¹ She Pablo, aĩme aĩva presope Hesukristo reheape, airure pee piko verã hekope kavi Ñanderu Tumpa potava raĩmi, pee pyny renoa vekua. ² Avypo pimbyvete, pyndy pya hory ijupe. Avy pyndy poshy rei, pijypareko jyve, jyhaihupe. ³ Peñehã piko jipive pẽnte pyape ñoĩ, vokava rãnga ou Espiritu Santoivi, pya kavi rupii piñymy pẽnteĩ ijupi verã. ⁴ Ñande rãnga hai pẽnteva tyreteĩ haereka pẽnteva Espirituĩ, hãndi pẽnte mbai pyhãrõ peĩva Ñanderu Tumpa pynyreno vekua raĩmi. ⁵ Ñanderu Tumpa rãnga pentẽĩ, pẽnteva raĩmi jy jairojakue, haere pentẽĩva raĩmi jy ñymyngarai kue, ⁶ pentẽĩ ẽẽ hai Tumpa hãrã opa vare Tuu. Hai ẽẽ opava maĩnunga ĩãrẽ, japova haipotava opavare rupii haere ẽẽvã opava retape. ⁷ Hãrã, Ñanderu Tumpa meẽ pe petẽĩ ñande ñandei jajapo verã, Kristo hembiapo kavikueivi. ⁸ Hãrã Ñanderu Ñẽẽ hei: Jupijy vate arapy opa raha ijehe heta jokuaha vekua, hãrã kuareta retape meẽ mbaikaviva pota meẽrei vape. ⁹ Mbaivara he'ise kova “jupijyva”? Vokava he'ise tynonde vejy rãniva yvy ĩãrẽ voka kypeveva peve. ¹⁰ Voka vejyvekua rãnga Hesu, ha ẽẽijy jupijy vekua arapy haere ĩãrẽ vateve vape, hai opa mỹnyhẽ verã ijuhuvi opaiteva mbai ẽẽvã vive yvy ĩãrẽ haere ara retare. ¹¹ Kova hai meẽvã: Ĩmẽ'ẽẽ Apostolva, ĩrũ reta katy Tumpa ĩñẽẽ mbeu’ia, yngaa reta vee katy Hesu ñeẽ kaviva mbeu ivare, ĩrũ vee reta katy pastor haere pyrỹmboi'ia iva reta. ¹² Kỹrã japo kavi Hesu jyrojahe vare jokue verã Ñanderu potava, mbitivisha kavive verãre Kristo hete, ¹³ japity peve ñaĩ jipive verã pẽnte jairoja kuepe opa jaikua peve Ñanderu Raype. Haere iko peve ñandy hevi kuimbai javyje mava, puã kavivekua Kristo raĩmi. ¹⁴ Atẽñoma jaiko verã sanjay raĩmi, ñapoñy opavare jy koty, ñahendu shi verã mbai tykove mbai kuava japu ryheve pyrỹmboi iva, pyrymbytavy haereka pyryraha verã pee javy verãipi. ¹⁵ Haikavive rãnga jaiko jyhaihupe, haereka añetevare haykue jyve, jyvache ñapuã verã hekope kavi Kristo hãndi. Hai teiva rãnga tupao ñakã. ¹⁶ Ko tupao rãnga ẽ kavi haere ñimbivapy ijehe hãrã pepetẽĩ tyrete ryheva japo maĩnungarã, jyvache puã jypive haere puã kavi jyhaihupe. ¹⁷ Kova rãnga she hai peeva, haere airure peeva Ñanderu Tumpa heepe: Teñoma piko verã Tumpa kuaa mbashuva ikova raĩmi, pya mbinjeta ivare mbaimba vekua rẽĩ, ¹⁸ haere ñakã opa pỹntu shiva. Haire mba'etyre ko tykove ouva Ñanderu Tumpaivi, kuaã retaraivi haereka pya tãtãivi. ¹⁹ Hama ñynotiveama ñymeẽ tykove porãmbape, japo verã opa maĩnunga kyaava pota japoivĩ. ²⁰ Pee katy, kỹrãã pyhendu Kristoivi. ²¹ Pee rãnga pyhendu shi, haere pirojaherã rehe pynymboeha kavihe vekua, voka Hesu ryheva añeteva rehe. ²² Hãrã, pijiheja pyndy reko arykaiva ryhevaivi, haere ỹnteño piko arykaiva rãimi. Kyrã piko pirã rãnga opa piñymbai, pyma ẽĩhe mbai porãmba pyny mbytavy irã. ²³ Pee rãnga piñymby py ahupo pyndy rykovepy haere pyndy pyape, ²⁴ hãrã pymondepo tykove py ahu, Ñanderu Tumpa japovekua hekope kavi. Vokava heshahapo pyndy rehe, pyndy reko katu kaviape haere kyambape, hãndi ãñetevape pikorã. ²⁵ Hãmapo, ỹnteñoma piko jipive japupe, pere pepetẽĩ voka ñeẽ ãñeteva papisha retape, ñande rãnga opaite Kristo hete ryhevaĩ. ²⁶ Pee pyndy poshyrã, avy mbai porãmba pijapo; haere avy tiche jepe pyndy hevi kuarasy, pypoi pyndy poshy verã. ²⁷ Avy pymeẽshu Ãña ẽvẽrã pyndy rykovepe. ²⁸ Voka manarõ ivekua, ỹnteño tymanarõ hama tiñiñono tymba'apo, tijapo maĩnunga kavi ipo rupii imere meẽ verã ña ãporã haere meẽ verã jyve pavete'ia retape. ²⁹ Avy tõhẽ ñeẽ kyava pindi juruivi, pere jyve ñeẽ haikaviva hẽnduvare mykỹrẽ ỹ haere mbypya kavi verã. ³⁰ Avy pymbyvy ã pi Tumpa Espiritu Santo, voka Espiritu rupii rãnga Ñanderu Tumpa ñandy kuaa verã hai ña ãpovarã, hai opa meẽ peve; pee peho jepe verã ara japyape. ³¹ Pyheja opa marãrã gãture pya porãmba, mbai potakue, sapuke ryheve poshyrã hehei iva, haereka marãrã gãtu ñarõva. ³² Pyndy pya kavi pindi jipive, hãndi pijipareko haere pyhejarei ijuhuvi mbai porãmba pijapo vekua, Ñanderu Tumpa hejarei ñandy heviva raĩmi Kristo rupii.