¹ Nni nna vona chimwe chishupo mu iwulu chikaando nni chi komosa hape, mangiloyi a mana iyaanza nne oovere a kweete imbazi zi mana iyaanza nne zoovere; iizo zi chita kuti vukalyi vwe IREEZA mu vuku maniine mu zilyi[chaazo]. ² Choku vona hape nni ku kola mane iiri iwate lye ivootoro lyi kopenywa nne mulyiro: mane nnaavo vava woolyi ku zuunda chivatana, nne ku zuunda chiswaniso chaacho, nne luswayo lwaacho, nni va ziimeene he iwate lye ivootoro, nni va kweete mahiripa e IREEZA. ³ Ku zwaaho nni va ziimba luziimbo lwa Mushe muhikaana we IREEZA, mane nne luziimbo lwe imbereere, nni vati, miteendo yaako mikaando a hulu mane yi komosa, Simwiine IREEZA we ziho zoonse; inzira zaako zi wolokete nne ku shiyama, uuwe Simwiine wa vajolola. ⁴ Nje yeeni yaa seti nnaa kutiye uuwe Simwiine, mane nne ku teemba izina lyaako? Ka kuti nje wooweena yoo jolola: Nne kuti mishovo yoonse ka yiize kuku fukamina ha vusu; mane nne ikatulo zaako zilyi tondeeza. ⁵ Mmi ku zwaaho nni nnaa lola choku vona, inzuvo ye itempere ku iwulu mu ikala vupaki nni yii wuka: ⁶ Mangiloyi a mana iyaanza nne oovere hape nni a ka zweete zizwaato za majira a tuva, mmi hazi zuva zaawo[o] nni yilyi zizwaato ze ighawuda. ⁷ Mmi chimwe che zivatana nni chaa ha aa mangiloyi tusuva twe ighawuda nni twiina vukalyi vwe IREEZA, yoo halyilyiire. ⁸ Ku zwaaho itempere nni yaa shaala yii zwiire vuusi vuzwa kuku ndayima/ vereenga kwe IREEZA, nne ku ziho[maata] zaakwe; mmi ka kwiina yaa vaaalyi ku woola ku injira mu itempere, mbwiita imbazi za mangiloyi a mana iyaanza nne oovere chiinga zaa shimehwa choku pangahala.