¹ Mmi zoonse iizi zintu chiinga zaa hita, nni nnaa vona mangiloyi oonne nni a ziimmeene mu imbalyi zoonne ze inkaanda, nni a kweete inhuho zoonne ze inkaanda kuti inhuho saanzi zi humpiri mu inkaanda, mane nnaangati mu iwate kamba chisamu chimwe nne chimwe. ² Ku zwaaho nni nnaa vona lyimwe ingiloyi nni lyi suuka kuzwa ku vuzwa vwe izuva, nni lyi ka kweete chidinto che IREEZA yoo hala: mmi nni lyaa huwa che lyiinzwi ikaando nni lyi kuwira aa mangiloyi oonne, a vaa heerwa maata[ziho/ itawulo] oku sasamisa inkaanda mane nne iwate/ menzi maangi, ³ Nni lyaati, saanzi mu lyiki ku sasamisa inkaanda, mane nnaangati iwate, kamba zisamu, mbwiita chitwa dinta vahikaana ve IREEZA muzi fateho zaavo[ muzi komwe zaavo, mu vusu vwaavo]. ⁴ Mmi nni nnaa zuwa ipalo yaavo va vaa dintiiwa vo luzuvo lwa Isiraere nni yilyi 144 000 [miyaanda yiina miyaanda yiina toonne nne toonne. ⁵ Mu iziko lya Juuta ku vaa dintiiwa veena miyaanda yiina ikumi nne toovere [12 000]. Iziko lya Rubeeni ku vaa dintiiwa veena miyaanda yiina ikumi nne toovere [12 000]. Ve iziko lya Ghadi miyaanda yiina ikumi nne toovere [12 000]. ⁶ Iziko lya Asere choku dintwa veena miyaanda yiina ikumi nne toovere [12 000]. Iziko lya Naavutalyime nni kwa dintiiwa veena miyaanda yiina ikumi nne toovere [12 000]. Ve iziko lya Manasi choku dintiiwa veena miyaanda yiina ikumi nne toovere [12 000]. ⁷ Iziko lya Simiyoni ku vaa dintiiwa veena miyaanda yiina ikumi nne toovere [12 000]. Iziko lya Levi iilyo nnaalyo choku dintiiwa veena miyaanda yiina ikumi nne toovere. Iziko lya Isaka nnaalyo nni lyaa dintiiwa veena miyaanda yiina ikumi nne toovere. ⁸ Ve iziko lya Zebuloni choku dintwa veena miyaanda yiina ikumi nne toovere. Iziko lya Joosefa nni kwaa dintwa veena miyaanda yiina ikumi nne toovere. Lya Benjameni iziko nnaalyo choku dintwa veena miyaanda yiina ikumi nne toovere nnaalyo. ⁹ Chiinga kwa zwaaha nni nnaa voneswa/ toondezwa ipalo ya vantu vaangi vaangi ku seena nne muntu yoo woola kuyi vala, ku zwa mu makaanda, nne mishovo, nne vantu, nne indimi nni va ziimmeene ha vusu vwe chipura, nne ha vusu vwe imbereere, nni va zweete zizwaato zi tuva, nni va kweete maghavalyi mu mayaanza aavo; ¹⁰ Choku kuwa/ huwa che lyiinzwi ikaando naati, Ku hazwa ku zwa kwe IREEZA yo wii keere ha chipura, mane nne ku imbereere. ¹¹ Mmi mangiloyi oonse choku ziima nni a zimbulukite chipura, nne ku zimbulukite nne vakulwaana nne zivatana zoonne, choku wiira ha vusu vwe chipura che zifateho [zikomwe] zaavo, choku rapera IREEZA, ¹² Nni aati, kuve vulyo: Mikoonde, nne ku jolola nne maano, nne kulyi tumeresa, nne ku kutekeha, nne ziho, nne ku kola zive kwe IREEZA cho kwii kalyilyira ku saa mani. Kuve voovo vulyo. ¹³ Mmi zumwe wa vakulwaana choku vuuza/ ku itava nnaati kwaangu, mba vaani aava vaka zweete zizwaato zi tuva? Nne kuti va kazwa kuhi? ¹⁴ Nni nna mucho kuti, Unkosi wiizi. Mmi nna nnicho kuti, aava mbaavo va va kazwi mu milyiko nne vukaavo vukaando nni vulyi vuungi, mane va va ka shaanzi zizwaato zaavo, choku zi panga kuti zi tuve cha malaha e imbereere. ¹⁵ Chiingi hanu veena ha vusu vwe chipura che IREEZA, nne ku mu teendera mu iteempere yaakwe masiku nne musihalyi: mmi iiye yo wii keere ha chipura kaa ve nnaavo cho kwiikala. ¹⁶ Keeti nni va voolye vafwe inzala, kamba kufwa inyoota hape; kamba mane nnaangati ku munikirwa nne izuva kamba ku hiishwa nne kamwi. ¹⁷ Ka kuti, imbereere yiina mukati ke chipura kayi va lyiisike, mane kayi va hitire choku va twaala ku menzi o vuhalo ee kala nni a zweerera vulyo; mmi IREEZA kaa siinde ziinsoozi zoonse mu menso aavo.