¹ Lalue, Yesus manimai kadua bolas murid-nyae lalue mamorie urang kuasae umaekan hak mausir sagalae roh-roh jahat, lalue jam akan manyangkae sagalae panyakit. ² Iyae jam manyuruh urang akan mambritakan Karajaan Hatalla umaekan mamaienyae. ³ Ujae-nyae akan urang, Hinam manaing apae-apae kalalam pajalanmue, hinam manaing tungkat,tas,roti,duit, bahkan dua lamar bajue hinam. ⁴ Karangau manih jam amun kolai ditarimae, diam ja diah holue sampai kolai ingkas mulae homan iyah. ⁵ Akan urang am hontae hona manarimae kolai, tingalkan banuae iyah lalue kipaskan dabunyae mulae kakimue anggaplah iyah paringatan akan urang diah.'' ⁶ Lalue ingkas kaban rasul lalue bakaliling ka banuae-banuae samil mambaritakan surat barasih umaekan manyangkae urang-urang sakit lakau koyah komae. (Kabingungan Herodes akan Yesus) ⁷ Herodes, rajae wilayah, manongar uras hal am metuh tajadi lalue iyae bingung laie babarapae urang manyokuekan bahwa Yohanes Pamanie jari baulang hirup mulae antara urang am matie, ⁸ lalue am bukan bapner jam bahwa Elia jari muncul baulang, lalue tege jam am bapaner bahwa antara siku urang mulae kaban nabi am hirup metuh zaman hariah jari hirup. Herodes bapaner, ''Akue jari manota palae Yohanes. Jari, sapae sabujurnyae Urang am laie-Nyae kudongar kabar am berae itie?'' Makae, Harodes puna hona badapat akan Yesus. (Pamakan akan Limae Ribue Urang) ¹⁰ Katikae kaban rasul iyah baulang, urang mangesahkannyae ka Yesus tuntang sagalae am jari urang karuh lalue Iyae manaing urang akan kanirie ka kota am banamae Betsaida. ¹¹ Akan tatapie, urang banya ingat hal iyah lalue urang jam umae-iyae. Makae, samil manyamut urang, Yesus bapaner akan urang banya berae apae Karajaan Hatalla umaekan urang am mamerlukan sangka sobui am baie. ¹² Katikae arie nampara malam, kadua bolas murid Yesus datang ka-Iyae lalue bapaner, ''Suruhkan urang-urang iyah ingkas ka kampung-kampung umaekan desa ka sakitar ditie supayae mangau homan tidur umaekan makan laie ditie dirie tege homan tapencil.'' ¹³ Akan tatapie, Yesus bapaner akan urang, ''kolailah am mamorie urang makan.'' Jawab murid-murid-Nyae, ''Kamie bayae bagorae limae roti umaekan dua iku lau, kacuali amun kamie ingkas mamolie pamakan akan saluruh urang itie.'' ¹⁴ Diah sakitar limae rubu urang kalakie. Yesus bapaner akan murid-murid-Nyae, ''Suruhkan urang-urang duru sacara bakalompok, kira-kira limae puluh urang suti kalompok.'' ¹⁵ Makae, urang jam mangaruh nulat kahona am Yesus parintahkan lalue manyuruh saluruh urang iyah duru. ¹⁶ Lalue Yesus mangalap limae roti umaekan dua iku lau yah, lalue manonga ka langit, lalue mamberkatnyae, mamocah-mocahkannyae, lalue mamoriekannyae akan kaban murid-Nyae supayae urang mamagie-magienyae akan urang banya. ¹⁷ Lalue urang saluruh urang makan sampai konyang. lalue sisa-sisa bolah roti am dikumpulkan tege dua bolas karanjang ponuh. (Petrus Mangukui Yesus iyah Kristus) ¹⁸ Suatu katikae, metuh Yesus badoa kanirie, murid-murid-Nyae tege basamahkan Iyae. Lalue, Iyae batanyae ka urang, ''Sapaekah Akue tie manurut urang banya?'' ¹⁹ Jawab rang, Yohanes Pamanie, am bukan manyokue Elia lalue am bukan mulae manyokue Kolai tie salah siku mulae nabi-nabi metuh zaman hariah am hirup mulae.'' ²⁰ Lalue, Yesus bapaner akan urang, ''Tatapie, manurut kolai kanirie, sapaekah Akue?'' Jawab Petrus, ''Kolai tie Kristus mulae Hatalla.'' ²¹ Akan