¹ Kova mbaijyrã ahēndu kuaretare ñymbaty'õpe rãimi ara vatepe heiva: Aleluia, kova jahajepeva haikaviteva ryheva haereka mbaikatu ouva Ñanderu Tumpaivi. ² Ha'ima katu mbaivachekui hekope kavi haereka añetevape. Hai teiva mbyvachemba taupe heko porãmbava, ñymbai vekua ko yvy iãrē'o heko porãmba rupii. Ñanderu Tumpa myngovia jao porãmbava, ipo rupii ñohē vekua Ñanderu jokuevare huvy. ³ Hai heijy: Aleluja. Hãrã voka taupe porãmba hata hatãntikue jupi vate ara ñymbaty'ovive opaite ara ñymbatyha'ē vērãpeve. ⁴ Akuarãmeãra opaite 24 (karai) kuakuavare haereka opaite vapy omombai vasu verã Ñanderu Tumpa, vapyva vapysepya, hãrã hei reta: K^yrãpokui, Aleluja. ⁵ Hãrã vapyha'õ vasuivi ñyhēndu pēnte ñēē ipuvarã heiva: Pemombai vasushu Ñanderu Tumpa, opaite jokuevare pykyjeshiva retaivive, mishiva haerek tivishava. ⁶ Akuarãmeãra ahēndu hēnta'õre iñēē ipuva rãimi, ko yyvasu mbyhy'apuva rãimi haereka h^ynãtu hy'apuka rãimi, heiva: Aleluja! Mondojepeva Ñanderu, Ñandeja ñymbaikatuva. ⁷ y'a haereka ñandyrorypo, ñambyveteshu vãhēma ouva rehe avisha ray (Hesukristo) õmendarã jy'arape, harã hyrekorã ( iglesia) opama oīkavi reta. ⁸ Hãrã mēēshu reta monde verã mondeava pyrēriva hepyva, tīī kaviva haereka himbipevape. Vokava (Lino) tarapo pyrēriva rãnga mitīi kavishu he'ise opa heko kavi jyvacheva. ⁹ Hãma vate araivi jokuehava hei'ishe: Mbypara: Vy'aite reta opaite henõhavare, voka avisha ray omendarã jykaru vasu pevarãpe. (cena) Hãrã hai heiveshe: Kova Ñanderu Tumpa iñēē rãnga ãnete haereka opañoi amapo ikakui. ¹⁰ Hãma she yvype a'arã aiñesu hynõnde vate araivi jokuehava amombai vasushu verã, tēvã hai heishe: Avy japo, shee rãnga jokuehavãi jyve, nendie haereka shyryvyre hāndi, haereka opaite yngavere mbeuva jyve Hesukristo ( juruivitei haereka hykove rupii) hokava Espiritu ãneteva mbyhasa Hesukristo iñēē tupaoretape. ¹¹ Haivi she, Juan ahesha ara vatepy jypearã haereka koo ou pēnte kavaju tiiva harã vapy'iheva mbyhee Heko kaviva (fiel ) haereka Añeteva, Hai rãnga hekope kavi pirimbivache haereka nyrarõ'ē. ¹² Hãrã hesare tata hēndyva rãimi haereka ñakare ñonopaveī takare ñonoava verava (corona), hee mbyparahama, mba'ety kuaava koñei Ha'eī kuaa. ¹³ Hai ñymonde pēnte ponshope turuvypy joheava haereka hee mbyparahaheva: Ñanderu iñēē. ¹⁴ Hãrã opaite syndarore (ejercito) vate arapy'o oho hãndi kavaju tīīva īãrē, ñymonde mondeava pyrēriva mãshyãva, tii kaviva haereka kyambava. ¹⁵ Hãrã juruivi õhē kyse puku hakuava haereka haimbeva kutu verã kuaretare ( oñemoihevare ) , Hesukristo mondojepeposhu reta varija hierovi japohava. Hai teiva poshyvape pyrõhe uva i'akuere Ñanderu ju'uva ñamiha'õpe, hãrã Hai ho'ukaposhu retakui Ñanderu, hoka ñymbaikatuva pohyiteveva ryheva (vino ) uva tyykue. ¹⁶ Hãrã ñyponsho hareka ku'a jokuakapy mbyparahahe hee: Mburuvishare Juhuvisha hareka karai vasure Ija. ¹⁷ Hãrã she Juan, ahesha pēnte ara vateivi mbouava ñymboy'ēvã kuarasypy, hareka h^ynãtu sapukeshu opaite vyrare arare vevevarã hei: Pei hareka pimbaty Ñanderu jykarupe. ¹⁸ Peu verã tēntape'õ huvishare ho'o, syndarore ñymbatyva ho'o, pyrãtaveva ho'o, kavaju ho'o, haereka kavajure īare ho'o, jokueharea hareka haimbaa jokueharea ho'o, mīshiva hareka mãre^yva ho'o. ¹⁹ Hãmã ohesha hokava mymba, tēnta juhuvishare haereka syndarore mbotyvape, mbotyhama ityha verã kavaju tiiva īãrē hareka syndarore ñymbatyva īãrē. ²⁰ Hãrã pysyha hokava mymba hareka hokava Tumpa iñēē mbeu'ia japuva, ( profeta ) opaite mbai heshaha verã japova, mbytavy verã hēnta'õ retape, yvare īmēreva para ( marca ) hareka ipope, harã omombai vasushu reta hokava mymba ha'angape. Kova mõkue momboha mbyhy koveha ryheve hotava yyvasu (lago) , tata haereka azufre hēndy'õpe. ²¹ Hãrã opaite yngavare ñymbatyva retape ijuka kyse pukuva rupii, õhēva kavaju īãrē'ia juruivi, hãrã vyrare opaite h^yvãta ho'okueivi.