¹ Tyray reta, pĩñẽẽ pyhẽndupo haereka pijapo poshu peru hãndi pesy hei peva piroja Kristo rerã, vokava rãnga hai hekope kaviva. ² Tumpa japo vekua tynonde õ japoa verã ryheva rãnga hai kova: “Japoshu nderu haereka ndesy hei ndeva, ³ ryvya haereka riko puku verã ko yvy ĩãrẽ." ⁴ Hãrã pee tuu reta, avy pijahe porããhe pyndy ray reta pymby poshy verã, pymby kuakua haere pymboi jyve pymby heko kavi verã Ñanderu Tumpa potava raĩmi. ⁵ Pee jokuearea reta, ñeẽ pyhendushu pindi ija ko yvy ĩãrẽ, jyhaihupe, pijapo hai hei peeva haereka pya kavi ryheve, jokuearea japo ia Kristo pevarã raĩmi. ⁶ Pijapo kavi maĩnunga mbe uape pijapo verã, ha eã pindi ija maĩ ẽ pyrehe rãmẽi haikavi pijapo pota haikavi pẽĩ hãndirã, Kristo jokuerea raĩmi jyve, pijapo kavi pyndy pyai vive Ñanderu Tumpa potava. ⁷ Pijapo kavi kỹrẽ ỹpe maĩ nunga pijapova Tumpa pevarã haereka ha eã kuaretatapyy potava pevarã raĩmi. ⁸ Pee rãnga pikuama Ñanderu Tumpa myngovia jypo jokuearea retape, haereka jokueamba rea retape maĩ nunga heta haikaviva japovekua rehe. ⁹ Hãrã pee karai reta, piko kavi pijokue pyrea reta hãndi, ñee ñyngãta mbaa ryheve. Pyny manduahe, pee hai reta raĩmi ĩmẽ'ẽre jyve pindi jokue ia pẽnte Ñanderu Tumpa vate arapy õva ĩmepyre, hai hỹnonde opaite vare pẽntevaĩ. ¹⁰ Hãrã ã'ẽ shy ryvy reta, piñimy pyrãta Ñanderu Tumpa mbaikatu rupii, ñymbaikatu hai pyrãtã kuepy. ¹¹ Piñimonde mondeava tãtãva Ñanderu Tumpa meẽpeva ñyrãrõ verã, pee Ãña oupo pyndy pyarãã, kỹrã rãpo pee tãtã ngãtu pẽĩ. ¹² Ñande ñairãrõã kuareta reta hãndi, ñande ñairãrõ jyve mbaiposhy reta arapy õre hãndi, ñande ñairãrõ mbaiposhy mburuvisha reta pỹntuvape ia, ñande ñairãrõ mbaiposhy juhuvishare vate arapy õre, hai reta mburuvisha ĩmere mbaikatu kuaretare ko yvy ĩãrẽ ikovare. ¹³ Hãrã, pymonde mondeava tãtãva Ñanderu Tumpa meẽ peva, pijepy he verã haere vãhẽma pee ara mbai porãmba Ãña ñono peeva, haivi opama pyhasa mbai porãmba varã, pee pyrãtãpe mapo pimepẽĩ. ¹⁴ Tãtã ngãtuapepo pẽĩ, japumbapepo piko pundu kua jokuaha kaviva raĩmi, haere voka teko kavipepo piko, ko syndaro mondeva tãtãva pitia jocha pyva raĩmi ñyrãrõape. ¹⁵ Pẽĩ kavi piñimĩñẽẽ verã Ñanderu Tumpa ñeẽ kaiviva pya vapy ryheva rehe, ko syndaro ẽẽ kaviva raĩmi mondema ipy ryhevarã. ¹⁶ Opa kova ĩãrẽ, ĩmẽpo pyre jyve piroja pyndy rete rykove jochava raĩmi, pymboveshi verã voka Ãña hu’y jyvyrapa hendy hetava. ¹⁷ Pyreko pãkãre jyve pynymondo jepe verã raĩmi pãkãre haere pypysy Ñanderu Tumpa ĩñeẽ ko kyse pukuva raĩmi; Espiritu Santo meẽ peva raĩmi. ¹⁸ Pijapo kova opava maĩ nunga jairure jaiva Ñanderu Tumpape, pimboe haereka pirure ñõĩpo Espiritu Santo rupii. Pingareko katu haere avy pyndy pya kangy, haereka pimboi jyve opaite Ñanderu Tumpare jyrojava retare. ¹⁹ Pimboi jyve shyrehe Ñanderu Tumpa tymeẽ shee ĩñeẽ, aĩnjetama aĩrã, katu ñoĩ jyroja katu vape ambeu verã Ñanderu Tumpa ñeẽ kaviva kuaamba ryheva. ²⁰ Kova Ñanderu Tumpa ĩñeẽ kaviva rehe rãnga shee shymondoha, mondohava raĩmi aĩmete aĩva peresope. Pirure katu shyrehe, taiĩnjeta kova ñeẽ kavivare akyjemba ambeu verã ryheve. ²¹ Tiquiko, shy ryvyre ahaihuva haereka ñany mbory iva, Ñanderu Tumpa pevarã mba'apoape, opapo pyny mbykuaaka kavi mãrãrate aĩme haere mbaivara ajapo aĩ. ²² Hãrã ajokue aĩ pee pẽĩvape, mbeupe verã marãra õĩha haereka pyny mỹkyrẽỹ verã. ²³ Ñanderu Tumpa Ñanderu, haere Ñanderu Tumpa tay Hesukristo tymẽ ñandy ryvy retape pya vapy haereka jyhaihu, jyroja ryheve. ²⁴ Hãrã Ñanderu Tumpa tohovasa opaite voka haihushuva Ñanderu Tumpa tay Hesukristo, jyhaihu opamba verã ryheve. Amen.