¹ Pablo, Silvano haereka Timoteo marãnduha Hesukristo jy tupao, Tesalonica pe õre, ñymy pẽnte hãndiva Ñanderu Tumpa haere Ñanderu Hesukristo. ² Ñanderu Tumpa haereka Ñanderu Hesukristo tinohẽ pyndy rehe ñymbory haere pya symyĩ kue. ³ Mẽ ẽhashu yry rorykue Ñanderu Tumpa pyndy rehe, shara haikavi vokava japoha, piroja kue rãnga ñypy rãntave oho, haereka pijaihukue ñimbitivishave oho opa ara. ⁴ Hãme rãnga Ñanderu Tumpa jy tupao retaipi injeta kavi pyndy rehe, kỹrẽ ype pyhasa shi opaite puã i pyrehe vare haere jyhasa asy pyhasa vekua. ⁵ Vokava heshaka Ñanderu Tumpa pini mbivache kaviva haereka hasha haikavi picheva hai ẽvãpe. Hai heepe rãnga pyhasa asy pẽĩ. ⁶ Haikavi rãnga Ñanderu Tumpa mby hasa asy, opaite pynymby hasa asy iare, ⁷ hãma pee pyhasa asy pivany, pyny mbuputuu, haereka ore jyve. Kỹrãpo Ñanderu Tumpa japokui, ijy heshaka jyma Hesukristo mbouva mbaikatu vare hãndi, ⁸ ouma vate araivi tata hendy pyrã. Oupo jahehe Ñanderu Tumpa kuaamba vare haereka hẽnduse mba iare Ñanderu Hesukristo ĩñeẽ haikaviva. ⁹ Voka vare nupãhãpo õñehundi verã opa ara pevarã, hãrã momboapo retakui mbyry Ñanderu Tumpa ẽvãivi, himbipe haereka ñymbaikatu kueivi. ¹⁰ Ñanderu Tumpa ou pokui voka arape, omomba'ea vasu verã ña ãpo vare mbytepe, haereka mby vya verã opaite jyroja heare, hãma pee pyroja kova mbai kuaa hakape vekua. ¹¹ Hãme rãnga opa ara Ñanderu Tumpape jurureha pyndy rehe, pyny rẽno vekua piko verã hai potava rãimi, hai ñymbaikatu rupii iko pee verã opaite mbaikavi pota pijapova, haereka opaite mbai pyrahava tynonde piroja rupii. ¹² Kyrãrã Ñanderu Hesu hee, õmomba'eapo pee rupii, hãma hai penemombaipo, Ñanderu Tumpa haereka Ñanderu Hesukristo pya kaviva potava rãimi.