¹ “Sebeb, Kerajaan Surga adalah kiaq uputn belai yaq ete dariq engko elo pengerjaq-pengerjaq kalaq kebotn angguryaq. ² Beraq uhaq epuq sepakat ampetn para penerjaq iro erai dinar per olo, uhaq siu ulutn engko kebotn anggur uhaq. ³ Dan, kira-kira mo jam 9 uhaq engko dan kitaq yaq bali sedrng jakat nganggur mo paser. ⁴ Lalu, uhaq nokai la ulutn, ‘Ka, engko lei la kebotn anggur dan oon yaq pantas akan denyeq aap la ka.’ Dan, ulutn pun engko. ⁵ Eso sinai, sekitar jam 12 dan jam 3 doyekng uhaq engko dan enaq hal yaq sama. ⁶ Dan, kira-kira mo jam 5 doyekng, uhaq engko dan ruku yaq bali oliq sedeng jakat dan nokai la ulutn, ‘Kelemeq ka jakat mo ohoq nganggur erai batakng olo?’ ⁷ Ulutn nokai la uhaq, ‘Kerna male naan yaq nyeq kaiq kerjaq.’ Uputn kebotn iro biongau la ulutn, ‘Ka, engko lei la kebotn anggur aap.’ ⁸ Beraq olo epuq mulai malepm, uputn kebotn iro nokai la mandor yaq, ‘Nogeq para pengerjaq dan mayar la ulutn upahyaq, mulei ete yaq pengodiq sampei yaq pengonaq.’ ⁹ Beraq ulutn yaq sua kerjaq jam 5 doyekng, empet, masing-masing terima 1 dinar. ¹⁰ Beraq ulutn yaq sua kerjaq paling onaq, empet, ulutn nyangka akan terima lebeh deoq. Namun, ulutn masing-masing pun terima 1 dinar. ¹¹ Beraq terimayaq, ulutn protes la uputn kebotn. ¹² Ulutn nokai, ‘Ulutn-ulutn yaq sua pengodiq hanya kerjaq sekolatn 1 jam, dan ko nyeq ulutn sama ampetn kaiq, yaq epuq nanggukng beban dan perekng erai olo bulet.’ ¹³ Akan tetapiq, uputn kebotn iro ngejawab dan nokai la erai ete ulutn, ‘Piariq, aap beaw salaq la ka. Beawkah ka epuq sepakat ampetn aap erai dinar? ¹⁴ Alaqlah gen ko dan uli, tetapiq aap kakatn nyeq la yaq pengodiq ohoq, sama kiaq la ka. ¹⁵ Meqkah aap beaw kenendewaq kalaq enaq oon pun apa yaq dakatn aap ampetn pengenaan aap sendiri? Atau, meqkah mataq ka daat kerna aap bueq?’ ¹⁶ Jadiq, yaq pengodiq akan jadiq yaq pengonaq, dan yaq pengonaq akan jadiq yaq pengodiq.” Yesus Mencareng Oliq Tentang Mate-Uhaq (Mrk.10:32-34; Luk.18:31-34) ¹⁷ Beraq Yesus akan engko la Yerusalem, Uhaq oit duaq beles murid-Uhaq secara tepisah. Sua perjalanan, Uhaq biongau la ulutn, ¹⁸ “Perhatikan, takaq sedeng nujuq Yerusalem dan Anak Senarikng akan senerah la imam-imam kepala dan ahli-ahli Taurat. Ulutn akan nguhukupm-Uhaq pekng ukupm mate. ¹⁹ Lalu, ulutn akan nyera Uhaq la bangsa-bangsa bali kalaq ngasaq, nyambuk, dan nyalib-Uhaq. Dan, mo olo ketoluq, Uhaq akan penensuli.” Penyaketn Tinen Ete Anak-Anak Zebedeus (Mrk.10:35-45) ²⁰ Lipes iro, tinen ete anak-anak Zebedeus ampetn anak-anakyaq empet la Yesus dan sujud kalaq sake sesuatu la Yesus. ²¹ Dan, Yesus nokai la-uhaq, “Oon yaq dakatn ka?” Tinen yaq ngejawab, “Perentahkanlah nadeq keduaq anak aap ngahan tuet mo sua Kerajaan-Ko, erai mo bila sanan-Ko dan erai mo bila seiq-Ko.” ²² Akan tetapiq,  Yesus ngejawab, “Ka beaw ngerti oon yaq senake ka. Meqkah ka sangup pisep ete cawan yaq harus benisep Aap?” Ulutn nokai la Yesus, “Yaq, kaiq sangup.” ²³ Yesus biongau la ulutn, “Ka memeng akan pisep ete cawan-Aap, tetapiq kalaq tuet bila sanan-Aap ateu seiq-Aap, abaqlah hak-Aap kalaq nyeq yaq, melaitnkan bagiq ulutn yaq epuq seniap oleh Tamen-Aap.” ²⁴ Beraq sepuluh murid yaq Bali dingaq yaq, ulutn suker la keduaq yaq iro. ²⁵ Namun, Yesus nogeq ulutn dan nokai, “Ka tauq amen para penguasa bangsa-bangsa bali nyeq perentah la ulutn, dan ulutn-ulutn solai yaq pekanan wewenang atas mali. ²⁶ Seharusyaq beaw keliro mo antara ka, tetapiq enceq yaq kakatn  jadiq solai mo antara ka harus jadiq pelayan ka. ²⁷ Dan, enceq pun yaq kakatn jadiq yaq utama mo antara ka harus jadiq hamba ka, ²⁸ sama kiaq Anak Senarikng yaq empet beaw kalaq penelayan, tetapiq kalaq ngelayan dan nyeq asekng-Uhaq kalaq tebusan bagiq senarikng deoq.” Duaq Senarikng Posa Peneleheq (Mrk.10:46-52; Luk.18:35-43) ²⁹ Dan, beraq ulutn molak Yerikho, kerumunan solai senarikng nyingkui-Uhaq. ³⁰ Dan, duaq ulutn posa yaq sedeng tuet mo dirikng lalaq bayaq dingaq naan Yesus lalo, nogeq ampetn nokai, “Tuhen, Anak Daud, terasilah kaiq!” ³¹ Senarikng deoq negur mali aga Mali komei. Akan tetapiq, semakin waleq nogek dan nokai, “Tuhen, Anak Daud, terasilah kaiq!” ³² Lalu, Yesus berenti dan nogeq  mali, tokai-Uhaq, “Oon yaq ka mayu Aap enaq kalaq ka?” ³³ Mali nokai la-Uhaq, “Tuhen, kaiq mayu mataq kaiq benuke.” ³⁴ Yesus tegeraq oleh rasa terasi la mali, dan geeq mataq mali, dan saat iro lei mali terima pengitatn mali oliq, dan nyang Yesus.