¹ Kulutue lua matangua avali a ciuano cPasovala na cilika cambolo yacimbalila. Vasasendote vakama na vakua kuthona mathiona vakama va thinganiekele vati vatha ku kuata Yesu linga va ka munthile. ² Keho va kuanieneko nguavo, "Keti mulitangua lia cilika ca Pasovala, kuteuetha ndhita na vantu." ³ Omo Yesi ua hetele mu Mbeetani ua kele ku njivo ya Simoni muka kayekele, muku heta kumetha, mukulia mukentu ua muidhilile. Uambatele nganja ya livue eyi yakele na madhi a ndando yakama, madhi akunika ava thana nandi. ⁴ Vunoni kua kele vamo va nienguele. Vahandekele umo namukuavo nguavo, "Mukonda muka na vihithila madhi aa?" ⁵ Madhi aa ana vuahela ku alandetha kundando yakama kutuvakana vihita vitatu naku vihana ku vaka kayando. Va mu payele nakuniengua. ⁶ Keho Yesu ua valekele nguendi, "Muetheleni likaliendi. Vika mumu hanena cishoti? Nanji pangela viuma via kama. ⁷ Nhsimbu yoshe mua kala na vihutu, eni kumua kele na cidhango ca ku vapengela via cili vunoni ku mukala nange nthimbu yoshe. ⁸ Napanga vije via natha . Na vuavuetha muvila uange muku u shitika. ⁹ Vucili njimi leka nguane kuje kuoshe kuva kambulula majiu a cili mu lifuti lioshe, evi viana panga ou mukentu vaka vi handeka nakumu vuluka." ¹⁰ Keho Yunda Sakalioto umo ua vandonge likumi na vavali, ua tundile ho kuya ku vakuluntu va vasasendote muku ka vuahetha muku va hana Yesu. ¹¹ Vakuluntu va vasasendote muku viuvua evi , va kele na ndjangi vamu tambuile naku mu thseleletha nguavo va mu hana vimbongo. Ua shangumukile kutonda ngila yaku hana naku landetha Yesu. ¹² Mulitangua lia kulivanga lia mbolo ya cimbaluila, omo va kombeleyele muna mpanga ua Pasovala, vandonge vendi va mu lekele nguavo, " Vika u tonda tu vuahethe, linga uathe kulia mbolo ya Pasovala?" ¹³ Ua tumine va vali vava ndonge vendi keho ua kuania nguendi, "Kayeni mumbongi muka uana mumala ua a li halishani lia halikola lya mema. Kamu shuameni. ¹⁴ Muje mua ka kovela kunjivo kamu shikuleni na kuhandeka na vavenia njivo ngueni, 'Mulongithi nguendi, "Kuiko kuli njivo ya vangendhi kuje kutu katha ku lia Pasovala na vandonge?" ¹⁵ Akamileketha njivo yakama ije i vana vuahetha. ¹⁶ Vandonge va tundileho nakuya ku mbonge. Va uanene vioshe ngue muava shikile, ngeci va vuahethele mbolo ya Pasovala. ¹⁷ Omo ca kele cinguedhi, uedhile n vaje likumi na vavali. ¹⁸ Mu ola yaku huimitha yakulia kumetha, Yesu ua kuaniene nguendi, "Vucili njimileka nguange, umo ueni ali nakulia hamom nange ikeye a ka njenda vungungu." ¹⁹ Voshe va kele navuthiua, umo ku umo va handekele nguavo, "Keti yanga." ²⁰ Yesu uakumbuluile naku handeka navo nguendi, "Umo ua likumi na vaval, uje inji kalia nendi lilonga limo. ²¹ Muomu Muna Muntu aka panga ngue muvana thoneka hali yendi kumukanda. Ngongo ya uje a kenda muna muntu vungungu. Cili kulutue nga kathemukile." ²² Omo vakele nakulia, Yesu ua tambuile mbolo ua ivedhikithile na kuipamuna na kuva hanayo, ua