Capitulo 5 Heko kyamba ia hetashu jyroja
1
Hãrã ã'ē ñaiñono heko kyamba rãimi shara jairoja ñaī Kristoverã ñandy Hesukristo rupīi.
2
Hesukristo rupīi ñande japityma. Ñande ru jyparekokue me'ēa rei jairoja herã rupīi tantama ñaihe harã javy'a japity ñaiverãve Ñanderu Tumpa heko himbipeva.
3
Haēa vokaveī ñoitē. javyajyve porãmaba jahasa ñairã. Shara jaikua kavi jahasa ñairã'iaha nande ñaharõ kaviverã.
4
Harã ñaharõ kaviverã ñanymy kyrey opaī jajepy kavi heverã, hama jajepy kavihe ÑANDOPYVARÃ puãve oho ñande ñahãro.
5
Ñahãrō heva, Ñande ru Tumpaivi mbava pēã mbytavy hai, shara Ñande ru Tumpa jypareko MYNEHYSHI ñandy pyape jyhaihu opaite kova mbai mē'ēha ñande Espíritu Santo rupii.
6
Hesukristo ranga manoma ñandymbai porãmba vekuare. Hai jy'ara petei Ñande ru Tumpa pyhyrõshu vekua rãimi.
7
Añeiteva hasy pente tapisha hapisha mano heverã heko kyamba vera reheape, teva imemba'ē sapy py'ai meva hykove mbai kavi verã.
8
Teva Ñande ru Tumpa heshaka ñande jyhaihu hai mano ñandy rehe, ajemai ñande ñaī mbai porãmba ipope.
9
Harã ã'ē ñañyñonoma heko kyamba raimī Ñande ru Hesukristo huvy rupiī, Hesukristo ñañymondo jepema jaheha porãmba ñandy rehe voka he'ise pīrimbivachehaka ara opavape.
10
Ajemaī nande ñaiñymbyvaishu tē hevekua Tumpa Hesukristo ñymano rupī tuu hynonde ñainiñonojy kavi, shara Ñanderutei mbykykovejyshu Hesu mano vekuare mbyteivi harã haipo ñanumūpūajyvekui manovare mbyteivi, hai ñandohemba ñaime ñoiverã Kristo handi haereka Ñandeja Tumpa handi vate arape.
11
Ha'ēa ha'eī vokava, ñambyvyajyve Ñanderu Tumpa Ñandeja Hesukristo rupii shara Hesukristo rupi jaiko kavijyma handi ñandapovekua Ñande ru Tumpa.
12
Pente kuimbai Adan rupīi iche mbai poramba opavare hykovepe vokava mbai porãmba rupīi opavare mano ñoíverãjy haereka opavare ñymbyheko poramba'iavetajyve.
13
Harã mbai poramba ikomaimba ko yvy'iãre ndeiteri Moise jykuatia mēera kuaaha mbava rãimimba mbai poramba vekua Moise jykuatia mbyparaha vãhepeve.
14
Adan vive haereka Moise peve ñymano jepymba he reta ñymbyheko porãmba' iave, ajemãi mbai porãmbaveite japombatea, Adan mbai porãmba'eíteve japoarãmi, Shava Adan ovamba tynondeite ouverã haimi.
15
Ñande ru Tumpa jyparekorãnga meē Hesukristo meēva, hara kova ha'eã Adan rãimivekua, Adan iñee rendu'ãkue opavape verushu ñymano, Hesukristo mēe reiva katy opavape vereshu tykove añeteva Hesukristo rãnga, Ñande ru Tumpa mēe reiva tivishava opavare pevarã.
16
Mbai porãmba ou pente kuimbai ruiī, tevã kyrãã Ñande ru Tumpa mēeva jyparekokue rehe, haivi oumba hetaiteve mbai hetaiteve mbai porãmba japo iverãre pevarã, Ñande ru Tumpa ñunupa pohyva oumba ñande pente ñymbai poramba'ia rupīi, hai vera ñymano, teva Hesukristo mēva ñandohe mbai porãmbavaivi haivi ñanymby heko kavi.
17
Kyrã pēnte kuimbai Adan ñymbai porãmba rupī ēma opavare ñymano jepyhe verã ipe irū kaimbai Hesukristo rupīi katy opavave hipity ēvare Ñande ru Tumpa mēereiva haereka ñymbyheko kyamba imema tykove ñymbaikatu añeteva ipe, harã Hesukristo handi ēepo ko yvy tivishakuepe.
18
Pente kuimbai Adan rupii opavare oa ñymano jepyheverave ipe, harã irū kuimbai Hesukristo rupīi opavave hipityjy oho jepeva ryheva, vokava ranga hai tykove opamba verã ryheva.
19
Pente kuimbai iñe rendumba rupi opavare ñybyheko porãmba, harã pente kuimbai iñee reduva rupīi opavare ñymbyheko kavi jyrojamarã.
20
Moise mbyparavekua mēēhamba heshaka verã mbai porãmba jepyheva haereka opavare hykove mãmbaíva, ñymbyhetave ohoshu haivi mbai porãmba ñymbyhetaverã Ñande ru Tumpa ñõhe jyhaihu haereka jypareko mynyhejyshiverã mbai porãmba jepyhevekua.
21
Mbai porãmba tynyheva rãimi tenta ouvare hykove, veru'ēshuva ko ñymano, kyrã Ñande ru Tumpa jyhaihu mbyposhy ñymano jepy'õ opa mbyheko ky'ãra joherã mēe ñande tykove opamba ryheva Ñandeja Hesukristo rupīi.