tatapie, Yesus mangirah kaban muridnyae hinam sakalie-kalie urang mangesah hal itie akan sapae jam. (Yesus Mamarahkan Pampatie-Nyae) ²² Lalue Yesus bapaner,'' Ana Kalunen harus mandarita banya hal umaekan hontae ditarimae laie tuha-tuha, imam-imam kapalae, tuntang pamimpin-pamimpin Agamae, lalue dipatie tapie akan hirup mulae pas arie am katolue.'' ²³ Yesus bapaner akan urang saluruhnyae, ''Amun tege urang hona umae Akue, iyae harus maningalkan kapentingan dirinyae kanirie, lalue manangung salibnaye satiap arie, lalue umae Akue. ²⁴ Laie, sapae jam am barusaha manyalamatkan pahirupnyae, akan kahilangan pahirupnyae. Akan tatapie, sapae jam am kahilangan pahirupnyae laie Akue, iyae akan manyalamat pahirupnyae. ²⁵ Apaekah untungnyaae amun tege siku urang baulih saluruh dunia, tapie matie atau kahilangan pahirupnyae kanirie? ²⁶ Amun urang am mansaie malue laie Akue umaekan laie ujae-Ku Ana Kalunen jam akan malue mangakui urang iyah katika Iya datang kalalam kuasae-Nyae umaekan kuasae Ompai-Nyae, barotae kan kaban malaikat am barasih. ²⁷ Akue mamaner am sabujurnyae akan kolai, tege babarapae urang ka antara kolai am badirie ditie am hontae akan matie sahompan mailae karajaan Hatalla. (Yesus Basamah kan Musa umaekan Elia) ²⁸ Sakitar,dalapan arie lipas Yesus manyampaaikan pangajaran-Nyae iyah, Iyae manaing Petrus, Yohanes, umaekan Yakobus naik ka gunung akan badoa. ²⁹ metuh Yesus badoa, ulah muhae-Nyae salenga barubah umaekan pakayan-Nyae manjadi putih bakilau. ³⁰ Laalue,tailae dua urang metuh bapaner akan -Iyae. Kadua urang iyah Musa umaekan Elia, ³¹ am mahamuskan arepnyae kalalam kuasae lalue bapaner masalah pampatie Yesus am akan sagera ganapi ka Yerusalem. ³² Meluh katikae iyah, Petrus umaekan kaban kawalnyae metuh dikuasae laie kantu am hebat, tatapie katikae urang buju-bujur tasadar, urang mailae kuasaenyae Yesus umaekan dua urang am badirie basama-samah akan Iyae. ³³ Katikae Musa umaekan Elia hona maningalkan Yesus, Petrus bapaner, Guru, arae baie naye dirie totap ditie. kamie akan maniriekan tolue kemah, suti akan Kolai, suli akan Musa, lalue suti mulae akan Elia. Akan tatapie Petrus hontae manyadari apae am di panernyae iyah. ³⁴ Katikaae Petrus metuh mamanerkan hal iyah, salenga datang habun mangalinung urang lalue Petrus, Yohanes, umaekan Yakobus manjadi gola metuh urang tama kalalam habun iyah. ³⁵ Lalue, tadongarlah suarae mulae habun iyah, ''Itie am Ana-Kue, Iyaelah am Akue pilih, dongarkanlah Iyae.'' Salipas suarae iyah bahontie, Yesus didapati bayae kanirinyae. Urang lalue marahasiakannyae lalue hontae mamarahkannyae akan sapae jam metuh arie iyah apae am jari urang ilae. (Siku Ana Kalakie Dibebaskan mulae Roh Jahat) ³⁷ Arie lusaenyae mulae, katikae rang turun mulae gunung, sarombongan urang banya datang ka Yesus. ³⁸ Salah siku mulae urang banya iyah basorue, ''Guru, Akue mohon ka-Kolai lauhlah anakue laie iyae anakue bayae kakaha siku. ³⁹ Ilaelah tege roh am manguasae iyae, lalue salenga iyae basorue-badorue. Roh iyah jam manguncang-nguncangkan iyae sampai nyawaenyae babure, roh iyah tarus manyakit iyae lalue hontae hona badarie mulae iyae. ⁴⁰ Akue jari bamohon ka murid-murid-Mue supayae mausirnyae, tatapie urang hontae ulih mangawinyae.'' ⁴¹ Timat Yesus, ''oy, kolai genarasie am hontae pacayae umaekan sosat! Barapae lamat mulai Akue harus umae kolai lalue basabar akan