¹ Hãrã she Pablo, aĩmevã peresope Kristo Hesu rehevape, pee Judio mbavare. ² Shara pyhẽnduma mba amo Ñanderu Tumpa pya kavi meẽ sheva amba'apo verã pyny pãũpe. ³ Tumpa kuaaka sheva voka maĩ nunga ha ẽĩ kuava haereka marãra ambyparavaraĩmi peva koĩpĩĩ. ⁴ Hãrã pimbi jentãrã pikuapo pymondo aikuaava voka Kristo ryheva kuaaha mbava. ⁵ Voka kuaahaka mbava aryka'e vare jy ara retape, ã'ẽ katy Ñanderu Tumpa heshaka ijapostol haereka Tumpa ĩñẽẽ mbeu’ia heko kavi retape Ijespiritu rupii. ⁶ Hãrã kuaaha mba vekua hai kova: Ñanderu Tumpa ñeẽ kaviva rupiipo vokava Judio mbavare hipityvajyve, pẽnteĩvã raĩmi voka Judio vare hãndi jopeha verã, hãrã hai reta jyve tyrete ryheva, hama hipitỹi jyve Ñanderu Tumpa ĩñẽẽ hejava Kristo Hesu rupii. ⁷ She Pablo, Ñanderu Tumpa japo shyhevi jokue verã ambeu verã hai ĩñẽẽ. Ko tembiapo Ñanderu Tumpa pya kavi kueivi meẽrei sheva, hai ñymbaikatu rupii. ⁸ She, shi mishĩĩ veva opaite Ñanderu Tumpa ña ãpoaĩvĩ, tẽvã hai meẽ she ko tivisha mba ẽrã araha amyhỹrãkua verã mbaikaviva Judio mba retape haere aĩnjetashu verãre ñeẽ kavivare voka jaiko katukue Kristore. ⁹ Hãrã hei jy she ambeu verã opava retape mbaivara Ñanderu Tumpa reko vekua, kuaaka mbava rehe arykairã vive. Ñanderu Tumpa japova opava maĩ nunga. ¹⁰ Ã'ẽ katy Kristo hoo rupii, opava voka arapy õre ruvisha opapo kuaa marãra Ñanderu Tumpa arãndu jykuaka opava maĩ nungape. ¹¹ Tumpa japo kỹrã japova raĩmi opava ara, hãrã japo Ñanderu Kristo Hesu rupii. ¹² Kristo rupii katu ñavãhẽ Ñanderu Tumpa ẽvãpe, jakyje mbape jairojakue hea ryheve. ¹³ Hame rãnga she airure pee, avy pyñymykangy ko she ahasa asy aĩ pyreheva, kova rãnga hai mbai tivisha veva pee pevarã jyve. ¹⁴ Hãrã she, shy nypyã ajatyka Ñanderu Hesukristo Tuu hynonde, ¹⁵ hai rãnga opavare Tuu añeteva ryheva, ẽvã vive ara retare haere yvy ĩãrẽ. ¹⁶ Airure Sherupe meẽpe verã ñymbai kavi kueivi pee mbaikatu haere pyndy pya mypyrãta verã Espiritu Santorupii. ¹⁷ Hãrã she airure Kristo tiko pyndy pyape, piroja herã rupii, haere pirojakue tiñy mbyhapo pyrãta hãrã tiñi mbitivisha kavive toho; ¹⁸ kỹrã rãpo pikuakui opaite Kristore jyroja vare hãndi, vokava Kristo jyhaihu pukukue, tivishakue, vatekue hãndi kypekue. ¹⁹ Katuma opaĩ jaikua verã, kỹrãrapo opa pyny tynyhẽkui Ñanderu Tumpa jyhaihu ryheve. ²⁰ Hãrã ã'ẽ, toñemombai vasu Ñanderu Tumpa ñymbaikatuva japo verã hetaiteve voka ñande jairureva ti ñamoã tẽvã, hãrã ñymbaikatukue rupii japova mbaikavi, japo ñandy pyy. ²¹ Toñemombai vasu Ñanderu Tumpa, (Iglesia) hermano reta haere Kristo Hesu rupii, opa ara japymba haereka opa ara pevãrã! Amen.