¹ Omo Yesu uendele na kutunda mutembele, umo ua vandonge vendi ua kuaniene nendi, "Mulongithi, tala kulivue liakukomeketha ua vi vumbe via kukomouetha." ² Ikeye ua mu kuania nguendi, "Una mono evi vivumbe via kama?" Nalimo livue liahi lika thala helu lia likuavo, lije kuli kauila hanhsi. ³ Muku tumama kumu kinia ua Oivela yatiama ku tembele, Petulu, na Tiango, na Yoano na Anduleu, va muhuile muvushueke nguavo, ⁴ "Tuleke, nhsimbu muka evi viuma vika jomboloka? Vimuetho muka evi vika jomboloka omo viuma vioshe evi vika jomboloka?" ⁵ Yesu ua shangumukile ku valeka nguendi, "Dhangameni keti umo ami shevithe. ⁶ Vavengi vakeja mu lidhina liange nguavo, 'Yange vene,' na ku dhimbaletha va vengi. ⁷ Omo mukovua vindhita na manguavo keti mukale navishoti, viuma evi citava kujomboloka. ⁸ Mulifuti lika katukila lifuti likuavo na kuliluitha, na vumuene kuliluitha na vumuene vu kuavo. Kukala ku jaja ca livu na mihela yayingi na ndjala, eci cikafua vushangumukilo vua kudhema ku vavala. ⁹ "Vingilenu. Va kamituala kuvi ndhango eni lalo vaka mipupa mu mama Sinangonga. Mukemana akulutue lua voshe, nguvulu navimiene muomu liange ngue vukaleho kuli vakevo. ¹⁰ Vunoni mudhimbu una pande ku uambulula kememo oshe. ¹¹ Omo vaka kukuata naku ku kundika, keti ukalishoshome nguove vika uka kuania. Ku nhsimbu oyo veve, vije vi uka kuania vaka mihana vio; Keti yove uka handeka, vunoni Mpundhi Yakulela. ¹² Vantu na munaina vaka lituala ku kulinhsiha, ishe na mona, vanike vaka katula vidhindo na vakuluntu vavo lalo cika valingitha vakali nhsihe. ¹³ Ove lalo vaka kudhinda kuvoshe muomu lidhina liange. Vunoni uoshe uje akoletha noho hakulenga akovoka. ¹⁴ "Omo umona vidhila na vidhilika vi nemana haje havi najenekela kuvuhela kuimana." Ecela vaje vali mu Yundeya vateuele ku mikinia, ¹⁵ tavetha uje ali helu lia ndjivo linga keti aye ashuluke kuya mundjivo naku tambula vimo via mundjivo, ¹⁶ mue cele uje ali mulihia keti eje muku kambata vidhala. ¹⁷ Vunoni ngongo ya vaje na vana vavo vava kanda vali mu memo, na vaje vali na kuamueka kumavele kumatangua oo. ¹⁸ Vundileni kuteua keti vitholoka mucithika. ¹⁹ Muomu aka pua matangua a vitanga viakama, aje ka keleko lumo kutunda kuku shangumuka, kuje Kalunga ua tangele mavu, noho lelo viahi vieka cipue nakumiaka yoshe. ²⁰ Kuvanga Muene ha nehitha matangua, uahi muntu a kovoka. Vunoni mukonda lia kuhangula,kuli vaje va vahangula, natele kukala namatangua avo. ²¹ Vunoni nga umo aka mileka nguendi, "Tala, Kilistu uno!" ndi nguendi "Tala, uje ali haje!" keti mu ka vithselele. ²² Va Kilistu va vishaki na vapolofeto va vishaki vaka jomboloka va ku hana vimuetho na vikomouetho linga vakuithe, nga ci tava cipue vaje va va kahungula. ²³ Vingileni! Nja milekekele viuma evi vioshe kulutue lua nhsimbu. ²⁴ "Vuno kunima ya tuyando ku matangua aje, 'litangua lika dhivala, ngonde ika thsithsivala. ²⁵ Vintanga ntanga vikaua kutunda kuilu na ndhili ya muilu ika linenenga. ²⁶ Mukemo muka mona Muntu eja hamashelua nandhili yakama na vumpahu. ²⁷ Keho aka tuma kangelo kendi ngoco ikeye aka kunguiya hamo vaje vendi vahanguile kutundilila ku kushangumuka vua livu noku kualenga lilu. ²⁸ Lilongetheni mana ku citi ca mukuyu. Ngue mualolo mintango i tontola nakuikilila na kuima vimaho, dhivukeni nguavo ntondue ili muhiehi. ²⁹ Ngeci eni nga muka mona viuma evi vioshe vijomboloka, dhivukeni ngueni endi ali hamuhiehi, shokeni ku cikolo. ³⁰ Vucili nji mileka nguange, limo eli kuli kahiti kuvanga viuma evi vioshe vinapu mo. ³¹ Lilu na mavu vi kahita, vunoni lijiu liange kuli kahiti. ³² Vunoni haku thinganieka litangua na nthsimbu na umo uahi a i dhivuka, nambe tungelo va muilu, nambe Mona, kuvanga Ishe. ³³ "Dhangameni! Vingileni, muomu kumu dhivuka nhsimbu ya co. Dhangameni vi lingeni na ku lombela. ³⁴ Cina lifu ngue mumala a ya vungendhi, a tha njivo yendi na kuhaka mo ngamba uendi muku niunga njivo, nkala uoshe kuya navipanga viendi, nakushika muka kuniunga a kale nakudhangama. ³⁵ Ngoco vene kala naku dhangama mukonda kumu dhivuka nhsimbu vavenia njivo a keja kuimbo; kuatha vikale ku cinguedhi, mukati kavunhsiki, omo ndemba a tambeka, hamo ku cimene. ³⁶ Nga a keja thithumuku, keti umu tavethe aku uane una ndanda. ³⁷ Vije vinji nahandeka neni nji na vihandeka ku nkala uoshe: Vingileni"!