¹ Mmi vone nni nna vona imbereere nni yi ziimeene he iruundu lya Siyona, mmi veena nnaayo ipalo yaavo nni yi vala[woonda] miyaanda ye miyaanda yiina ikumi nne miyaanda yiina makumi oonne nne toonne, veena izina lye IREEZA[IISI] choku ngolwa ha zifateho zaavo. ² Mmi nni nna zuwa lyiinzwi kuzwa ku iwulu, mbakache mulyumo wa meenzi maangi, hape mane iiri mulyumo woku tiimba: nni nna zuwa hape mulyumo wa vantu va lyiza maharipa nni va kweete ku a lyiza. ³ Cho kuva nni va ziimba lu ziimbo luva ku kola iiri luhiya ha vusu vwe chipura, nne ha vusu vwe zivatana zoonne, nne vakulwaana: mmi ka kwiina muntu yaa vaalyi ku woola kulyi tuta ku ziimba uulu lu ziimbo mbwiita vulyo aava veena miyaanda yiina mwaanda nne makumi oonne nne toonne, aavo vava lukululwa mu inkaanda[144 000]. ⁴ Aava mboovo va sana va valyi kenengi[laalyilaalyi] nne vakulwaakazi; Ka kuti mba kamwalye. Aava mboovo ve ikala nni va shaalyiire vulyo imbereere ku yiya[ kwaaya], Aava vava lukuluwa kuzwa mu vantu, aavo va chita kuti nje kuluma[kulyi taamwiina] kwe IREEZA nne imbereere[mwaane]. ⁵ Mmi mu tulomo twaavo nni kwaa vulyeeka vuvilaala: mmu vee keere mane nne vufosi ha vusu vo muvuso we IREEZA. ⁶ Hape nni nnaa vona ingiloyi lyi wulukiire hakati kati lye iwulu, nni lyi kweete mulaeza wu ikalyilyiire wuya ku vantu ve ikala mu inkaanda, mane nne ku wumwe nne wumwe mushovo, nne luzuvo, nne lulyimi, nne vantu, ⁷ Nni ku waambwa che lyiinzwi lyiina ku iwulu a hulu, cho kuti, kaku tiyiiwa[ku kutekwa] IREEZA, nne kuti a teebwa; ka kuti chivaka chaakwe choku watula chi chaa kwana[sika]; mane aa raperwa[fukaminwa] iiye yaa va pangi iwulu, nne inkaanda, nne iwate, mane nne indwiizi zoonse. ⁸ Nni kwee chirira lyimwe ingiloyi hape cho kuti, Babilona chaawa, chaawa, wuna muzi mukaando, ka kuti a vaa nywiinsiki mishovo nna mishovo ya vantu vujwara vwaakwe vo vusaangu vwaakwe. ⁹ Lyo vuutatu ingiloyi naalyo choku ichirira che lyiinzwi ikaando nni lyiti, Haiva muntu zumwe vulyo kaa fukamine[rapere] chivatana nne chiswaniso chaacho, mane choku taambula luswayo mu chifateho chaakwe kamba mu iyaanza lyaakwe, ¹⁰ Iiye yoo swana mbwiita nnaanywe vujwara vo vukalyi vwe IREEZA, vu itiirwa vulyo nni vu saa pesuiirwa mu inkomoki yaakwe yoku veenga; mane muntu wa teni kaa katazwa choku hiishwa cho mulyiro nne makala a bukuka ha vusu vwa mangiloyi a jolola, mane nne ha vusu vwe imbereere: ¹¹ Mmi vuusi voku bukuka kwaavo nni kwaa suuntukirira ku iwulu; mane ka veena kulyi saanta/ keta kamba ku huuza musihalyi nne masiku, aavo va fukamina chivatana mane chiswaniso chaacho, hape mane nne kwaalyi yoo taambula luswayo lwe izina lyaacho. ¹² Lyiinu aaha mpuku sakanera inkulo inde ya vajolola: haava mpuku waanika va pangahaza mulao we IREEZA, mane nne itumero ya Jeeso. ¹³ Mmi nni naa zuwa lyiinzwi nni lyi waamba nnaame kuzwa ku iwulu nni lyiti, ngolye, kwiina mikoonde kwaavo vafu va fwiira kwe IREEZA, ku taanga hanu kuya ku vusu: Ee ku waamba luhuho, kuti va woolye ku huuza[lapuluha] mu miteendo[misevezi] yaavo; ku zwaaho lyiinu njeeti miteendo yaavo nni yi va shaalye mu masulye. ¹⁴ Nni nnaa lola mmi vone ikope lyi tuva, mmi he iwulu lye ikope nni kwaava yo wii keere ha teni nna lolyeka mane iiri njo mwaana , wo mukwaame, ku mutwi nna zweete ihwiisi ye ighawuda, mmi mu iyaanza lyaakwe hape nna kweete ijeekiso yi cheka a hulu. ¹⁵ Mpaha lyimwe ingiloyi halya kazwa mu itempere, choku huwa che lyiinzwi ikaando nni lyi waamba nnaaye yo wii keere he ikope nni lyiti, ghwaanke, choku siinza che ijeekiso yaako, ka kuti chivaka chi chaa sika cho kuti u siinze; ku siinzwa kwe inkaanda chi kwaa vizwa. ¹⁶ Yaa vee keere he ikope lyiinu mpwaa ghwaankiire inkaanda che ijeekiso; mmi inkaanda nni yaa siinzwa/ siinzika. ¹⁷ Lyimwe ingiloyi nnaalyo nni lya kazwa mu itempere yiina ku iwulu nnaalyo nni lyi ka kweete ijeekiso yi cheka. ¹⁸ Lyimwe ingiloyi iilyo choku kazwa he iziko lye chitavero, iilyo lyiina ku lawula mulyiro; nni lyaa waamba che lyiinzwi ikaando kwaakwe iiye yoo kweete ijeekiso yi cheka, cho kuti, ghwaanke che ijeekiso yaako, mane kunganye zighoko zo muwoomba we inkaanda; Ka kuti muwoomba wa teni chi waa vizwa a hulu. ¹⁹ Ingiloyi mpulyi ghwaankiire che ijeekiso yaalyo mu inkaanda, choku kungaanya zihantu ze inkaanda, choku zi zindira mu mututiso mukaando wo vukalyi vwe IREEZA. ²⁰ Mmi meenzi o muwoomba nni a lyaatwererwa hanze lyo muzi, mane nni kwaazwa malaha mwa teni, a vaati nni a woola ku ziima imbiizi mu kalomo, che chivaka chi sika mu miyaanda yiina ikumi nne miyaanda yi mana iyaanza nne wu mwiina cho vulye vwa haansi.