¹ Mmi nni nna vona ingiloyi nnilyi kazwa ku iwulu, nnilyi ka kweete chiiwulyiso che iriindi lyi seena kulyi manina, mane nne muhara we isipi mu iyaanza lyaalyo. ² Mmi nni lyaa woonda dirakona, yina inzoka yi supeere, iiyo javulusi, nne Saatani, choku mu suunga mwaaka[zirimo ziina] yiina miyaanda yiina ikumi[1000], ³ Choku mu sohera mu iriindi lyi seena halyi manina, choku mu iyalyira, choku ghoonka ha teni, kuti saanzi nna voolyi a ka cheengi vantu ve ikala mu inkaanda hape, mbwiita ziriimo[mwaaka] ziina miyaanda yiina ikumi hazi kwana: mmi ku zwaaho njeeti nna suungununwa kaniini vulyo. ⁴ Mmi nni nna vona zipura nnaavo va ziikeere, nni va heewa ikatulo: choku vona hape inhuho zaavo vava kosweerwa mitwi cho kuha vupaki cha Jeeso, nne lyiinzwi lye IREEZA, mane aavo va sana vava fukamini chivatana, mane nnaangati chiswaniso chaacho, mane nne ku taambula luswayo lwaacho mu zifateho zaavo, mane nnaangati mu manza aavo; mmi nni vee kala choku vusa nne Kirisiti ziriimo ziina miyaanda yiina ikumi. ⁵ Mmi voonse va fwiire nni vee ikala voovo vulyo, mbwiita ziriimo ziina miyaanda yiina ikumi chiinga za kwana. Uuku njo ku vuuka kwe intaanzi. ⁶ Kwiina mikoonde kwaalyi iiye yo wiina chimwezana muku vuuka kwe intaanzi: Kwaava aava ifu lyo vuuveri ka lyiina ziho ku valyi, mmi ka vave vapurisita ve IREEZA nni va Kirisiti, mane kava vuse nnaaye ziriimo ziina miyaanda yiina ikumi. ⁷ Mmi ziriimo ziina miyaanda yiina ikumi chini zaa mana, Saatani ka suungununwa choku zwiiswa mu intorongo, ⁸ Mmi kaa yeende choku ka taanga ku cheenga mishovo ya vantu veena mu mabalyi e inkaanda oonne, Ghoge nne Maghoge, voonse choku va kuunganyeza inkoondo: ipalo yaavo nniyi kwana/ swana ivu lye iwate. ⁹ Mmi nni vaa yeenda mu inkaanda yii wukite, choku zumbuluka mativerero a vajolola, nne muzi wu sakahala: ku zwaaho mulyiro nni waa suuka kuzwa ku iwulu kwe IREEZA, choku va sumika. ¹⁰ Mmi Saatani yaava va ziyeza iiye choku soherwa mu ilyangalyiro lya mavwe, uuko kwiina chivatana nne muporofita wa mapa, kweeti nni va ku sasamiinwa masiku nne musihalyi mbwiita ku mana choku maniniina. ¹¹ Mmi nni nna vona chipura chituva chikaando, mane nnaaye yaa va chiikeere, iiye inkaanda nne iwulu wuzi vaa ngombolyi ha vusu vwaakwe; choku shaala kazi siina meikalo. ¹² Mmi nni nna vona va fwiire, vaniini nne vakaando, nni va ziimeene ha vusu vwe IREEZA; mane mavuuka choku wuumbulwa[iwulwa], yimwe ivuuka naayo choku iwulwa[wuumbulwa], iiyo ivuuka yo vuhalo: ku zwaaho vafu voonse choku watulwa kuya che zingolyetwa mu mavuuka, kuya che miteendo[misevezi] yaavo. ¹³ Mmi iwate nni lyaa zwiisa vafu voonse veena mu lyilyi; mane lufu nne ihere nnaavo choku zwiisa vafu veena ku valyi; ku zwaaho nni va watulwa zumwe nne zumwe muntu kuya che miteendo[misevezi] yaakwe. ¹⁴ Mmi lufu nne ihere nni va soherwa mu ilyangalyiro. Iilyi nje ifu lyo vuuveri. ¹⁵ Mmi zumwe nne zumwe yaa va waaniki kuti kaa ngolyetwa mu ivuuka yo vuhalo a vaa soherwa mu ilyangalyiro.