¹ Muje ua hilukile ku Kapenama munima ya matangua a mandende, voviule nguavo ikeye ali hembo. ² Ngoco vavengi vakungulukile, kukua kele luhua njenjo kuje, nambe ha cikolo vene na Yesu ua kuaniene majui navo. ³ Keho vamala vamo vethile keli ikeye vaje vanehele mumala umo uakele na vulema kayekele; vamala va uana va muambatele. ⁴ Omo ku vathele kuheta muhiehi, mukonda ya mbunga, va jambuluile helu lia njivo yakele Yesu, muva hakele katuntu, vathothele cishenge civa langekele muka kayekele. ⁵ Muamuene kuthselela kuavo, Yesu ua lekele muka kayekele nguendi , "Munange, vuvi vuove vana vuecela. ⁶ Nava kakuthona mathona va tumamene kuje , va lihuile muvimbunge viavo ⁷ nguavo, "Vati muntu ou a handeka ngoco? Nashaula! Ou ecela vuvi Kalunga lika?" ⁸ Vuathi-vuathi Yesu ue thivile mu mpudhi yendi vije viva thinganiekele avo vavenia. Ua valekele nguendi, "Mukonda lia vika muthinganiekela evi muvimbunge vieni? ⁹ Cika ca cathi kukuania namu ka kayekele, "Vuvi viove vana vuecela" ndi ku kuania "Katuka , ambata ciyalo cove enda"? ¹⁰ Linga muithive nguenoi muna muntu ali na mpoko hano hanthsi ya kuecela vuvi. Ua lekele muka kayekele , ¹¹ "Ange nji kuleka nguange katuka, kakula ciyalo coye, ya kunjivo yove." ¹² Muka kayekele ua katukile vuathi vuathi, ua ambatele ciyalo cendi ua tuhukile munjivo kumesho a voshe, va komokele vahele kushangana kuli Kalunga, va kuaniene nguavo, "Nolo kanda tu mone cuma cakufua ngeci." ¹³ Endi ua tuhukile luhua ua ile ku mukulo ua lishali. Na mbunga yoshe yamushuamene, ua valongethele. ¹⁴ Endi mua hitile kumukulo uamuene Levi muna Alufeu natumama kunjivo ya kufuetethela lithimu ua mulekele nguendi, "Nji shuame, endi ua katukile, uamushuamene. ¹⁵ Yesu ua lile lijumbu ku njivo ya Levi, nava kakufuetetha lithimu, na vaka vuvi va lile mumo nendi na vandonge vendi, haje ha kele va vengi va mu shuamene. ¹⁶ Mukemo vaka kuthona vaje via puile vaka kuli hakavio vamuene Yesu alia mumo na vaka vuvi na vaka kufuetetha lithimu, va kuaniene na vandonge nguavo, "Vati ikeye ue kulila na vaka kufuetetha lithimju na vaka vuvi?" ¹⁷ Omo va viuvuile, ua valekele nguendi, "Vantu vaje vali vukangule kuvethetela cimbanda, vunoni , vaka kauvavala lika. Ange kunjethile muku thana vaka vucili vunoni vaka vuvi." ¹⁸ Ngoco vandonge va Yoano na vakakulihakavio, vali kelele kulia muku dhiliya. vantu vamo vamulekele nguavo, "Mukonda lia vika vandonge vaYoano na vandonge va vakakulihakavio veku likela kulia vunononi vandonge vove kovekulikela kulia?" ¹⁹ Yesu ua valekele nguendi, "citava vaka kuija ku cilika cavulo kudhilila munthsimbu vavenia vulo a cili navo?" Munthsimbu va cili na vavenia vulo ku va dhilila. ²⁰ Vunoni litangua linahete muva kamutunditha kuli vakevo , na mu matangua o o, vaka likela kulia. ²¹ Na umo uahi a tongela cintjantjo ca nanga ya iha ku cidhala ca laja. Ambe ngoco, civando caco ci ka tavukila haje vene ha li uanena ya laja, kutavuka kuaco ku ka tuvakana. ²² Na umo uahi ahaka viniu via viha mu njela ya cikanda ya laja, ambe ngoco viniu via viha vika tavula vikanda, na viniu na njele vioshe vinonga. Nga viniu via viha ku vihaka mu njele ya iha. ²³ Ha litangua lia Sapalalo Yhesu ua hitile kumahia a vimbuto, na vandonge vendi va shangumukile ku tambula mitue ya vimbuto valile. ²⁴ Vaka kulihakavio va mulekele nguavo, "Tala vati vapanga vije kuva tavethele ku vipanga mu litangua lia Sapalalo?" ²⁵ Yesu ua valekele nguendi, "Nolo kanda mutande nguavoo, Ndaviti ua vilinge muje mua jenekele via kulia na muje uo vuile njala. Ikeye na vantu vaje vakele nendi?" ²⁶ Mukemuo va ile ku njivo ya Kalunga, muje Ambiata ua kele sasendote ua kama, ua lile vimbolo via munjivo ya Kalunga vije kuva vitavethele ku vilia nkala muntu, kuvanga sasendote ua kama, ikeye ua haneneko luhua kuli vaje vakele hamo nendi. ²⁷ Yesu nguendi, "Sambata va i pangelele mukonda lia muntu, Ku va pangelele muntu mukonda lia Sapalalo. ²⁸ Mukemuo muna muntu ikeye Muene nambe vene ku Sapalalo ikeye Muene."