¹ Pada watu iro,  Herodes, raja wilayah, dingaq berita-berita tentang Yesus. ² Dan, uhaq nokai la pelayan-pelayanyaq, “Ohoqlah Yohanes Pembaptis. Uhaq epuq Suli ete antara ulutn mati dan kerna irolah mujizat-mujizat ohoq bekerjaq sua-Uhaq.” Peristiwa Mateyaq Yohanes Pembaptis ³ Sebeb, Herodes epuq nangkep Yohanes, ngikatyaq, dan pesua uhaq la pencaraq kerna Herodias, sawaq Filipus, eraibutukng Herodes. ⁴ Kerna Yohanes pernah nokai la uhaq, “beaw halal bagiqko ngempuutn Herodias.” ⁵ Dan, waleu Herodes kakatn pekate Yohanes, uhaq takut la senarikng deoq kerna ulutn menganggap Yohanes sebagei nabi. ⁶ Tapiq, beraq empeq olo ulang tautn Herodes, anak bawe Herodias nari mo telamaq ulutn, dan iro peseneng Herodes, ⁷ sehingga uhaq besumpah antekng nyeq oon ngauq yaq senake tiaq bawe iro. ⁸ Oleh kerna iro setelah benaksa oleh tinenyaq, tiaq bawe iro, nokai “Nyeqlah la aap mo ohoq, utek Yohanes Pembaptis punan talem.” ⁹ Waleupun raja sedih, tapiq kerna sumpah uhaq dan kerna ulutn-ulutn yaq man beroh uhaq, uhaq pun nyeq perentah nadeq sengkenyang hal iro. ¹⁰ Uhaq siu motek utek Yohanes mo pencaraq. ¹¹ Dan, utek Yohanes doit punan talem, denyen la tiaq bawe iro dan uhaq oityaq la tinen uhaq. ¹² Lipes iro, murid-murid Yohanes empet, entokng unuk Yohanes, dan ngelubekngyaq. Lalu, mali engko petauq la Yesus. Limaq Roti dan Duaq Kinas (Mrk.6:30-44; Luk.910-17; Yoh 6:1-14) ¹³ Beraq Yesus dingaq hal ohoq, Uhaq nyingkir edotn ete iro engket alur, la ongok yaq sunyi. Dan, beraq ulutn-ulutn dingaq hal ohoq, ulutn-ulutn manan kenekng  perasuq-Uhaq ete kota-kota. ¹⁴ Beraq Yesus losek.  Uhaq kitaq  kerumunan senarikng deoq, dan rasa terasi la mali, dan peleheq rotetn mali. ¹⁵ Beraq olo mulei malepm, para murid empet la Yesus dan biongau, “Antai ohoq sunyi dan olo epuq mulei malepm. Sebueq yaq siu senarikng deoq iro engko la kampukng-kampukng dan moliq esaq okatn kalaq mali masing-masing.” ¹⁶ Tapiq, Yesus nokai la mali, “ulutn iro beaw asak manan. Ka lah yaq nyeq ulutn okatn.” ¹⁷ Murid-murid nokai la Uhaq, “Mo ohoq takaq aweq naan oon-oon, kecuali 5 roti dan 2 kinas.” ¹⁸ Dan, Uhaq nokai, “Oit lahoq esaq dekediro, la-Aap” ¹⁹ Lipes iro, Uhaq siu senarikng deoq iro tuet mo jikut, dan Uhaq alaq 5 roti dan 2 kinas iro, lalu samer neaw la langit, Uhaq mengucap syukur dan nyebit-nyebit okatn iro. Lipes iro,  Uhaq nyeq la murid-murid-Uhaq, dan murid-murid-Uhaq nyeq la senarikng deoq. ²⁰ Dan, sekorekng mali man dan botikng. Lalu, mali ngumpur sisa-sisa okatn iro, naan duaq beles keranjang punikng. ²¹ Dan, senarikng yaq man kira-kira ada 5.000 sookng, male termasuk bawe abetn tiaq. Yesus Manan Punan Danum (Mrk.6:45-52; Yoh.6:15-21) ²² Yesus siu murid-murid-Uhaq segera sua alur dan berangket onaq la empai,  sementara Uhaq siu senarikng deoq iro uli. ²³ Dan, lipes  Yesus siu senarikng deoq iro uli,  Uhaq engket edotn la punan saikng engko bedoa. Beraq hampir malepm,  Uhaq edotn mo aro. ²⁴ Tapiq, alur iro epuq oroq ete papakng dan genombang-ambingkan gelombang kerna ngelawetn arah dolek. ²⁵ Dan, pada kira-kira jam 3  malam, Yesus empet la mali, manan punan danum. ²⁶ Beraq para murid kitaq-Uhaq manan punan danum, mali takut jerenih dan nokai, “Iro uwok!” Lalu, mali ngedodoi konaq takut. ²⁷ Tapiq, Yesus langsung biongau la mali Tokai-Uhaq, “Tenenglah ohoq Aap, boteq takut.” ²⁸ Dan, Petrus biongau la-Uhaq, “Tuhen, amen iro Ko, siulah aap engko la Ko manan punan danum.” ²⁹ Yesus biongau, “Engkolah lahoq!” Makaq, Petrus losek ete sua alur, dan manan punan danum, dan engko la Yesus. ³⁰ Namun, beraq kitaq dolek, uhaq jadiq takut dan mulei lotekng. uhaq ngedodoi “Tuhen, selamatkan aap!” ³¹ Yesus langsung nyorokng kami-Uhaq geeg Petrus, dan biongau, “Ko yaq kurekng persaya, kelemeq ko ragu-ragu?” ³² Beraq ulutn sua la alur, dolek pun berenti. ³³ Lipes iro, mali yaq naan sua alur menyembah Yesus dan biongau, “Sesungguhyaq, Ko adalah Anak Allah!” Yesus Peleheq Ulutn-Ulutn Berotetn (Mrk.6:53-56) ³⁴ Setelah kotas la empai, mali empeq mo tana Genesaret. ³⁵ Beraq ulutn-ulutn mo ongok iro kener-Uhaq, ulutn petauq la sekorekng  daerah iro dan oit sekorekng ulutn yaq  beroten la Yesus. ³⁶ Mali mohon la Yesus nadeq ngahan menyentuh empak jubah-Uhaq dan sekorekng senarikng yaq menyentuhyaq jadiq leheq.