¹ Keho Yesu uendele muvi Sinangona, ha kele mumala ua livoko lia kuthekua. ² Vakele vantu vamo va mutala ntoma nguavo amba kuatha ku kanguitha mu litangua lia Sapalalo ku lingila vamu payeleho. ³ Yesu ua leka u je mumala ua kuthekua livoko nguendi, "Katuka uimane mukati kambunga." ⁴ Keho ua leka vantu nguendi, "Muomu ca cili ku mashiko ku kanguitha muntu mu Sapalalo ndi ku vihitha mu kuohiela ndi kutsiha?" Voshe va holokele. ⁵ Ua talele mukati kavo na vukalu, ua kele na vuthiua muomu vimpata via kuvimbunge viavo, keho ua leka uje mumala, "Olola livoko liove." Keho uolola livoko lia kangukile. ⁶ Vakakulihakavio vatuhukile, vuathi vuathi muku tameka kuliuvua nava Helonde nguavo vati vatha kumutsiha. ⁷ Yesu nava ndonge vendi vayile ku kalungandonga na mbunga yayingi ya vantu vamu shuamene kutunda ku Ngalileya na ku Yundeya ⁸ na vaku tunda kuYelusalema na vaka kutunda ku Indume kutuvakana Yolondau naku Tile na Sindone. Mu kuvua vilinge via pangele mbunga ya ingi yedhile kuli yendi. ⁹ Ua lekele va ndonge vamu vuahetheleko vuato vuavu ndende mukonda mbunga ya ingi, ku lingila vantu keci vamu valakane. ¹⁰ Ua kanguithile va vengi, keho voshe vaje va vavalele ku mbunge vakele namalungilo aku mushuena mehehi linga va mukuate. ¹¹ Nkala aha nga mpundhi yaku viha muya mumuene, vantu va uile kumesho endi nakulila , "Ou muna Kalunga." ¹² Yesu ua lekele vimpundhi viaku viha linga keti vi vihandeke kuvantu. ¹³ Ua ile kumukinia nakuthana vaje va yonguele ngeci vedhile kuli yendi. ¹⁴ Uahanguile likumi navavali vaye valukile va postolo linga akale navo naku vatuma vatuale mithimbu. ¹⁵ Nakukala nandthili yakusheka vandemone. ¹⁶ Uahanguile likumi navavali: Simoni, yalukile Petulu; ¹⁷ Tiango muna Sembendeo, na Yoano munayina ya Tiango, uje yalukile Boanerges, kutumbula, muna cititimo; ¹⁸ na Endulu, Filipu, Mbatolomeu, Mateu, Tomas Tiango mona Alufeusa, Tandeusa, Simoni muka kanana, ¹⁹ na Yundasa Isakaliota, uje a kamuenda vungungu. ²⁰ Keho muayile kuimbo, mbunga ya yethile kumo lalo, linga na kumbolo keti valieko. ²¹ Mova viuvuile vavushoko vuendi, vayile vaka muvindike, naku handeka nguavo, 'nashevuka. ²² Vaka kuthoneka vaje vstundile ku Yelusalema vahandekele nguavo, ''ou uakala na mbembesembulu muene uava ndemone'' na ''yikeyo yapangetha mukusheka vandemone.'' ²³ Yesu wava thanenene kuli yakeye naku valeka muvithimo, ''Vati Satana muatha kusheka Satana? ²⁴ Ambe vumuene vuka litepa avo vuvenia, vumuene ovuo kovu kemana. ²⁵ Ambe njivo yilitepa ayo yivenia, njivo oyo koyi kemana. ²⁶ Ambe Satana aliluitha endi vavenia keho alitepe, katha lalo kuimana, vunoni nali lengetha. ²⁷ Na umo uahi atha kukovela minjivo yamumala uandhili aka puanje vufuko vuendi, ajeneke kuvanga kukuta mumala uje wandhili mbangelo, oshe hani apuanja njivo ije. ²⁸ Vucili nji mileka, vupi vuoshe vua vana vavantu vaka vuecela, nambe voshe vaka mushahula naku muhandeka muaku viha, ²⁹ vunoni nkala uoshe ashahula mpundhi yakulela kaka uana kuecela, vunoni ali namulonga uayaye''. ³⁰ Yesu wavi tumbuile evi mukonda va handekele nguavo, ''ali na mpundhi yakuviha.'' ³¹ Keho vayina na vakuenje vendi vethile vemana hanja. Vamu tuminine, vaka muthane. ³² Mbunga yamu thengelekela yamuleka nguavo, ''vanoko nava munanoko hovali hanja vaku thetela.'' ³³ Ua va limbuluile, ''Iya vanana nava munanana?'' ³⁴ Ua talele ava va tumamene naku muthengelekele naku handeka nguendi, ''Tala, vano vakevo vanana nava munanana! ³⁵ Mukonda nkala uoshe apanga cithango ca Njambi, muntu ouo yakeye munanana, na vanana.''