¹ Ã'ẽ shy ryvyre, Ñanderu Hesukristo oujy verã ryheva, haereka ñañymy pẽnte hãndiva pyy jurureha pee, ² avy pyma ẽĩhe mbava pynymby tavy ti pyny myngyjekui hei pee vãhẽ mava Ñanderu oujy verã. Ĩme po ẽ moã ore he iava Espiritu rupii, ñimi ñe eã vape ti kuatia ñee rupii. ³ Avy pyma ẽĩhe mbava pyny mby tavy. Voka ara ndei teri vãhẽrã, ikopo ñymby vaisho vasu Ñanderu Tumpare, hãrã oupo tykove Ãña õñe hundi verã. ⁴ Vokava tykove ãña, ñymby vaishova opaite Ñanderu Tumpa hee rahava ti õñemombai vasu verã, ñonopo vapy pya Tupaope, haereka hei po ijehe haiva Tumpa. ⁵ Pymandu ãra he kova mbaire aĩjeta he perã vẽkua, aĩ penendierã? ⁶ Hãrã ã'ẽ pikuaama mbaivara joko ẽ ko tykove Ãña, potã ijeshaka ẽ ndei teri jy ara vãhẽrã. ⁷ Ko mbai porãmbava ñemi, mba'apoma rãnga ẽ, hãrõĩ ẽ syry shi verã joko õva. ⁸ Haipepo ijy heshaka kui tykove Ãña, tẽvã Ñanderu Hesukristo putuhẽ pẽĩpo õhũndikui. Hãma himbipe kue peĩpo mimishi kui oujy marã, katumba mbai japova. ⁹ Voka tykove ãña, ãña ruvisha mbouva, ou pokui tivisha mbaikatu ryheve, hesha verã haereka mbai hesha verã japu ryheve, ¹⁰ hãrã porypo mbai porãmba marãrã ngatu vekua, mbytavy verã opaite õñehũndi verãre, mby horyã haereka haihuã ãñeteva katu mondojepeva. ¹¹ Hãrã Ñanderu Tumpa heja mby tavyshu reta mbai apu, haereka roja reta ãñete mbava. ¹² Kỹrã õñehũndi verã opaite rojamba vare ãñeteva, haereka roja tykove ãñaivi ouva. ¹³ Oreny mẽ ã'ẽ ñoi pyndy rehe yry rorykue Ñanderu Tumpape, shy ryvyre Ñanderu Tumpa haihuva, Ñanderu Tumpa rãnga pee rãni pyny pyhỹrõ pyny mondojepe verã Espiritu Santo pyny mby heko kavi rupii, haereka ãñeteva pyrojarã. ¹⁴ Ha ẽrã rãnga pyny rẽno Ñanderu Tumpa, ñeẽ kavi ore mbe uava rupii, piche verãve Ñanderu Hesukristo heko himbipevape. ¹⁵ Hãrã shy ryvyre, pitaso katu haereka avy pyndysare shi ore pynymbo ea vekua rãimi, jaishu ĩrĩ ñeẽ rupiitei ti kuatia ñeẽ rupiive. ¹⁶ Ñanderu Hesukristo teiva haereka Ñanderu Tumpa, ñandy raihu haere meẽ ñande vekua vya opambava, hãndi ñỹhãrõ kuaa pya kavi rupii, ¹⁷ py pya tymykyrẽ ỹ, hãndi pynymy pyrãnta opa mbaikavi pere haereka pijapo vape.