handekele lalo, "Tambuleni. Ou ukeuo muvila uange." ²³ Ua tambuile ngandja, naku ivedhikitha nakuva hana y, voshe va niune mu ngandja ije. ²⁴ Ua valekele nguendi, "Aa akeo maninga ange a mbalumukila va vengi. ²⁵ Vucili nji mileka nguange, kunja kunu lalo ku vushuka ovu vua viniu kuvanga litangua linji kanua viniu via viha mu vumuene vua Kalunga." ²⁶ Omo vamenene kuimba vatuhukile nakuya ku mukinia ua Olivela. ²⁷ Yesu ua handekele nguendi, "Muvavoshe muka tundako, va vithoneka, "Njika pupa kaniungi na vampanga vaka lishandoka." ²⁸ Vunoni kunima omo njina shituka nji kaya kulutue kuNgalileya. ²⁹ Petulu nguendi, "Nambe nga vakuetu vaka lishandoka, ange njika kushuama." ³⁰ Yesu ua mukuania nguendi, "Vucili njiku leka, lelo vene vuthsiki vuno kulutue ndemba a tambeke uka nji viana lutatu." ³¹ Vunoni Petulu nguendi, "Nga ca pande kuthsa nove, kunji ka kuviana." Voshe va liuvuathanene. ³² Vedhile kumuhela ua kuluka Ngetesemane na Yesu ua handekele na vandonge vendi nguendi, "Tumameni hano ange njiya mukuvundila." ³³ Ua hituile Petulu na Tiango na Yoano hamo nendi na kushangumuka kuvua vishoti navithinganieka via vingi. ³⁴ Ua valekele nguendi, "Muono uange una shulu na vuthiua , nambe mukeheta ha kuthsa. Thaleni hano nakuvingila." ³⁵ Mukuya kulutue, Yesu ua uile hanhsi naku vundila nguendi nga ci tava ola ihite hali ikeye. ³⁶ Ua handekele nguendi, "Abba, Tata viuma vioshe via viathi hali yove. Tambula ngandja eyi kuli ange. Keti cidhango cange vunoni cove." ³⁷ Ua hilukile ua ka va uana vana ndanda, na kuhandeka na Petulu nguendi, "Simoni, una ndanda?" Ku uathele kuvingila nambe ola imo? ³⁸ Vingileni nakuvundila, kuteuetha keti muka kovele muvietheko. Cimbembethi ciyongola vunoni muvila ku uethi nandhili. ³⁹ Keho ua hilukile naua mukuvundila, naku vundila medhi aku lifua ngue ha kulivanga. ⁴⁰ Omo uaka hilukile lalo, ua kuvauanene vana ndanda, namesho avo alemene. Kuvadhivukile vika vamu leka. ⁴¹ Uedhile luamu citatu na kuvaleka nguendi, "Kanda muna ndanda naku huimitha? Vinapu mo nhsimbu ina hete. Taleni! Muna Muntu va na muende vungungu kumu hana mu mavoko a vakua vuvi. ⁴² Hindukeni, Katukeni tuyeni. Taleni, u je anjenda vungungu ali hamuhiehi. ⁴³ Omo va handekele Yundasa umo ua likumi nava vali ua hetele na mbunga yendele nayo na mikonda na vivulo, kutundilila kuva sasendote vakama, vakua luthona mathona, na vakuluntu. ⁴⁴ Keho muka kumuenda vungungu ua va hanene cimuetho, naku handeka nguendi, "Uje i nji kathuemba ikeye mumalaouo. Kamukuateni nakumu hana musualale vamu niunge. ⁴⁵ Yundasa mua hetele , haje vene ua liuanene na Yeu naku handeka nguendi, "Lambi," kumo nakumu thsuemba. ⁴⁶ Keho va mukambekele mavoko nakumukuata. ⁴⁷ Vunoni umo ua vandonge ua shomuene muele uendi naku teta ko litui lia umo ua vangamba va vakuluntu vava ⁴⁸ sasendote.Yesu uamulekele nguendi, "Vati muija kuli yange ngue kumuidhi, na miele, navi vulo