¹ 1 Kova hai ñeẽ ãñeteva: ĩmẽ'ẽ kỹrẽy Ñanderu Tumpa ĩñẽẽ mbeu iva Hesukristo hoo perã, mbai haikaviva pota japo. ² Hãrã tekotẽveã iko injetaha porãmba ĩ he verã raĩmi. Penteĩpo re hỹreko, katupo ñyngareko ijehe, jyreko kuaapo, iko kuaapo mbai kuaavape haere oñemombai vape. Opa arapo ẽẽ pyrỹmỹ vãhẽ kavi verã hẽntape haereka pyrỹmboi kavipo. ³ Ka ũãpo, haere ñyrãrõ seãpo jyve, kyry poti potããpo jy hekope mbava ryheva. Kỹrã te verã, pya kavi ñoĩpo, ñeẽ mõmboapo he hapishare, haereka avypo ñymbai pota raivi. ⁴ ñyngareko kavi hoope, haereka hekope kavipo jocha tayre ĩñẽẽ hẽndushu verã. ⁵ Hama hai katũã ñyngareko kavi hooperã, maraĩ rapo ñyngareko kavi jy Ñanderu Tumpa jy tupaore? ⁶ Vokava Ñanderu Tumpa ĩñẽẽ mbeu iva, ha eãpo pẽnte hãirã jyroja ia, mahẽ tynyhẽ jyroja ijehe varã, oa jyvekui Ãña oava raĩmi. ⁷ Tekotevẽpo ĩnjetaha kavi i jyvehe, Hesu jyrojamba teri hevare mbytepe, mahẽ oakui ĩnjeha porãmba he verãpe ti Ãñare ipope. ⁸ Kỹrãipo jyve pyrỹmbory ia Diaconore he aishuva, heko kavipo jyve, ĩñẽẽ monkueãpo, haere ka ũãpojy, hekope kavi mbava kyrypoti potããpojy. ⁹ Kuaa kavi vaĩpojy Ñanderu Tumpa ñeẽ jyrojavape mbe uava ryheva, haereka ñãkape mbai haikavi vaĩpo imere. ¹⁰ Hãma tekotevẽpo maĩ kavi rãni jyve, kỹrãrãpo heshaha kavima herã, katu ñonoha Diaconorã. ¹¹ Ko Diacono hỹreko, heko kavipo jyve, haereka ĩnjeta reĩãpo he hapishare, tymaĩ kavi jyve ijehe, haere tijapo kavi opa mbai, opavare hỹnonde vya hãndi verãre. ¹² Voka Diacono pẽnte ñoĩ pore hỹreko, haereka ñyngareko kuaapo jyve hẽnta ĩrũre hãndi, haere tay reta rehe jyve. ¹³ Ko tapyy Diacono hekope kavi mbai japova, kuaretare ĩnjeta kavitepo he, haereka kyjemba ryheve po ĩnjeta he Hesukristo. ¹⁴ Ãharõ area aha aryresha verã, tẽvã, sapyarei ahã jyrã ambypara nde. ¹⁵ Kova kuatia ñeẽ rikua verã, mãrãrapo rijapo jyve tupao ryhevare, vokava rãnga hai Ñanderu Tumpa hykoveva tupao, voka tupaope õ rãnga hai ĩmereva mbaikatu, jochapy verã mbai ãñeteva. ¹⁶ Japumbape ñande katu jai, ñande jairoja haikavite. Mbai vasu ãñeteva rãnga ã'ẽ ñande jaikuaa Ñanderu Tumpa arykaiva ryheva: Hesukristo rãnga ijeshaka tapyy raĩmi yvy ĩãrẽ; Espiritu Santo hei hee, hai heko kaviva; Tumpa jokuevare heshashu, Ñẽẽ kavi hai ryheva mbe uha opaite tẽnta retaipi, hãma kuaretare jyroja hee; hãrã rahahashu reta vate arapy Ñanderu Tumpa ẽvape.