¹ Sekareng, beraq epuq kuriw, sekorekng imam kepala dan abetn tuhaq-tuhaq bangsa iro alaq keputusan bersama mengenai Yesus kalaq ngukupm mate Uhaq. ² Dan, ulutn ngiket Yesus, lalu oit dan nyerah-Uhaq la Gubernur Pilatus. Yudas Mentiu (Kis.1:18-19) ³ Beraq Yudas, yaq nyerah Yesus, kitaq amen Yesus penelotu ukupman, uhaq rasa neser dan peloli 30 kepeng pirak la imam-imam kepala dan abetn tuhaq-tuhaq, ⁴ Tokai uhaq, “Aap epuq bedosa kerna nyerah daya ulutn yaq aweq salaq.” Akan tetapiq, ulutn nokai, “Oon urusanyaq ampetn kaiq? Iro urusanko!” ⁵ Dan, Yudas nempalekng kepeng-kepeng pirek iro la sua Bait Allah dan molak yaq. Lalu, uhaq engko dan ngontekng diriq uhaq. ⁶ Akan tetapiq,  imam-imam kepala alaq kepeng-kepeng perak iro dan nokai, “Beaw kenedewaq kalaq nyimpetn yaq sua perbendaharaan kerna ohoq adalah regaq daya.” ⁷ Makaq, ulutn alaq keputusan ramaq dan ampetn sen iro, ulutn moliq tanaa tukeng kualiq kalaq ongoq lubekng kalaq ulutn-ulutn asing. ⁸ Irolah sebebyaq, tanaa iro tenokai  ‘Tanaa Daya’ sampei olo ohoq. ⁹ Ampetn keliro, geneplah oon yaq tenokai Nabi Yeremia: “Lipes iro, ulutn alaq 30 kepeng pirek. Irolah regaq kalaq diriq-Uhaq yaq epuq tenaser oleh ulutn-ulutn Israel. ¹⁰ Ulutn pegunaqyaq kalaq moliq tanaa tukeng kualiq, kiaq yaq epuq penerentah Tuhan la aap.” Yesus Ampetn Gubernur Pilatus (Mrk.15:2-5; Luk.23:3-5; Yoh.18:33-38) ¹¹ Sekareng, Yesus jakat mo telamaq Gubernur dan Gubernur penik la-Uhaq, “Meqkah Ko Raja ulutn Yahudi?” Jawab Yesus, “Yaq, kiaq yaq tenokai ko.” ¹² Akan tetapiq, beraq uhaq tenuduh oleh imam-imam kepala dan abetn tuhaq-tuhaq, Uhaq beaw ngejawab oon pun. ¹³ Lipes iro, Pilatus nokai la-Uhaq, “Meqkah Ko beaw dingaq betapa deoqyaq ulutn nuduh Ko?” ¹⁴ Namun, Yesus beaw ngejawab Pilatus, bahkan kalaq erai tuduhan pun sehingga Gubernur iro heran jerenih. Pilatus Gagal Ngebebas Yesus (Mrk.15:6-15; Luk.23:13-25; Yoh.18:28-40; Yoh.19:1-16) ¹⁵ Sekareng, pada setiep olo raya, Gubernur biasa yaq ngebebas bagiq senarikng deoq, erai tahanan yaq dakatn oleh ulutn. ¹⁶ Pada watu iro, ulutn Naan erai tahanan yaq terkenal, yaq tenokai Barabas. ¹⁷ Jadiq, beraq ulutn bekumpur, Pilatus penik ka ulutn, “Enceq yaq dakatn ka kalaq  kenebebas aap, Barabas atau Yesus, yaq tenokai Kristus?” ¹⁸ Sebeb, Pilatus tauq amen kerna iri, ulutn epuq nyerah Yesus la uhaq. ¹⁹ Beraq Pilatus sedeng tuet mo kursi pengadilan, sawaqyaq kirim pesan la uhaq, “Boteq enaq oon pun terhadep Ulutn benar iro. Sebeb, aap epuq menderita deoq hal olo ohoq sua tupiq kerna Uhaq.” ²⁰ Akan tetapiq, imam-imam kepala dan abetn tuhaq-tuhaq meyakinkan senarikng deoq kalaq sake Barabas dan pekate Yesus. ²¹ Gubernur penik la ulutn, “Yaq enceq ete keduaq senarikng iro yaq dakatn ka kalaq aap bebaskan bagiq ka? Dan, ulutn nokai, “Barabas!” ²² Pilatus nokai la ulutn, “Kaleu masem iro, oon yaq harus Aap enaq ampetn Yesus, yaq tenokai Kristus?” Ulutn