nakunji kuata?" ⁴⁹ Matangua anja kele neni nakulongetha mu tembele, kumua nji kuatele. Vunoni vino vi lingiua muku puithamo mathona. ⁵⁰ Na voshe va kele na Yesu va teuele nakumutha. ⁵¹ Mukuenje ua dhalele vudhalo vuali vuvile ua shuamene Yesu. Ngeci vamala vaje vamu kuatele. ⁵² Ua thile vudhalo vuendi na kushatuka mishenga shenga. ⁵³ Vatualele Yesu kuva sasendote vakama. Vakungulukile nendi navoshe vakuluntu vavasasendote, vakuluntu na vakakulihakavio. ⁵⁴ Keho Petulu ua mushuamene ha hiehi, ua ile vuhale vua mbala kunjivo yavasasendote ya vimpande. Ua tumamene hamo na vakua kuniunga, vaje vakele kutuhia muku lishaluitha. ⁵⁵ Vuno vakuluntu vava sasenndote na voshe va nguvulu ya Yundeya vaje vatondele vimoviaku uana Yesumulonga va ka muthsihe. Vunoni kuva uanene nakamo kahi. ⁵⁶ Vavengi vanehele vukaleho vua vishaki vunoni vukaleho vuje kuvua mu uanene mulonga. ⁵⁷ Vamo vakatukile naku muhandeka vukaleho vua vishaki kuli Yesu naku handeka nguavo, ⁵⁸ "Tua muvuile a handeka nguendi, 'Njika jambula ino tembele i va tunga na mavoko, namu matangua atatu njika tunga ikuavo yeka keti ya kutunga na mavoko.'" ⁵⁹ Cili nambe vukaleho ovu kuvua li ile hamo. ⁶⁰ Vasasendote vakama vakatukile mukati kavo nakuihula Yesu nguavo, "Ku ueku kumbulula?" Vika evi viva hana vukaleho vamala ava?" ⁶¹ Vunoni vaholokele kulu, naku kuania kuahi. Kanda vakuluntu va vasasendote va muihuile nguavo, "Yove Kilistu, Muna ua Uje Uakuvedhika?" ⁶² Yesu nguendi, "Yange vene, neni mukamona Muna Muntu omo a ka tumama kulivoko lya cilio lya ndhili, na kuija na mashela a muilu." ⁶³ Vakuluntu va vasasendote va tavuile vidhala viendi na kuhandeka nguavo, "Kanda tu tonda vakaleho? ⁶⁴ Munovu kushaula cendi. Vika muna tokola?" Voshe vamu hithile nguavo na vuahela kumuthsiha. ⁶⁵ Vamo vashangumukile kumu jekuile naku mufuika cihanga cendi naku mupupa naku muleka nguao, "Vupolofeto!" Masuale vamu nonene naku mupupa. ⁶⁶ Omo Petulu uakele kuinthsi lia mbala, umo ua vangamba ua vakuluntu vava sasendote ua mukentu uedhile kuli yendi. ⁶⁷ Ua muene Petulu ali nakuota kutuhia , muna mukentu ua talele ntoma kuli yendi naku handeka nguendi, "Nove umo ua kele na Yesu uaku Nazaleta." ⁶⁸ Vunoni ua livianene kuhandeka nguendi, "Kunjidhiva nakuvua nguang vika u handeka." Ngeci ua ile kumukulo ua ngila oho vene ndemba ua tambekele. ⁶⁹ Vunoni mukua manda ua mukentu omo ua mu muene ua handekele kuli vaje vemanene kuje nguendi; "Ou mumala umo uavo! ⁷⁰ Vunoni ua vianene lalo. Kunima a kanhsimbu ku valuje vemenene kuje va kuaniene kuli Petulu, "Muvucili, nove umo uavo kaNgalileya. ⁷¹ Vunoni ua shangumukile kuli thinga naku liviana ua handekele nguendi, "Ange kunji dhivuka vika ou mumala ali naku handeka." ⁷² Ndemba haje vene ua tambekele nhsimbu yamu civali. Petulu ua vulukile medhi a mulekele Yesu nguendi, "Kututue ndemba a katambeke luvali, uka nji viana lutatu." Ua uile hanhsi na ku lila.