koo nang nang manjaji sabayo manusio ampat ka urokng nang janto' ka kokot paro parampok koo ?" ³⁷ Sahut ahli Taurat koo, "Urokng nang dah muktiotn balas kasihotn ka io." lalu, jare Yesus, "Ampuslah, karajaan hal nang sabayo." MARIA BA MARTA ³⁸ Waktu Yesus ba murid-murid-E doopm pajaanan, Yesus taamo' ka sabuoh kampokng lalu seko' ambini badamo Marta nyambut Yesus karumahe. ³⁹ Marta ado ba adi' ambini badamo Maria nang dudukka seket poho Yesus lalu nangrotn pangajaran Yesus. ⁴⁰ Tapi, Marta sibuk gio' ngarajaan samuo pakarajaan nang arus abis. Marta pun nyeketi' Yesus sambil bakato, "Tuhan, ino' paduli ge Kau bahawo adi' ku ambini miarotn aku ngarajaan pakarajaan nyian ku sorokng? Suruhlah io nuukngi' aku!" ⁴¹ Tapi, Tuhan nyahuti',"Marta, Marta, kalut ba musingan diri' ba manyak hal. ⁴² Kahe sete' hal nang panting. Maria dah milih bagiotn nang labih baik, lalu bagiatne koo pasti ino' suoh diicokng ampat ka io."