¹ Pee haiva Ñanderu Tumpa tay reta hai haihuiteva, piñahãpo pyndyreko haikavi hai raĩmi. ² Piko jyhaihuvape Kristo ñandy raihuva raĩmi. Kristo hykove meẽ ñandy rehe vekua, pẽnte avisha ray jukava raĩmi haere mẽ eãva Ñanderu Tumpape pishe katuva. ³ Pee rãnga Ñanderu Tumpa ña ãpova reherã, pinjeta mbate verã jyrekova mbai kya porãmba ryheva rehe, ti opai marãrã gãtuva ỹnga mbai kyava haereka mbai pota porãmba ryheva rehe. ⁴ Avy pere mbai pyrỹ mymarãva, ti mbaimba vekuarẽĩ, ñeẽ porãmbava, kova mbai rãnga porã; kỹrã te verã pemombai vasupo jyveshu Ñanderu Tumpa. ⁵ Pikuaa kavipo jyve kova: Ime ẽ iko ijupiva ndeiteri jyrekova ryhe verã, ti japo mbai kya porãmbava, haereka mbai pota raiviva haykue varã (haijyve ko ta ãnga pẽĩ omombai vasuva); hipityãpo mbaivape Ñanderu Tumpa haere Kristo ẽvãpe. ⁶ Avy mbava pyny mbytavy ñeẽ reivape, kova mbai rehe rãnga verupo Ñanderu Tumpa ñunũpa pohyiteveva opaite ñeẽ hẽndumbava ĩãrẽ. ⁷ Avypo pee ĩmepyre jyve hãndi, mbaivaĩ hai reta. ⁸ Pee rãnga pikopii pỹtũape arykai, ã'ẽ katy Ñanderu Tumpa hãndima piko sapevape; himbipe vape mapo piko, ⁹ voka sapevaivi rãnga õhẽ mbai haikaviva, heko kaviva haereka ãñeteva. ¹⁰ Piñyhãã pikuaa mbaivarapo mbyvyashu Tumpa. ¹¹ Avy pee pihia mbai ma ẽrãmba japo ia reta, haereka Ñanderu Tumpare jyroja mbare iko raĩmi; pikuaaka jyve opavape mbai porãmbape jyrerã. ¹² Rynotĩã jai rei terã ko hai reta ñemiapẽĩ japo; ¹³ jaikuaaka opa maĩnunga porãmbavarã, katu ara peva raĩmi sãkãvape ijykuaa, opaite kỹrã heshaka kaviva rãnga hai sapeva. ¹⁴ Vokava rehe rãnga heiha: Sareko nde reche rẽĩva. Puã mano vare pãuvi hãrã Kristo sapepo ndyrehe. ¹⁵ Hãrã, pymaĩ kavi mãrãrapo piko, tẽvã avy piko kuaamba ia reta raĩmi, piko jyve mbai kuaa ia raĩmi. ¹⁶ Pipory kuaapo voka ara jave pevape, shara porãã ko ara ouva. ¹⁷ Avy piko mã ẽrãmba ia raĩmi, pikuaapo jyve mbaivara Ñanderu Tumpa pota. ¹⁸ Avy pykau pii, vokava rãnga porõhũndi, pynytynyhẽ jyve Espiritu Santo. ¹⁹ Pinjeta ijupiirã pypory ñeẽ ouva Salmovi, haereka heta mbyrahe vate arapy õvã rupii. Pypyrahe haere pemombaishu pyndy pyaivive Ñanderu Tumpa. ²⁰ Pymeẽshu opa arape pyndy vya, Tumpa Ñanderu, Ñandeja Hesukristo heepe. ²¹ Hendu kavi haereka japo pyndy ryvy reta ñeẽ kavi, mbeuha peva Ñanderu Tumpa jyhaihupe. ²² Voka tyreko reta kỹrẽỹ ñoipo japo ĩme ñeẽ, Ñanderupe raĩmi. ²³ Haima teme reta hai tỹrekore ñakã, Kristo hai ñakã tupaore raĩmi. Kristo rãnga jyve voka tupaore mondojepe verã, vokava tupaore hai hete; ²⁴ hãrã voka tupaore ẽẽva raĩmi japo kavipo Kristo ĩñẽẽ, kỹrã jyve tỹreko reta japo ñoipo jyve ĩme ĩñeẽ. ²⁵ Voka teme reta tyhaihu kavi tỹrekope, Kristo haihuva raĩmi jyve tupao retape, hãrã hai meẽ mano he verã reta. ²⁶ Hai mano vekua pya kavi verã ko tupao retape, johema hai ĩñeẽ kavi rupii yype joheava raĩmi; ²⁷ Kristo teiva veru ñono verã hỹnonde pẽnte tupao mimbi kaviva, hai reta heja verã mbai porãmbava, tẽvã kangymba verã jyve, tẽvã hai reta pya kavi verã, jaiko javata kavi hekope. ²⁸ Hãrã kỹrã teme reta haihu kavi ñoiposhu hỹreko, haihuva raĩmi jyve hete. Hỹreko haihu kavishuva, hai ijupẽĩ jyhaihu jyve. ²⁹ Mba'ety rãnga hete haihumbava, myngaru haere ñyngareko jyvehe, Kristo rãnga kỹrã japo jyve voka tupaope õre, ³⁰ ñande rãnga Kristo ryheva hete, japoava ho oivi haereka kãvẽivi. ³¹ “Ñanderu Tumpa jy kuatia ĩñeẽpe hei: Hãrã voka kuimbai hejapo tuu haereka ishy ñymy pentẽĩ verã ñimi ĩrũmarã, haivi mõkue õre ikoshi verã pẽntevaĩ hete.” ³² Mbai vasu tivishava ko kuaambava heiha ñande; hãrã shee hai pee tupaore haere Kristo. ³³ Kỹrãrã kate heise jyve, temere pyhaihushu pỹndy rekore, temere hete haihuva raĩmi; haereka tỹrekore hẽndu kavi ĩme retape.