sekorekng nokai, “Salibkan Uhaq!” ²³ Dan, Pilatus penik, “Oon siotn? Uhaq epuq enaq kejahatan oon?” Akan tetapiq, ulutn ngedodoi lebeh waleq oliq, “Salibkan Uhaq!” ²⁴ Bayaq Pilatus kitaq amen uhaq beaw nyolukng oon pun, malah kerusuhan mulei terjadiq, uhaq alaq danum dan nguhau kami uhaq mo telamaq senarikng deoq iro dan nokai, “Aap beaw salaq atas daya Senarikng ohoq. Iro urusan ka edotn!” ²⁵ Dan, sekorekng ulutn iro ngejawab, “Daya-Uhaq naan atas kaiq dan anak-anak kaiq!” ²⁶ Lipes iro, Pilatus ngebebaskan Barabas bagiq ulutn dan lipes nyambuk Yesus, Pilatus nyerah Uhaq kalaq  senalib. Tentara Pilatus Ngasaq Yesus (Mrk.15:16-20; Yoh.19:1-2) ²⁷ Lipes iro, abetn tentara gubernur oit Yesus la markas tongkotn gubernur dan ngumpur sekorekng pasukan Romawi ngelilikng Uhaq. ²⁸ Ulutn ngodikng pekayetn Yesus dan pekopekng jubah ungu la-Uhaq. ²⁹ Dan, Lipes iro ulutn ngeraraq erai mahkota beduiq, ulutn pekopekng punan utek Yesus, ulutn nyeq erai oyus tolakng la kami sanan-Uhaq, dan sujud mo telamaq-Uhaq, dan ngasaq Uhaq, tokai ulutn, “Salam, Raja ulutn Yahudi!” ³⁰ Ulutn tempus-Uhaq, alaq oliq baloq iro, lalu kempes la utek-Uhaq. ³¹ Lipes ulutn ngasaq Uhaq, ulutn ngelepes jubah ungu iro ete Yesus, dan pekopekng kojaq pekayetn-Uhaq sendiriq, dan oit-Uhaq engko kalaq nyalib-Uhaq. Yesus Senalib (Mrk.15:21-32; Luk.23:26-43; Yoh.19:17-27) ³² Beraq abetn tentara iro losek, ulutn beruku erai kongaq sookng ete Kirene yaq penerenai Simon. Ulutn maksa Simon kalaq ngosot salib Yesus. ³³ Dan, beraq ulutn empeq la erai antai yaq tenaq Golgota, reti yaq “Antai Tengkorak”, ³⁴ ulutn nyeq-Uhaqy anggur kalaq disep yaq penesampur ampetn poruq, dan lipes sirop yaq, Uhaq beaw moyung pisep yaq. ³⁵ Bayaq ulutn nyalib Yesus, ulutn bagiq-bagiq pekayetn-Uhaq mo antara ulutn ampetn bet undi. ³⁶ Lipes iro, ulutn tuet dan ngawes-Uhaq mo aro. ³⁷ Dan, punan mo utek-Uhaq, ulutn paseng tuduhan terhadep-Uhaqy, “OHOQLAH YESUS, RAJA ULUTN YAHUDI.” ³⁸ Pada saat iro, naan duaq kongaq penjahat yaq senalib bebayaq bebayaq ampetn Yesus. Erai bila sanan dan yaq erai mo bila seiq. ³⁹ Dan, ulutn-ulutn yaq lalo menghujat Uhaq samer geleng-geleng utek, ⁴⁰ dan nokai, “Ko yaq antekng petempokng Bait Allah dan ngebangunyaq oliq sua Toluq olo, selametkanlah diriq-Ko sendiriq! Amen Ko Anak Allah, ililah ete salib iro!” ⁴¹ Keliro lei imam-imam kepala, beroh ahli-ahli Taurat, dan abetn tuhaq-tuhaq ngasaq Yesus, tokai ulutn, ⁴² “Uhaq nyelametkan ulutn bali, tetapiq uhaq beaw ngahan nyelametkan Diriq-Uhaq sendiriq. Amen Uhaq adalah Raja Israel, bierlah Uhaq ili ete salib iri sekareng dan takaq akan persaya la-Uhaq. ⁴³ Uhaq persaya la Allah, makaq bierlah Allah nyelametkan-Uhaq sekareng, Amen Allah menghendaki-Yaq. Kerna Uhaq sendiriq nokai, ‘Aap adalah Anak Allah.’” ⁴⁴ Abetn penjahat yaq senalib bebayaq ampetn Uhaq pun ngasaq-Uhaq. Yesus Mate (Mrk.15:33-41; Luk 23:44-49; Yoh.19:28-30) ⁴⁵ Sekareng, ete jam duaq beles, denepm atas sekorekng tana iro, sampei jam toluq. ⁴⁶ Kira-kira, mo jam toluq, Yesus berseru ampetn ongau waleq, tokai-Ugaq, “Eli, Eli, lama sabakhtani?” yaq retiyaq, “Allah-Ku, Allah-Ku, kelemeq Ko molak Aap?” ⁴⁷ Dan, beberapa ete ulutn yaq jakat mo aro, beraq ulutn dingaq iro, ulutn biongau, “Uhaq ohoq sedeng nogeq Elia.” ⁴⁸ Tiba-tiba, erai ete ulutn tekoruq, dan alaq bunga karang, pekisoq yaq ampetn anggur mencepm, dan ngiket yaq mo erai tolakng, dan nyeqyaq la Yesus kalaq benisep. ⁴⁹ Akan tetapiq, yaq baliyaq nokai, “Ayoq takaq neaw, meq Elia akan empeq kalaq nyelametkan-Uhaq.” ⁵⁰ Dan, Yesus berseru sinai oliq ampetn ongau waleq dan nyerah Roh-Uhaq. ⁵¹ Dan, perhatikan, tirai sua Bait Allah jabas jadiq duaq bagian, ete mo sampei la iwaq, dan bumi beguncang, dan batuq-batuq mempokak. ⁵² Lubekng-lubekng mempuke, dan deoq unuk ulutn-ulutn suci yaq epuq mate dibangkitkan. ⁵³ Dan, lipes  losek ete lubekng-lubekngyaq, lipes kebangkitan Yesus, ulutn sua la kota suci dan petenteq diriq la senarikng deoq. ⁵⁴ Sekareng, kepala pasukan, dan ulutn yaq beroh ampetn uhaq ngawas Yesus, beraq ulutn kitaq gempa bumi dan sekorekng hal yaq terjadiq iro, jadiq takut jerenih dan biongau, “Benar, Uhaq adalah Anak Allah!” ⁵⁵ Mo aro, naan deoq bawe yaq kitaq ete oroq, yaq nyang Yesus ete Galilea kalaq melayani Uhaq. ⁵⁶ Mo antara ulutn naan Maria Magdalena, Maria tinen Yakobus dan Yusuf, serta tinen ete anak-anak Zebedeus. Yesus Genelubekng (Mrk.15:42-47; Luk.23:50-56; Yoh. 19:38-42) ⁵⁷ Beraq olo mulei malepm, empetlah erai senarikng yaq kaya ete Arimatea tenaq Yusuf, yaq epuq lei jadiq murid Yesus. ⁵⁸ Uhaq engko la Pilatus dan sake unuk Yesus. Lalu, Pilatus merentah nadeq unuk Yesus denyeq la Yusuf. ⁵⁹ Dan, Yusuf alaq unuk Yesus, dan mungkutn-Uhaq opekng robet linen yaq berseh, ⁶⁰ dan pelokuk-Uhaq sua lubekng  yaq bayuq, uputn uhaq sendiriq yaq epuq genaliq mo saikng batuq. Lalu, Yusuf ngulikng erai buti batuq solai la ungaw lubekng iro dan uli. ⁶¹ Dan, mo aro, naan Maria Magdalena dan Maria yaq bali sedeng tuet mo telamaq lubekng iro. Lubekng Yesus Kenejaga ⁶² Mo olo berikutyaq, yaq iro olo lipes persiapan kalaq Sabat, imam-imam kepala dan ulutn-ulutn Farisi genumpur mo telamaq Pilatus. ⁶³ Ulutn biongau, “Tuen, kaiq umpiq amen beraq uhaq peretaq iro maseh bolupm, Uhaq pernah biongau, ‘Lipes toluq olo, Aap akan bangkit oliq.’ ⁶⁴ Kerna iro, perentahkanlah nadeq lubekng iro kenejaga sampei olo yaq ketoluq, kaleu-kaleu murid-murid-Uhaq mungkin empet dan dako-Uhaq, dan biongau la senarikng deoq, ‘Uhaq epuq bangkit ete antara ulutn mate.’ Dan, penipuan yaq terakhir ohoq akan lebeh buruk etepadaq yaq pertama.” ⁶⁵ Pilatus biongau la ulutn, “Ka naan penjaga. Engko, jagalah sebagaimana yaq ka tauq.” ⁶⁶ Lalu, ulutn engko dan ngamankan lubekng iro beroh ampetn regu penjaga, serta nyegel batuq penutup lubekng.