¹ Keho ua va longethele kulongetha ku mukulo ua mema a Kalungandonga, na mbunga ya kama ya mu dhengelekele. ² Ua londele mu vuato, na ku tumama. Ua va longethele via vingi mu vithimo mu vi longetha viendi, ua handekele navo. ³ "Tolilileni! Ndimi ua ile na ku kuna mbuto yendi. ⁴ Imo ya uililile mu ngila, keho tu dhila va ilile. ⁵ Imo ya uililile ha mavue, kuya kele na livu lia lingi helu lia mavue, keho kuya shokele. ⁶ Omo litangua lia kile, mbuto yomine mukonda kun yakele na midhi. ⁷ Mbuto imo ya uililile mu manja, manja a kolele a i lile, keho ku ya shokele. ⁸ Imo ya uililile mu livu lia cili, ya kulile na ku li lanetha, na ku naku kungulula kuelanene. ⁹ Ngeci ua handekele nguendi, "Ou a li na matui o vue!" ¹⁰ Omo Yesu mua kele likaliendi, na vaye va kele nendi na va ndonge likumi na va vali va muihiule via vi thimo. ¹¹ Ua handekele nguendi, "Kuli yeni vana mi hana ku langununa via Kalunga. Vunoni ava voshe vali hanja, vioshe vili muvithimo, ¹² ngoco omo va tala, vali naku tala vunoni ku va mono, ngoco omo vovua, vali na kuvua vunoni ku ci va langunuka. Noho va tenguluka, keho Kalunga a vethele. ¹³ Ua valekele nguendi, "Ku muovuile vithimo evi ndi? Vati vika milangunuka? ¹⁴ Muka kukuna ua kunine lijiu. ¹⁵ Eli likelio loa kele kungila kuje ku va kunine lijiu. Omo mu vovua, Satana vuathi vuathi e ja na kutambula lijiu li vana kunu. ¹⁶ Eyi ikeyo mbuto i va kunine ha mavue, va je mu kuvua lijiu vuathi vuathi va tambula naku jolela. ¹⁷ Vunoni kuva kele na midhi muli yavo, vunoni va tualelela kanthsimbu lika. Kunima yanthsimbu mu vija vietheko, vuathi va ua. ¹⁸ Mbuto imo va i kunine ha manja. Hali vamo ve kuvua majiu. ¹⁹ Vunoni kuyongola viuma via hanthi naku kokueya ca vupite na viuma, vikuavo kui ja na ku tanganetha. Keho majiu kuli vakevo navimo viahi. ²⁰ I je i va kunine ha livu lia cili va kevo ve kuvua majiu, ku atambula na kuima vushuka miaka na miaka. ²¹ Yesu ua valekele nguendi, "uekuneha mutangeko munjivo na ku u haka muinthi lia ci hele ndi muinthi lia mbete? ²² Kuyi koveletha naku yihaka helu. Cahi ca kuvanda vunoni ci kala hamutania. ²³ Nga uoshe ali na matui, o vue!" ²⁴ Ua valekele nguendi, "Tolilila vuino kuli evi viutheka vaka kuetheketha vio yove vavenya, vaka ku vedhelelako via vingi. ²⁵ Muomu ou ali navio, vaka muhana via vingi, lalo ou na jena, nevi viali navio vaka mu tambulavio. ²⁶ Ua vuedhako lalo nguendi, "Vuangana vua Kalunga vunafu ngue mumala ua kunine mbuto yendi mulivu. ²⁷ Ua kotha vunsiki mua hindukile mutania, na mbuto yendi mulivu yemine, nendi lalo kadhivukile vati ya shokele. ²⁸ Mavu ekuimitha mbuto yao, hakulivanga mukuale, amba litui, kumanetha mbuto yaku kola mulitui. ²⁹ Mukuhia kua mbuto, vuathi atuma va ka kutia muomu nthsimbu ya kutia ina hete. ³⁰ Lalo ua handekele, "Na vika tuetheketha vuangana vua Kalunga, ndi cithimo muka tu languinitha? ³¹ Ngue mbuto yakufutunuka, muku ikuna kakandende hamavu. ³² Vunoni mu kuyikuna, ishoka naku hitakana vimbuto vioshe mulihia nakuima mintango yakama, natudhila va miulu va tunge mashua avo mucivule." ³³ Navihtimo via cifua eci ua handekele navo nambe omo kuvia va langunukile, kahandekele navo nga keti navithimo. ³⁴ Vunoni omo ua kele likaliendi nava ndonge ua va languinine vioshe. ³⁵ Halitangua lije, omo vutsiki vua hetele , ua valekele nguendi, "Tuyeni musinia lia ndonga." ³⁶ Va thile mbunga, nakuya naYesu hamolika ngue omo va kele mu vuato. Mato akuavo amushuamene. ³⁷ Hakanthsimbu mpundhi yakama yashangumukile na mankimba akovelele muvuato, vuato muhiehi nakushula. ³⁸ Vunoni Yesu vavenia na kotha ha nanga a li mutulo. Vandonge vamu hinduile nakuhandeka nguavo, "Mulongith ku uethi na cishoti netu nguove tutsa"? ³⁹ Uahindukile, uahinduithile mpundhi naku handekela ku mema aKalungandong, "Nacivovo! Litule!" Mpundhi yaholokele kulu. ⁴⁰ Ua valekele nguendi, "Vika mu kela na liova? Komuethi na luthsilielo?" ⁴¹ Va shulile na liova, vali handekethele, "Iya ou nambe mpundhi na mema aKalunga vina muononoka?"