¹ Ngeci muva hetele mu Yelusalema, va kele muhiehi na Mbetefange na Mbetani ku mukinia ua Oliveta, keho Yesu ua tumine vandonge vendi va vali, ² ua va lekele nguendi , "Kayeni muimbo lia lihata netu. Mu muka kovela ngeci, mu kauana cindongi ci va jeneka kulonda lumo. Va ci vutuleni muka cinehe kuno kuli yange. ³ Nga umo aka mikuania nguendi, 'Vika muvi pangela evi?' kamu lekeni ngueni, 'Muene a ci yongola, naku ka cituma vuathi kuno kuli yange." ⁴ Va ile muvungendi naku ka uana cindongi vana cikutiya kuci kolo hanja mungila, va ci vutuile. ⁵ Vantu vamo vemanene haje naku kuaniene nguavo, "Vika evi vimu panga, kudhitula cindongi?" ⁶ Va vakuaniene ngue muava lekele Yesu, na vantu vaje va vecelele vaye nangila yavo. ⁷ Vanehele ci je cindongi kuli Yesu kumo na kuasha vintanga viavo ha cindongi, na Yesu ua tumamene ha cikeco. ⁸ Vavengi valele vintanga viavo hanhsi mungila, na vakuavo valele vimaho viva ka tetele ku vihumbu. ⁹ Vaje va hitile kulutue liendi nava vashuamene munima va tambekele nguavo, "Hossana! Va mushangale uje eja mu lidhina lia Kalunga. ¹⁰ Va shangale kuija kua vumuene vua ishe ya Ndaviti! Hosanna! Yaku hiana!" ¹¹ Keho Yesu ua kovelele mu Yelusalema ua kovela mutembele nakutala vioshe. Ngoco litangua te kanda li toke keho ua ile ku Mbetelema nava ndonge vendi likumi na vavali. ¹² Litangua lia ku shuamako muva tundile muMbetelema uo vuile ndjala. ¹³ Muku tala hale nendi ua muene citi ca mukuyu u li na vimaho viauo ua shueneneko na cithinganieka nguendi aka uanako vushuka, muku heta ku citi, ua uanene vimaho lika kukua kele vushuka. via kulia mukonda kuya kele nhsimbu yaco. ¹⁴ Ua kuaniene na citi nguendi, "Kutunda hano uahi a kalia vushuka kuli yove lalo." Na vandonge vendi va viuvuile. ¹⁵ Va ile ku Yelusalema, na ikeye ua kovelele mu tembele naku shandola vaka kulandetha na va kakulanda va kele mutembele. Uombangele metha via va ka kufuetetha milambu, na ku vipundi via va kaku landetha mavembe. ¹⁶ Uahi yetavethele mu kuambata vimo ku vije via kele mu tembele. ¹⁷ Ua va longethele na ku handeka nguendi, "Keti vana thoneka nguavo, 'Njivo yange va ka yitumbula njivo ya vi vundilo ku miyati yoshe?' Vunoni muna muna i puitha cipuku ca vidhi." ¹⁸ Vakuluntu vava sasendote vava ka kuthona mathona va viuvuile evi via kuaniene, navo vatondele ngila ya kumuthsiha. Kuli yavo va mu teuele mukonda mbunga yoshe ya yonguele vi longetha viendi. ¹⁹ Omo cinguedhi ca hetele, va tundile mo mu cifuti cije. ²⁰ Mukuenda cavo ku cimene, va muene muene cije citi ca mukuyu cinomu. ²¹ Petulu ua vulukile naku kuania nguendi, "Lambi, tala! Citi ca mukuyu cije ci una kathingile cinomu." ²² Yesu ua va kuaniene nguendi, "Thseleleni muli Kalunga. ²³ Vucili nji mileka nguange nga umo ueni a handeka ku mukinia ou nguendi, 'Tunda hano naku kaliumbila mu kalungandonga,' na ikeye nga ka kala na vihula mu mbunge yendi vunoni etave nguavo vije via nahandeka vika lingiua, ovio vikevio viatha kulinga Kalunga. ²⁴ Ngeci njimi leka nguange: Vioshe vimulomba na kuihula, thseleleni nguavo muna viuana, navikevio vika kala vieni. ²⁵ Nga muimana naku vundila, muomu kala kuecele nkala vioshe vi mua kala navio ku muntu, linga Ishueni ali muilu a miecele kuvi vulumuna viendi. ²⁶ Vunoni nga ku muecela na Ishueni ali muilu kaka miecela. ²⁷ Vedhile mu Yelusalema lalo. Yesu mukuenda kuendi mu tembele, vakuluntu vava sasendote, na vakuthona mathona na vakuluntu vedhile kuli yendi. ²⁸ Va muhiule nguavo, "Nandhili muka ukapanga nayo vilinge evi, neya ua kuhana mpoko yaco yaku vipanga?" ²⁹ Yesu ua valekele nguendi, "Njimihula cihula cimo. Nji lekeni nange nji ka mileka nguange na nandhili muka nji panga vilinge evi." ³⁰ Kumbuitika ca Yoano kuli iya ca tundile muilu ndi kuvantu?" Nji lekeni. ³¹ Vali liuvuathanene hakati naku handeka nguavo, " Nga tu kuania nguetu, 'Kutunda muilu, a ka handeka nguendi, 'Vati kumua vithselelele?' ³² Vunoni nga tuhandeka nguetu, 'Kutunda kuvantu,' vaka tuasha mavue. Vakele na liova ku vantu, mukonda vantu vavengi va dhivukile nguavo Yoano kapolofeto. ³³ Keho vedhile naku kuania nguavo, "Kutuidhiva ko."Keho Yesu ua valekele nguendi, "Nange kunji mileka nguang na kuiko kuka tundu ndhili yange mukupanga evi vilinge."