¹ Ñanderu Tumpa rãnga pynymynguerajy, ĩrũ arape pymanoma vẽkua raĩmi pyndy reko porã hareka heta mbai porãmba vekuape, ² pee pikovekua mbai porãmbape, piko kuaretare heko porãmba iare raĩmi, pijapopi espiritu Aña ruvisha ko yvy iãre ikova potava, hareka reko ipope opaite Ñanderu Tumpare jyrojambavare. ³ Opaiteore kỹrãikoha jyvearyka'e, ikohaiyry retehare kayrypyape ñanduva raĩmirã. Yry roo potava japoha ĩrã hãrã ẽ ore Ñanderu Tumpa ity ỹreãrẽ verã ñunupa pohyva, ỹngavare japohea raĩmi. ⁴ Tẽvã Ñanderu Tumpa ñandy parekoiterã hareka ñandyraihuiterã, ⁵ ñanymynguerajy handi Krito, ñamano teritẽvã mbai porãmbape. Kỹrãtẽvã Ñanderu Tumpa pyryraihurupiipehojepe. ⁶ Hãrã Ñanderu Tumpa ñanymynguerajy handi Krito hareka ñany mbyvapy handi vate arapy hai mburuvisharã ẽvãpe. ⁷ Kỹrã japo heshaka verã ara ou verãpe marãra hai ñandy raihu hareka ñandy pareko Krito rupii. ⁸ Pee rãnga peho jepe Ñanderu Tumpa pyryhaihu rupii, shara piroja herã. Kova mbai ha eã pei pijapova vekua rupii, Ñanderu Tumpa meẽva rãnga. ⁹ Ha eã rãnga pẽnteva mbai japova rupii, hãrã mbaveãpo jyroja i ijehe vokava rehe. ¹⁰ Ñanderu Tumpa rãnga hai ñandapova, hãma ñandapo ñanymy pẽnte hãndi verã Kristo, jajapo verã mbai haikaviva hai ñono ñany nonde aryka'e. ¹¹ Hãrã pymandua he marãra pee aryka'e. Ha eã pee aryka'e Israelpe õre: hãrã Israelita vare hãkue pire hekyva kuimbai heteivi, haire ñymby heva hãkue pire hekya shia, pee ny pynymby hee reta hãkue pire hekya mba shia. ¹² Voka arape pee pime arykai Kristo mbape haereka ha eã vaĩjype Israelita ryhevare, Tumpa ĩñẽẽ meẽ vekua pindi pityãpee haereka hai hei vekua meẽ verã. Piko mbaimba pyhãrõvã haereka Ñanderu Tumpa mbape. ¹³ Tẽvã ã'ẽ, pimboja Kristo rerã, pee pimẽ pẽĩ vekua mbyry Ñanderu Tumpaivi ã'ẽ mbyry veama pẽĩ Kristo huvy rupii. ¹⁴ Kristo rãnga hai ñany mby pya symyĩva, Judio haere Judio mbava retaivi japo shi pẽnte tẽnta, shara hai opa ityka jochahava Judio haereka Judio mbava pãũpe ivekua. ¹⁵ Hete teiva rupii Kristo mby opa Moise ĩñe ẽkue reko vare japoava haereka japoa verã, hãrã japoshi mõkueivi pẽnte tẽnta py'ahuva ñymy pẽnte hãndia rupii. Kỹrã pẽnte pyape ñani ñono. ¹⁶ Kỹrã Kristo mano rupii kurusure, heky ijeshatamba vekua mõkue õre mbyteivi, hãrã japoshi pẽnte tyreteĩ, haima mbi ikoka kavijy hãndi Ñanderu Tumpa. ¹⁷ Kristo rãnga ou mba mbeu ñeẽ haikaviva, veruva pya kavi opava retape: pee pevarã Judio mbavare mbyry pẽĩva Ñanderu Tumpaivi, haereka Judio vare mbyry mba ẽshiare Ñanderu Tumpa. ¹⁸ Hãrã Kristo rupii opavare ã'ẽ Judio haereka hai mbavare, katuma ñavãhẽ Tuu ẽvãpe pẽnte Espiritu rupii. ¹⁹ Haima pee haiveama tẽnta mbyry vare jy yvy mbape, pẽnte tẽntaĩma jyve pee Ñanderu Tumpa ña ãpovare hãndi. Pee rãnga hai jyve Ñanderu Tumpa hẽnta ĩrũre. ²⁰ Pee rãnga hai oo mupũ ãhãva oo jypy apostol haereka Tumpa ĩñẽẽ mbeu’iare ñono vẽkua, hãrã Hesukristo teiva hai ita oo jypy pyrãta veva. ²¹ Kristo rupii rãnga oo opa kavi oja ijehe, puã oho iko shi verã pẽnte tupao haikaviva oja kavi heva Ñanderu Tumpare. ²² Hãrã Kristo rupii opavare pejahe, hãndi iko pyhevi verã pẽnte tupao Tumpa Espiritu ikopy verã.