¹ Ko Espiritu Santo rãnga hei kaviñõĩ, vokava ara japyape ĩmẽpo'ẽ poi jyrojaheva Ñanderu Tumpa. Hãrã mbytavyhapo Espiritu japuva rupii, haivi ãña potava pyrymboiheva ryhevaĩpo japo. ² Kuaretare hẽndu verã voka ñeẽ japova pyrỹmboi ẽrã, hai reta mbai veama ñandu ñakape mbai porãmba vaĩma potarã. ³ Haire potããpo mbava ñimi ĩrũ shi, haereka ĩmepo ẽjy potamba timbiu ho ua, ko timbiu opaite Ñanderu Tumpa meẽshu Hesure jyrojava, haere ãẽteva kuaavare; hourã meẽ verã jyvya ryheve. ⁴ Opa mbai Ñanderu Tumpa japova rãnga haikavi, haereka mba'ety mbaiva ñambijiche verã opaite jauva, koñeĩ ñameẽ ñandy pya horykue ryheve Ñanderu Tumpape. ⁵ Ñanderu Tumpa ĩñẽẽ mbyparava, Ñanderu Tumpape ñymboiva rupii opaite timbiu jau verã haikavima. ⁶ Kova ñeẽ kavi rỹmboi he ñandy ryvy retarã, haima po nde Hesukristo jokueva haikaviva, rykuakuapo ko Ñanderu Tumpa ĩñeẽ ãñeteva ryheva haereka rỹmboi kavi ryrahava ryheve. ⁷ Hãrã avy roja ĩnjeta reiva arykaiva ryheva rehe, vokava rãnga ñeẽ ñakape porãmba ia mbeu vekũaĩ; kỹrã te verã, ñymypyrãta katu teko kaviape nde espiritu tivisha kavi verã Ñanderu Tumpa hãndi. ⁸ Hãrã ko ndyrete ñymungueva haikavirã, ko tykove kavi Ñanderu Tumpa hãndi verãny, opa mbai pevarã haikavi, verupo ñande haikaviva ñandy rykove yvy ĩãrẽ haereka tykove ou verãpe. ⁹ Kova rãnga hai ñeẽ ãñeteva hãrã opava retapo roja. ¹⁰ Ha erãvẽĩ rãnga ñamba'apo haereka jahasa asy he iha i ñandeape, shara jairojahe Ñanderu Tumpa hykove iare, hai vokava opava retape mondojepe verã, tynondeite ẽ opaite jyroja heare. ¹¹ Kova mbai japoka haereka pyrỹmboihe ¹² Avy mbava ndy reshatãti nukunumĩte terirã, tyhesha ndyrehe Hesu ryhevare mbai haikaviva japoa verã, rĩnjeta haereka rikova raĩmi, jypareko, jyrojakue haereka ndy reko kyamba vape. ¹³ Aha peve, iko mbijeta Ñanderu Tumpa ĩñeẽ, pyrỹmboihe haereka mykyrẽy ñandy ryvyre. ¹⁴ Ñyngareko he mbai kuaa Ñanderu Tumpa meẽ nde vekua rehe, Hesu jytupao miñãkã iare ipo ñono neãrẽrã vẽkua haereka injeta ndyrehe Ñanderu Tumpa heepe. ¹⁵ Ndy pya mbijeta katuhe kova mbai haereka kyrã japo, opavare hesha verã marãra haikavi rehori. ¹⁶ Ñyngareko ndijehe haereka rypyrỹmboi vare, jytaso katu opa mbaipe. Kỹrã rijaporã, ndijupiipo reho jepe haereka opaite nyrẽnduva retape jyve.