¹ Tynondepo airure tijapoha jurureva, tirureha, opaiteva kuaretare ĩãrẽ haere tymẽ ẽhã jyvya Ñanderu Tumpape. ² Jurureha verã jy opava mburuvisha vasu haere karai vate õ reta rehe, jaiko verã pya vapype haere ñyrãrõ mbape, ñamombai vasushu verã Ñanderu Tumpa, teko kavi haere heko katupe. ³ Kova mbai haikavi haereka mby vyashuva Ñanderu Tumpa Ñany mondojepe ia. ⁴ Hai tei pota opaite kuaretare oho jepe verã jyve, hãrã tou tikuaa verã reta ãñẽteva ryheva. ⁵ Ñanderu Tumpa rãnga pẽntẽĩ ẽ, hãrã pẽntẽĩ ẽjy mbi iko kaviva kuareta reta Ñanderu Tumpa hãndi, Hesukristo tapy ỹĩ jy veeva. ⁶ Hesukristo meẽmba hykove haere manõmba opava kuaretare mby hepyrã mondojepe verã, hãrã vokava ijykuaka jy arape. ⁷ Ha ẽrã she shi ñonoã vekua ñimĩñẽẽ i verã haereka Apostolrã, amboi verã voka jyroja haereka añeteva ryheva, opaite Judio mba retape. Ãñete vape hai airoja Kristorerã, hãrã shapuã. ⁸ Hãrã opa rupii tapyyre tirure haereka tuhupi ipo kyamba, poshy mbape haere ñeẽ mombo mba hapisha retape. ⁹ Hãrã taupere ñimi monde kuaapo hekope kavi ijevaka mbape, haereka avy tivavarehe ñaka haa heshaha veraĩ ti ita vera hĩmbipeva, mbai pisheka perla haere mondeava hepyvare. ¹⁰ Tijeva jyve mbai japo kaviva rupii, mashỹãvã raĩmi tiko kavi taupere Ñanderu Tumpa jokuere vare. ¹¹ Taupere hẽndu ñoĩpo opaite ñeẽ mbeuashuva chĩrĩrĩva pẽĩ, maĩ nunga mba hei verã. ¹² Taupere ama ẽĩã pohe mboi verã Kuimbaire, ti rekoshu verãre ipope, ẽpo jyve reta ñymbatyha õpe chĩrĩrĩvape. ¹³ Ñanderu Tumpa rãnga Adan rãnimba tynonde japo, haivirãmba Evape japojy; ¹⁴ hãrã Adan ñymby hekoamba, voka taupeĩmba, haivi oa mbai porãmbape. ¹⁵ Tẽvã, vokava taupe oho jepepo membyrã, opa arape iko jyroja perã, jyhayhu, haere teko kavivape, heko katukuepy ryhe verã.