¹ Keken katika, urang banya bahamur ka damping-Inya nyaman manongar bungie Allah. Keken iyah, Yesus badirie sisi danau Genesaret, ² umakan maila dua jukung am lagie bahonti ka sisi danau iyah, tapi kawan palau jadie maluar mula jukung-jukung iyah umakan lagie mamasu jala urang. ³ Yesus naie ka suti jukung, iyah hompu Simon umakan marentah Simon mangayuh jukung manyauh koci mula natai. Limah iyah, Yesus duru umakan malajar urang banya mula tingie jukung. ⁴ Limah jadi bapaner, Yesus bapaner ka Simon, "Ingkas nguang homan arai am lalam umakan tibar jalamu nyaman manangkap lau." ⁵ Simon manimat, "Guru, kamie bagawi satota malam, tapie honta baulih apa-apa! Tapie, Kolai am marentah, aku akan manibar jala itie." ⁶ Umakan, katika urang mangawienya, urang manangkap banya lau sampai jala urang nampara barabit. ⁷ Limah iyah, urang mamorie tanae ka kawal-kawal urang ka jukung am bukan nyaman datang umakan marompuh urang. Limah iyah, datang kawal-kawal urang umakan maisi kadua jukung iyah honie lau sampai jukung urang peres. ⁸ Katika Simon Petrus maila hal itie, inya sujud ka paharap Yesus umakan bapaner, " badari mula aku, Tamangung, sabab aku iyah urang am badosa!" ⁹ Petrus bapaner bera iyah sabab inya umakan uras urang am barota inya mansai ramie laie banya lau am urang tangkap. ¹⁰ Bera iyah jam Yakobus umakan Yohanes, ana-ana Zebedeus, am bakawal akan Simon. Yesus bapaner ka Simon, "Hinang gola. nampara keken itie, kolai akan manjala kalunen." ¹¹ Limah urang manarik jukung-jukung urang ka natai, urang maningal uras am tege umakan uma Yesus. Urang am Kanyaman Kusta Disangkae ¹² Tege arie, Yesus tege ka kota. Ka kota iyah, tege siku urang am tuwuhnya ponuh kusta. Katika urang iyah maila Yesus, Inya basujud sampai muhanya kona tanah umakan manyomah ka-Inya, "Tamangung, jaka Kolai hona, Kolai ulih marasih aku." ¹³ Limah iyah, Yesus maulur jarie-Nya umakan manyoput urang iyah. Uja-Nya, "Aku hona jadiam barasih." Keken iyah jam, panyakit kusta urang iyah hila. ¹⁴ Tapie, Yesus marentah urang iyah nyaman honta mamaner ka sapa jam umakan bapaner, "Ingkas umakan tampai arepmu ka imam. borie hajat kaul laie karigasmu bera am diparentah Musa akan tana akan urang. ¹⁵ Kabar malaie Yesus sasar tasiar sampai banya urang datang bakumpul nyaman manongar Inya umakan nyaman disangkae mula panyakit urang. ¹⁶ Tapie, Yesus rajin badari bakolit ka homan-homan sunie nyaman badoa. Urana am Lumpuh Disangkae ¹⁷ Keken katika, katika Yesus lagi malajar, urang-urang Farisi umakan ahli-ahli Taurat am datang mula uras kota mula daerah Galilea, Yudea, umakan kota Yerusalem jam duru ka koyah. Umakan, kuasa Tuhan barota Yesus sampai Inya ulih manyangkae urang banya. ¹⁸ Limah iyah, tampa babarapa urang maincang siku urang lumpuh ka tiongie homan tidurnya, umakan urang bausaha manaingnya tamae umakan mangora urang iyah ka paharap Yesus. ¹⁹ Tapi, laie urang honta manapat jalan nyaman manaing urang iyah tama laie urang bahamur, naie urang ka tingie hatap umakan manojun urang lumpuh iyah