¹ She hai Pablo, Hesukrito apostol Ñanderu Tumpa potava rupii, ambypara amarãndu ko kuatia ñeẽ rupii opaite tenta Efesope iarepevarã, Ñanderu Tumpa pyhyrõ hareka jyrojahevare Hesukrito. ² She airureshu Tumpa, Ñanderu hareka Ñanderu Hesukrito, tymeẽ pee pya kavikue hareka pya symyĩpe pẽĩ verã. ³ Toñemombaivasu Ñanderu Tumpa, ÑandejaHesukritoTuu,shara hai ñono ñandypyape mbai haikaviva vate araivi ouva Krito rupii. ⁴ Ñanderu Tumpa rãnga ñany pyhỹrõ Krito rupii, ko yvy haere ara ndei teri ẽrã, jaiko verã heko katupe hareka mbai porãmba japomba verã hỹnonde. ⁵ Ñanderu Tumpa ñandy raihuiterã aryka'e vaĩ ñany pyhỹrõ, jaiko verã ta yraĩte Hesukrito rupii, shara kỹrã japo ikoshu verã hai potava raĩmi. ⁶ Hãrã ñamombai vasu ñoiposhu Ñanderu Tumpa shara tivisha ñandy raihu, hai ĩãrẽve meẽ jy ñande mbai haikaviva Tay haihuva Hesukrito rupii. ⁷ Hai rãnga hejarei opa porãmba ñande jajapovekua, Ñanderu Tumpa Tay huvy iñohẽ rupii, kỹrã japo hai ñandy raihuiterã. ⁸ Ñanderu Tumpa ñany mynyhẽ jyhaihukuepe, meẽ ñande arãndu hareka mbaikuaa, ⁹ haere kuaaka ñande hai potava kuaaha mba vekua, hai tei pota japova raĩmi Krito rupii shara kỹrã maĩ hai potaivi iko. ¹⁰ Jy ara vãhẽmarã Ñanderu Tumpa opapo mbatyhe Kritope, opaite mbai ẽvã vate arapy hareka yvy ĩãrẽ õre. ¹¹ Ñanderu Tumpa rãnga arykai ñany nohẽ teko porãmbavaivi ta yrã, ñanymy penteĩ verã Krito handi; Ñanderu Tumpa opa japo hekope kavi hai potava raĩmi. ¹² Kỹrã japo pota ñande Judiore rãni tynonde jairoja heva Krito, ñamombai vasu ñoĩ verã tivishava ñymbaikatu. ¹³ Hãrã pee jyve Judio mbava pyhendu jyve ñeẽ añeteva, ñeẽ mbaikaviva pyny mondojepe verã ryheva, haere pirojahe Kritorã, Ñanderu Tumpa ñono pyndy pyape Espiritu Santo pynymy ha ãngama pyndy kuaa verã Ñanderu Tumpa ryhe varã, hei vekua rãimi meẽ ñoĩpo. ¹⁴ Ko Espiritu Santo rãnga tynonde mẽ ẽha ñande my ãñete verã voka pota japityva, voka arapejapyape Ñanderu Tumpa opamondojepeverãhairy hevareta. Ñamombai vasu verã Ñanderu Tumpa shara ñypyrãta tivishavekua. ¹⁵ She ahendu marãra piroja katu pi heva Ñandeja Hesu, haere pee pyhaihushu Ñanderu Tumpa ryhevare handi, ¹⁶ opa ara she ãmyvãhẽ shy pya horykue Ñanderu Tumpape pyndy rehe, hãrã airurerã shy mandua ñoĩ pyndy rehe. ¹⁷ She airure Ñandeja Hesukrito Tumpa, Tuu mbai vasuvevape, tymeẽpe mbai kuaa pende Espiritupe pikuaa kavive verã Ñanderu Tumpape. ¹⁸ Airure Ñanderu Tumpape tysapepy pyndy pya, pikuaa kavi verã mbai pyhãrõ verãra pynyrẽnohã, haere marãra Ñanderu Tumpa tivisha meẽshu mbai haikaviva hai ryhe vare, ¹⁹ hareka marãra ñymbaikatukue tivisha opait maĩnungare hehãrãmba'etyñimbi vacheheverã, mba'apova ñandy pyape ñande Kritore jairojava. Kova mbaikatu rupii japo Ñanderu Tumpa heshaka verã pyrãtãkue ryheve, ²⁰ Tumpa mupuã jyma Krito manovare pãũivirã, vapy handi verã jakata kyty vate arapy, ²¹ Ñanderu Tumpa ñonoshu Krito mburuvisha vasu vateve ĩãrẽ, opava mbaikatu espiriture, haere mburuvisha reta rehe, ã'ẽvãre handi kotyi vive ou verã. ²² Hai ñono opava maĩnunga Krito ipope, hãrã Krito teiva hai tupao ñakã. ²³ Ko tupao rãnga hai Krito hete, hãrã Krito teiva opa mbaikavi tupaore mynyhe.