¹ Yesus losek ete Bait Allah dan manan.  Para murid-Uhaq empet lalu petunuq bangunan-bangunan Bait Allah la-Uhaq. ² Dan, Uhaq penik la ulutn, “Beawkah ka kitaq sekorekng hal ohoq? Aap nokai yaq sebeneryaq la ka amen beaw naan erai pun batuq mo  ohoq akan benier naan mo punan batuq yaq bali, yaq beaw akan generuntuh.” Awel Penderitaan ³ Dan, beraq Yesus tuet mo punan saikng Zaitun, murid-murid empet la-Uhaq secara edotn dan biongau, “Nokailah la kaiq, kapan hal-hal ohoq akan jadiq dan oonkah yaq akan jadiq tanaaq ko empet dan ahir zamen ohoq?” ⁴ Yesus ngejawab ulutn, “Perhatikanlah nadeq boteq naan ulutn yaq menyesatkan ka. ⁵ Sebeb, deoq yaq akan empet sua nai-Aap dan nokai, ‘Aap adalah Kristus,’ dan ulutn akan menyesatkan senarikng deoq. ⁶ Ka akan dingaq peperangan dan kaber-kaber tentang perang. Perhatikanlah nadeq ka beaw takut kerna hal-hal ohoq harus jadiq, tetapiq ohoq male kesudahanyaq. ⁷ Sebeb, bangsa akan uwat ngelawetn bangsa, dan kerajaan akan ngelawetn kerajaan, dan mo berbagei ongok akan naan senur dan gempa bumi. ⁸ Sekorekng hal ohoq adalah awel ete penderitaan meraraq melahirkan. ⁹ Lipes iro, ulutn akan nyerahkan ka la penganiayaan, dan akan munu ka, dan ka akan benenci oleh seluruh bangsa kerna nai-Aap. ¹⁰ Pada watu iro, deoq yaq akan tersandung, dan akan saling nyerahkan, dan benci erai ampetn yaq bali. ¹¹ Deoq nabi palsu akan timur dan menyesatkan senarikng deoq. ¹² Sebab, pelanggaran semakin mentameh, kasih akan saman senarikng akan jadiq jelep. ¹³ Akan tetapiq, ulutn yaq betahetn sampei ahir akan senelamet. ¹⁴ Dan, Injil Kerajaan ohoq akan diberitakan la seluruh dunia kalaq kesaksian bagiq sekorekng bangsa, dan lipes iro kesudahanyaq akan empet.” Penderitaan Solai dan Kristus-Kristus Palsu ¹⁵ “Jadiq, beraq ka kitaq pembinasa keji, kiaq yaq tenokai Nabi Daniel, jakat mo antai suci, hendaklah para pembaca memahami yaq, ¹⁶ makaq ulutn yaq naan mo Yudea harus uyoq la saikng. ¹⁷ Enceq yaq naan punan sapo belai, boteqlah uhaq ili alaq oon pun ete sua belai uhaq. ¹⁸ Enceq yaq naan mo umaq, boteq  uli ala jubah uhaq. ¹⁹ Namun, selakalah ulutn yaq sedeng untukng dan ulutn yaq sedeng pesunsuq owak yaq pada olo-olo iro. ²⁰ Bedoalah nadeq penguyotn ka boteq mo musim osaq atau pada olo Sabat. ²¹ Kerna lipes iro akan jadiq masa penderitaan solai, kiaq yaq male pernah jadiq sejak permulaan dunia sampei sekareng, dan beaw akan pernah jadiq oliq. ²² Dan, amen olo-olo iro beaw penengkidok, aweq naan yaq bolupm akan senelamet. Namun, demi ulutn yaq beneli, olo-olo iro akan penengkidok. ²³ Lipes iro, amen erai kongak biongau la ka, ‘Neaw, Kristus naan mo ohoq,’ atau ‘Uhaq naan mo aro,’ boteq lah persaya la yaq. ²⁴ Sebeb, kristus-kristus palsu dan nabi-nabi palsu akan timur dan akan enaq tanaaq-tanaaq yaq solai dan mujizat-mujizat sehingga menyesatkan, amen mungkin, bahkan ulutn yaq beneli. ²⁵ Perhatikanlah, Aap epuq nokai yaq la ka semale yaq. ²⁶ Jadiq, amen ulutn nokai la ka, ‘Neaw, Uhaq naan mo padekng belantara,’ boteq engko la aro, atau ‘Neaw, Uhaq naan sua kamar iro,’ boteq persaya yaq. ²⁷ Sebeb, sama kiaq ilap yaq memancar ete timur dan besinar sampei la barat, keliro lei akan jadiq saat Anak Senarikng empet. ²⁸ Mo antai yaq naan bangkei, mo irolah pepuluq nasar akan bekumpur.” Saat Empet Anak Senarikng ²⁹ “Segera, lipes masa penderitaan iro, ‘Matetn Olo akan jadiq denepm, dan bulatn beaw akan nyeq cahaya uhaq, Bintekng-bintekng akan lotu ete langit, dan kuasa-kuasa mo langit akan genuncang.’ ³⁰ Lalu, tanaaq Anak Senarikng akan timur mo langit dan suku-suku mo bumi akan meratap. Ulutn akan kitaq Anak Senarikng empet sua jautn-jautn mo langit, ampetn kuasa dan kemuliaan yaq solai. ³¹ Dan, Uhaq akan ngutus malaikat-malaikat-Uhaq opekng ongau trompet yaq waleq, dan ulutn akan ngumpur umat peneli-Uhaq ete keopat penjuru bumi, ete dirikng langit yaq erai la dirikng yaq bali. ³² Sekareng, belajerlah perumpamaan ete puutn ara beraq daatn yaq jadiq lomeq dan dawetn-dawetn yaq nokok, ka amen musim langet epuq diniq. ³³ Keliro lei beraq ka kitaq sekorekng hal ohoq, ka tauq amen watu yaq epuq diniq, mo ambang jawekng. ³⁴ Sesungguh yaq, Aap nokai la ka amen generasi ohoq beaw antekng lalo sampei sekorekng hal ohoq jadiq. ³⁵ Langit ampetn bumi akan tawaq, tapiq firman-firman-Aap beaw akan tawaq.” Watu Empet Anak Senarikng ³⁶ “Akan tetapiq, mengenai olo dan watu yaq, aweq naan erai pun yaq tauq, malaikat-malaikat mo surga pun beaw, Sang Anak pun beaw, tapiq hanya Sang Bapa. ³⁷ Sama kiaq yaq jadiq pada zamen Nuh, keliro lei akan jadiq watu empet Anak Senarikng. ³⁸ Sebeb, kiaq bayaq olo-olo semale air bah, ulutn man dan pisep, pululukng dan penelulukng, sampei bayaq olo Nuh sua la bahtera. ³⁹ Dan, ulutn beaw memahami yaq sampei air bah empet dan petawaq sekorekng senarikng; keliro lei akan jadiq watu Anak Senarikng empet. ⁴⁰ Lipes iro, akan naan duaq senarikng mo umaq; yaq erai akan doit dan yaq erai akan dolak. ⁴¹ Duaq bawe akan menggiling pada batuq kilangan, yaq erai akan doit dan yaq erai akan dolak. ⁴² Kerna iro, berjaga-jagalah kerna ko beaw tauq pede olo meq Tuhen ko antekng empet. ⁴³ Namun, ketahuilah ohoq amen uputn belai epuq tauq kapan, bayaq watu malepm, ulutn dako antekng empet, uhaq akan bejaga dan beaw antekng dewaq belai uhaq benungker. ⁴⁴ Oleh kerna itu, ka harus siap sedia kerna Anak Senarikng empet bayaq watu yaq ka beaw nyangka yaq” Pelayan Yaq Setia dan Pelayan Yaq Daat (Luk.12:41-48) ⁴⁵ “Lalu, enceqkah pelayan yaq setia dan bijaksana, yaq denyen kuasa  oleh tuen yaq atas seluruh belai uhaq kalaq nyeq ulutn okatn mo watu yaq tepet? ⁴⁶ Diberkatilah pelayan iro, yaq beraq tuen yaq empet, tuen yaq iri beruku uhaq sedeng kerjaq masem iro. ⁴⁷ Sesungguhyaq, Aap nokai la ka amen tuen  iro akan nyeq kuasa la pelayan iro atas sekorekng retaq uhaq. ⁴⁸ Namun, amen pelayan daat iro biongau sua asekng uhaq, ‘Tuen aap nunda watu empet uhaq’ ⁴⁹ lalu uhaq mulai kempes pelayan-pelayan yaq bali, lalu man serta pisep beroh para pemauk; ⁵⁰ tuen ete pelayan iro akan empet bayaq olo beraq uhaq beaw ngarep dan mo watu yaq beaw tenoan uhaq. ⁵¹ dan akan pekate uhaq, dan peberoh uhaq ampetn Ulutn-ulutn munafik. Mo antai iro, akan Naan tangih dan kertak kukut”