barota umakan homan tidurnya ka tonga-tongah ka paharap Yesus. ²⁰ Katika maila iman urang, Yesus bapaner, "Uii Manyarie, dusamu jadi diampun." ²¹ Ahli-ahli Taurat umakan urang-urang Farisi nampara batanya-tanya, " Sapa Orang am manyangkal Allah itie? Sapa am ulih maampun dusa-dusa kacuali Allah meh?" ²² Katika Yesus ingat pikiran urang, Inya bapaner, "Ngapa kolai batanya bera iyah lalam hatimu? ²³ manih am lobih nyaman, maner 'Dusa-dusamu jadi diampun' atau 'Huas umakan bajalan ja'? ²⁴ Tapi, nyaman kolai ingat iyah am Anak Kalunen bakuasa ka bumi nyaman maampun dusa," Yesus bapaner ka urang lumpuh iyah, "Aku bapaner ka kolai: Huas, incang homan tidurmu umakan pulang ja." ²⁵ Katika iyah jam, urang iyah salenga badirie ka paharap uras urang umakan maalap homannya galing, limah iyah bajalan pulang samil mamuji Allah. ²⁶ Uras urang iyah mansaie ramie umakan mamuji Allah. Umakan diponuh asa pangola am bakah ka kuasa Allah, urang bapaner, "Arie itie kami maila hal-hal am luar biasa!" Lewi Mauma Yesus ²⁷ limah iyah, Yesus maluar umakan maila siku urang pangumpul pajak banama Lewi am lagie duru ka homan pangumpul pajak. Yesus bapaner kainya, "Uma Aku." ²⁸ Maka Lewi jam badirie, maningal urasnya, umakan uma Yesus ²⁹ Limah iyah, inya mangaruh pesta bakah akan Yesus ka rangaunya. Banya pangumpul pajak umakan urang-urang bukan am makan barota urang. ³⁰ Tapie, urang-urang Farisi umakan ahli-ahli Taurat nampara mangutu nahiu ka murid-murid Yesus, "Ngapa kolai makan museh barota kawan pangumpul pajak umakan urang-urang badusa?" ³¹ Yesus manimat umakan bapaner ka urang, "Honta urang-urang barigas am mamerlu tabib, tapi urang-urang sakit. ³² Aku datang honta nyaman manimai urang bujur, tapie nyaman manimai urang-urang badusa nyaman urang batubat." Orang Farisi Mambaning Murid Yohanes umakan Yesus ³³ Urang bapaner ka Yesus, "Murid-murid Yohanes Pambaptis rajin bapuasa umakan badoa, bera iyah jam murid-murid urang Farisi. Tapie, murid-murid-Mu tarus makan umakan minum." ³⁴ Yesus bapaner ka urang, "Ulih kolai marentah kawan pangiring pangantin kalakie nyaman bapuasa katika pangantin kalakie iyah masih barota-rota umakan urang? ³⁵ Tapie, arie-arie iyah akan datang, katika pangantin kalakie iyah dialap mula urang, umakan keken arie-arie iyah jam urang bapuasa." ³⁶ Yesus jam mangesah umpama itie ka urang, "Honta siku urang jam akan marabit satota kain mula pakaian am baharu nyaman manamal pakaian am jadi lamat. Laie jaka bera iyah, urang iyah akan marusak pakaian am baharu, umakain kain panamal mula pakaian am baharu iyah honta cucuk umakan pakaian am lamat. ³⁷ Bera iyah jam mayan ara siku urang jam manyura angur baharu ka lalam kantong kulit am lamat. Angur am bahari iyah akan marabit kantong kulit am lamat sampai angur iyah akan tumpah umakan kantong kulitnya akan hancur. ³⁸ Angur am baharu harus digora ka lalam kantong kuliot am baharu. ³⁹ Honta siku urang jam am limah mahirup angur lamat, hona mahirup angur baharu sabab urang bapaner, " Angur am lamat lobih nyame."