¹ Opaite jokueareare tijaposhu jokue õ heishua, mãhẽ Ñanderu Tumpa hee haereka ñapỹrỹmboi hea injeta porã hekui. ² Hãrã ĩmẽ'ẽ pyrokue õ jyrojava Ñanderu Tumpare avy tijapoãshu hai heiva, shara tyvy jyvehe jyroja kuepe. Japo kaviteve rãnga poshu hai heishua, ko japo kaviva hipityva reta rãnga Tumpa jyroja heare, haereka ñandy ryvyre haihua vare. Kova mbaire pyrỹmboi haereka mbeu kova ñeẽ. ³ Ĩmẽ'ẽ pyrỹmboi ihea mbai yngaiva, oho mba hea Ñanderu Hesukristo pyrỹmboihe vekua, haereka tykove haikaviva pyny mbo ea hea raĩmi, ⁴ vokava hai tykove jyroja ijeheva haereka mbaimba kuava. Mymbai rasyshu potaite injeta ẽhẽ hapisharã; kovaivi rãnga ou mbai pota raivi, porãmba ikova, ijakava, poshyrei, jyroja mba, ⁵ haereka ñyrãrõ opambava, hai kuaretare pya kyava haereka kuaa mbava ãẽteva, haire mõãtẽ Hesukristo jyroja herã, heta mai nungakue ĩmẽre reta. Syry shi nde kỹrã vare. ⁶ Ãẽte rãnga Ñanderu Tumpa jairoja herã heta maĩ nungakue ẽ, tẽvã vy aĩ vare pevarã maĩ nunga kuemi ĩmerea rehe. ⁷ Shara mba'eã jaru ko yvy ĩãrẽ, hãrã mba ẽ aĩpo jarahajy. ⁸ Hãma ĩmẽ jare ja u haereka ñamonde verãrã, ja vy aĩ mapo. ⁹ Hãrã pota jyky rypoti heta ia retany oa mbai pota raivipe pirirityrã pyrỹmbaiva, haereka opaite mbai porãmba vekua japo ha eire potava raĩmi. Kova mbai porãmba vekua, opa raha kuaretare ñymbai verã kyty haereka õñehundi verãpe. ¹⁰ Shara kyrypoti jyhaihu hai opa mbai porãmba vekua jypy, hãrã ĩmẽ'ẽ kyrypoti potaiterã poi jyrojahea Hesukristo, haivi iko hasyite veejy hykovepe. ¹¹ Nde, Timoteo Ñanderu Tumpa ryheva, syry opaite kova mbaivi. Riko ñoĩpo tykove haikavivape, Tumpa jypareko kuepy, jypareko kuepe, jyrojape, jyhaihupe, ñyhãrõ kuaa ryheve, haereka jyrojamba ijehe vape. ¹² Ñyrãrõ kavi riroja kuepy; ñimbi ijahe tykove opamba verãre, ha erã rãnga Ñanderu Tumpa nyrẽno mba aryka'e, hãndi rymbeu kavi rirojakue opavare hỹnonde. ¹³ Ã'ẽ Ñanderu Tumpa mby hykoveva opa mbai hỹnonde, haereka Hesukristo hỹnonde hekope kavi hei verã Poncio Pilato hỹnonde, airure nde ¹⁴ rijapo verã she hai ndeva. Iko tykove kyambape, heshamba ndy rehe verã mbai porãmba vekua, Ñanderu Hesukristo oujy peve. ¹⁵ Jy ara vãhẽ mãrã Ñanderu Tumpa heshaka pokui. Ko Ñanderu Tumpa heko kaviva, ha ẽĩ rãnga ñymbaikatuva, mburuvishare Juhuvisha haereka karaire Ija. ¹⁶ Hã ẽĩ koñeĩ ẽ mano mbava, ikova hĩmbi peape katu mba mbava ñymbojahea. Mba'ety kuareta heshava hãma hesha aĩ teipo. Hai opa ara pevarã heko kavi kue haereka ñymbaikatu. Amén. ¹⁷ 17 Iko katu vare ko yvy ĩãrẽ, ereshu reta avy tiroja ijehe ti jyroja mbai heta reare, shara ha eã jyroja ha hea. Tiroja vehe Ñanderu Tumpa hykove vare, voka opa meẽ ñandeva maĩ nunga kuere ja vya verã. ¹⁸ Ereshu reta tijapo haikaviva, tiko katu reta mbai haikaviva japovapy, ty meẽ haereka timbijaoshu hapisha opa mbai ĩmẽrea. ¹⁹ Kỹrãrãpo heta mbai ĩmẽre kyje mbape kutyve jya pevarã, haereka katupo hipity tykove opamba verã. ²⁰ Hãrã nde Timoteo, ñyngareko kavihe jyroja kuepe heja ndea. Avy hẽndu ñeẽ rei yvy ĩãrẽ õ, ti ñeẽ ãẽte mbava he ia heva mbai kuaa, ²¹ ĩmẽ'ẽ mõã mbai kuaaite varã, poi jyrojahe Ñanderu Hesukristo. Ñanderu Tumpa tymaĩ kavi ndy rehe. Amén.