¹ Timoteo, avy ñyngãtashu kuakuava, ñimĩñẽẽshu nde ru rãimi, kunumi retany ndy ryvyre raĩmi japo; ² taupe kuakuava nde sy raĩmi japo, haereka kuĩñataĩre ni indy raĩmi, pya kyamba ryheve. ³ Mbory taupe ĩmẽ mano shiare, mbaimba ĩmẽreare. ⁴ Tẽvã taupe ĩmẽ mano shia ĩmẽ'ẽ hãndi memby ti hỹmarĩrõ retarã, hai retapo tynonde kuaa ñyngarekohe verã hope õre, haereka myngovia tuu haereka ishy jypareko kue, shara kova haikavi haereka mbyhory Ñanderu Tumpa. ⁵ Ko taupe ãẽteĩte ĩmẽ mano shia haereka hã'ẽĩ ia, hãrõ Ñanderu Tumpa, poimba ñymboirã jurureva ara peave haereka pyntumarã. ⁶ Kona taupe ĩmẽ mano shia, iko ia ha ei potava raĩmi, hykovete ia mano. ⁷ Mbeushu reta kova tiko kavi reta, mahẽ injeta porãhe retakui. ⁸ Opaite mbory mbava hẽntarã haereka hope õre, ñomima jyroja kue hãrã heko porã aĩteve shi Hesu jyroja mba teri hea retaivi. ⁹ Taupe ĩmẽ mano shia ñonoã verã hee kuatiape, rekopo 60 ãño haereka pẽnte kuimbaivãi hyreko kuepo. ¹⁰ Tijy kuashĩ mbaikavi japova rehe; jaishu mbykuakua kavira mẽmbyre, myvãhẽ kavi mbuhupa hẽntape, maĩ kavi rahe Hesu ryhevare, mboryra mbai mba'ety reare, haereka opaite mbaikavi japo vekua rehe. ¹¹ Hãma ime mano shiare kuiñataĩ teriare avy ñono kuatiape, vokava reta rãnga pota ỹnga reko jyrã mbijichejy Kristo. ¹² Kỹrãra ñymby heko porã, shara poirei shi ĩñẽẽ meẽ vekua tupaope. ¹³ Haereka ikorei i opa rupii oho hẽnta orẽ hupi, ñeẽ ryheva vaĩjy, opa mbaipe iche haereka heimba tẽvẽrã vekuave hei hapishare. ¹⁴ Hãme rãnga aipota ỹnga rekojy, taupe ĩme mano shia kuiñataĩ teriare, tymẽmby haereka tinga reko kavihe hoo, mahẽ ñandy resha tamba iare ĩnjeta porã ihe retakui. ¹⁵ Shara ĩmema ẽ taupe ĩme mano shiare syry ñandy heviva, hama oho Ãña haykue. ¹⁶ Ĩmẽ'ẽ Hesukristore jyrojava hẽntape ẽ, pẽnte taupe ĩme mano shiarã tinga reko he, hãrã avy tyhãrõ tupaoĩ tymbory, kỹrãrapo tupao katu mbory ĩme mano shia añetẽĩte mbaimba ĩmereva. ¹⁷ Opaite Hesukristo jy tupao ñyngareko kavi hea haihuarã, hipity haka ñõĩpo jyveshu maĩ nunga, tynonde ẽ Ñanderu Tumpa ĩñẽẽ mbeu haereka pỹrỹmboi iheare. ¹⁸ Ñanderu Tumpa ĩñẽẽpe rãnga hei: “Avy ñono he veje jurure õ, mbai rãy myhãy õ." Hei veejy: “Ko mba'apova rãnga, mẽ eã poshu japova hepykue." ¹⁹ Avy hẽndu Hesukristo jy tupao ñynga reko ihea he iahea, ẽ eã monkue ti mbahapy heshashuarã. ²⁰ Hãrã porãmba japo iare ñyngatashu opa vare hỹnonde, hãrã po hẽnduvare kyje jyve. ²¹ Airure nde, Ñanderu Tumpa, Hesukristo haereka Tumpa jokuevare hỹnonde, rijapo verã kova mbai hekope kavi, mbava mba rĩmbijiche haereka rymaĩhe he verã marãvara. ²² Avy are haĩte ñono ĩãrẽ ndepo rỹmby hee verã tupaope mba'apo verã, ndy pya rimbijeta kavi mba teria. Avy mĩ'ĩrũ he mbai porãmba japo iare, mbysyryĩ ndi juhuvi opaite mbai porãmba vekua. ²³ Ndy pya hasy ñoĩ i ndeva, avy yy ñoĩte heu, vino po mĩshĩ reu jyve. ²⁴ Ĩmẽ'ẽ mbai porãmbava japo ia, ndei teri mã ẽhã ẽhẽrã vaĩ jykuava, ĩmẽ'ẽjy mbai porãmbava iko marãmeĩ ajera heshava. ²⁵ Kỹraĩ jyve mbaikavi japoa vekua ijyhesha kavi jyve, hãrã porãmba vekua ñemĩape õ, opa arãpo ñemĩãpe ẽ.