¹ Hãrã ã'ẽ shy ryrvyre, pirure yryrehe, Ñanderu Tumpa ĩñeẽ areã mbe ua verã opa rupii, tyrojaha haereka tymỹ ãñeteha ko jehuva raĩmi pyny mbytepe. ² Pirure jyve, mãhẽ tykove porãmba ñarõva yryjochakui, shara opaitevã jyroja. ³ Ñanderu Tumpa ny japuã, hãrã Hai pyny mỹny mỹpyrãtapo mbai porãmbaivi haereka ñyngarekopo pyndyrehe ãñaivi. ⁴ Hãmã jyrojaha ẽ Ñanderu Tumpare, pee pijapo ñõĩ verã he ia peeva raĩmi. ⁵ Ñanderu Tumpa tikuaaka pee pyndy pyape, pyhaihu verã papishare Tumpa ñandyraihuva raĩmi haereka pyhasa kuaa verã jyhasa asy, Kristo hasava raĩmi. ⁶ 6 Shy ryvyre, jurureha pee Ñanderu Hesukristo heepe, pyrysy shi verã ñandy ryvyre ñatẽỹ mba'apova haereka ore mbo eahea raĩmi mba ikova. ⁷ Pee rãnga pikuaa kavi mãrãrapo piko, ore ikohava raĩmi; pyny mbytepe ore mba'apoa ñõĩ ikoha, ⁸ haereka ho uha reĩã shi mbava hĩmbiu. Kỹrãte verã, mba'apoha haereka oñehã ãha yry rykove rehe, mba'apoha jyve ara kõĩ vape haere pynturã potã hejaha pyndyrehe mbai pohyvarã. ⁹ Rekohatẽ yrymbory verã jurureha peeva, tẽvã mba'apohaĩ heshahaka pee verã mãrãrapo piko. ¹⁰ Ĩmẽha ẽ penendierã rãnga kova he iha pee: Ñatẽỹ mba'apova, avy tykaru. ¹¹ Hẽnduha rãnga pyny mbytepe ĩmẽ'ẽ ñatẽỹ mba'apovarã, iko reiva mbaiva mba japova. ¹² Hairetape he iha Ñanderu Hesukristo hepe, kapyryĩ mba'apo verã haereka hou verã rehe. ¹³ Shy ryvyre avy pynykangy, pijapo verã mbai haikaviva. ¹⁴ Ĩmẽ'ẽ mbaimba kuaaseva ko kuatia ñeẽpe õ heiva raĩmi he ia perã, pymaĩhe mbavara, hãrã avy pihia retakui, mãrã verã. ¹⁵ Tẽvã, avy pyheshatã reta, py mbarakuaa jyveshu pyndy ryvy raĩmi. ¹⁶ Ñanderu Tumpa teiva rãnga pyrymby pya kaviva, opa arape pynymby pya kavikui. Ñanderu Tumpa tõĩ penendie. ¹⁷ She Pablo, shepopetei ambypara pee ko ñymarãndu. Kyrã ñoĩ añono shy ree opaite kuatia ñeẽ she ambypara vare. ¹⁸ Ñanderu Hesukristo tiñohẽ pyrehe mbaikavikue. Amén.