¹ Haima ahendu ijetava aheva Ñanderu Tumpa hoo vasuivi ñẽẽ 7 tumpa jokueva hama hei: Pekua pakuava yvy'iare 7 y'a tynyheva Ñanderu tumpa poshykue. ² Haima oho pente Ñanderu Tumpa jokueva ñohe vẽrã jy'yaivi ko yvy'iãre, opaite tentavare iãrẽ, imereaivive mymba para, maira ta'anga mbyvete'ia, õhẽpo hetere mba'asy põrãmba. ³ Haima Tumpa jokueva mõkue hea, ñohẽ jy'iavirã yvasurerã ikoshi turuvy haima opaite yvasuoy'iare opa mano ypy. ⁴ Haima vate jokueva mbahapy hea hakuara ysyryre hareka ysayva opa ikoshi turuvy. ⁵ Haima ahendujy vate jokuehava y ñyngareko'ẽhe vẽrã hei: Nde ranga hai hekope kavi rĩpĩrĩmbivacheva, nde hai heko kaviva, nde rĩmereĩva, nde hekope kavi rimbivachereta. ⁶ Haire ñohejyre hykove kaviva hareka Tumpa iñẽẽ mbeu'iare (profeta) huvy, nde jyve rymbyho'uka reta turyvy, nde rymyngoviajy kavi poramba japovekua. ⁷ Haima She Juan ahendu mymba jukaha hendaivi (altar) heiva: yrẽĩ nde yreja Yreru ripirimbivache hekope hareka añeteva. ⁸ Haima aravatepe jokueva urundy hea hakuava jy'yaivi kuarasy'iãrẽ, haima kuarasy hatakue opa hapy yvy'ĩãrẽ'õrẽ. ⁹ Haima haire ajema opa oke reta, mbasỹa põrã ikojyrerã, haima mbyveteã haireta Ñanderupe, poshy hareka porã ijeta jyrehe Ñanderu Tumpare hai imereva mbai katukue kova mbai rasykuere. ¹⁰ Haimajy aravatepe jokueva pandepo hea akuava jy'yaivira hoka mymba vapykavasure haima opa timimbi hai ireino ẽvãpe, haima opaite yvy'ĩãrẽ'iare opa shu ĩnkure. ¹¹ Kurũ põrãmba hasyte shuare, mbasyã ijehe reta'iko kavia retara haima poĩa japoreta, ijetaporã jyhereta Ñanderu Tumpare. ¹² Haima aravatepe jokueva 6-hea hakuava jy'ya ysyry'õ Eufratespe y opa typa kyra ñymyhẽvãha pee kuarasy oheaivi tenta huvisha reta pevãrã. ¹³ Haima she Juan ahesha õheva tivasu juruivi, hoka mymba juruivi haimajy mymba ñẽẽ mbeu'ia juruivi ohe mbahapy mbai põrãmba kururu ovava. ¹⁴ Kova ranga hai mbaiposhy Espiritu põrãmba japova mbai heshaverã haikaviva opaite huvishare hynonde mbaty ñyrãrõ vẽrã Ñanderu Tumpa handi mbaikatukue pyĩĩ'ia arape. ¹⁵ Ñymo'ã she Hesu aijypo mañarõ'iarãĩmi horypokui shy'ãrõ'õ hareka mondea ñyngareko'ẽ hea, potã nani, te'irã, heshahara mãrãpokui. ¹⁶ Haima akua mymba mbatypo tenta huvishare pente hendape ñy mbyhevera Israelvare iñẽẽpe Armagedon. ¹⁷ Haima aravate jokuevaha 7-hea hakuava jy'ya yvyture rã ohe ñee Ñanderu hoo vasuivi, vapyka vasuivi heiva: Opama iko. ¹⁸ Haima vera, ñee hetava, hy'apu hareka yvyvryry hynatu, kyraã teri iko kuimbaire hareka taupere iko teri yvy'iãrẽrã. ¹⁹ Haima tenta vasu Jerusalen ñymbija'õ mbahapy hendape haima tenta yvy'iãrẽ'õre opa jasuru, haima Ñanderu Tumpa manduahe Babilonia aryka'e tẽnta vasukuere mbyhõ'uka verã jy haro poshyva ryheva. ²⁰ Kyrãra opaite ysyryre, yvasu pãũpe'õre ope kañi haima yvy turusure jykuavema hai. ²¹ Haima amanda vasu 40 kilo pohyva oa aravateivi tenta'ovare'iãre. Tẽvã hai'iãrẽve ijeta porãhe, hai mbouvarehe ko mbairasy tivishaiteveva ko yvy'iãrẽ.