kolai? Taingkan anamue yah kotie.'' ⁴² Katikae ana iyah jari manamping ka Yesus, roh jahat iyah manimbarnyae ka tanah umaekan mangucang-nguncangkan iyae. Akan tatapie,Yesus mangusir roh iya iyah, lalue manyangkae ana kalaki iyah, lalue maantatkan nyae ka ompainyae mulae. (Yesus Mamanerkan Pampatie-Nyae) ⁴³ Saluruh urang manjari hengan laie kuasae Hatalla, tatapie kametuh urang masih kaheran tahadap saluruh hal am digawie laie Yesus, Iyae bapaner akan murid-murid-Nyae, ⁴⁴ ''Dongarkan bungiekue tie baie-baie: Ana Kalunen akan disorahkan ka jarie kalunen. '' ⁴⁵ Akan tatapie, kaban murid-Nyae hontae paham maksud am dipaner-Nyae yah, tuntang hal iyah mantabu akan urang sampie urang hontae ulih mamahaminyae. Tapie, urang gola batanyae ka Yesus apae artie am dipaner-Nyae iyah. (Sapaekah am Tarutamu?) ⁴⁶ Metuh katika, tege am bakalahie di antara murid-murid Yesus masalah sapae am tarutama di antara urang. ⁴⁷ Akan tatapie, Yesus ingat pikiran hati rang, lalue Iyae mangalap siku babiya koni lalue manaingnyae badirie kadamping-Nyae. ⁴⁸ Lalue, Iyae bapaner akan murid-murid-Nyae, ''satiap urang am manarimae babiya koni tie lalam nama-Kue,iyae manarimae Akue. Lalue, sapae jam am manarimae Akue iyae jam manarimae Iyae am manyuruh Akue. Laie, am paling hina diantara kolaie, iyaelah am terutama.'' (Pihak am Samah) ⁴⁹ Yohanes manimat-Nyae lalue bapaner, ''Guru, kami mailae siku urang mausir roh jahat lalam nama-Mue lalue kami bausaha mahontienyae laie iyae hontae tamae kelompok dirie.'' ⁵⁰ Akan tetapie, Yesus bapaner akan iyae, ''Hinam mahontienyae laie sapae jam am hontae malawan kolaie, iyae mamihak kolaie.'' (Yesus Diusir ka Samaria) ⁵¹ Katikae waktunya jarie damping saat Yesus akan diincang ka surga, Iyae manoguhkan hatie akan ingkas ka Yerusalem. ⁵² Iyae manyuruh babarapae utusan maholue mulae-Iyae. Lalue, utusan-utusan iyah jam ingkas lalue tama ka banuae kadaerah Samaria akan mayiapkan segala sesuatu akan Iyae. ⁵³ Akan tetapie, urang-urang kahoman iyah hontae manarimae Yesus laie Iyae metuh manguang ka kota Yerusalem. ⁵⁴ Metuh murid-murid Yesus, iyaham Yakobus umaekan Yohanes, maile hal itie, urang bapaner, ''Tuhan,apaekah Kolai mahonakan kamie supayae mamarintahkan apie turun mulae langit lalue mahanguskan?'' ⁵⁵ Akan tatapie, Yesus malingau ka balakang lalue manyalue urang. ⁵⁶ Lalue Yesus umaekan murid-murid-Nyae ingkas ka kampung am bukan. (Tantangan akan Umae Yesus) ⁵⁷ Metuh urang jari lalam pajalanan, tege urang bapaner akan Yesus, ''Akue akan umae Kolai kamanih jam Kolai ingkas.'' ⁵⁸ Yesus jam bapaner akan iyae, ''Sarigala bagorae lubag homan diam umaekan buung-burung kaudara bagoae sarangnyae. akan tatapie, Ana Kalunen hontae bagorae homan akan baranai.'' ⁵⁹ Yesus bapaner akan urang am bukan, ''Ayo umae Akue!'' Akan tatapie, urang iyah bapaner, ''Tuhan, izinkan akue ingkas umaekan manguburkan ompaiku lobih holue.'' ⁶⁰ Akan tatapie, Yesus bapaner akan iyae, ''Nauhnyae urang am matie manguburkan n urang am matie iyae kanieie, tatapie kolai harus ingkas umaekan baritakan bungie Karajaan Hatalla.'' ⁶¹ Lalue, tege siku urang mulae bapaner, Akue akan umae Kolai, Tuhan, tatapie izinkan akue baparah lobih holue akan kaiuargakue.'' ⁶² Yesus bapaner akan iyae, ''Hontae arae siku urang jam am jari mampara mamabajak sawahnyae, tapie masih baulang ka balakang, iyah hontae pantas akan Karajaan hatalla.''