¹ Arie raya Wadai Honta Baragi am dijoku arie Paskah jadie damping. ² Imam-imam kapala lalue ahli-ahli Taurat mangau cara akan mamati Yesus, laie urang gola taharap urang banya. Pangkhianatan Yudas ³ Limah iyah, tama ja Setan ka lalam Yudas, am dijoku Iskariot. Inya yaham salah suti mula kadua bolas murid. ⁴ Maka, badari ja Yudas lalue barunding dengan imam-imam kapala lalue pangawal Bait Hatalla tuntang bera apa inya baulih manyorahkan Yesus ka urang. ⁵ Lalue, urang senga rami lalue sapakat akan mamorinya duit. ⁶ Maka, Yudas satuju mulai mangau kasempatan akan manyorahkan Yesus ka urang saat honta tege urang banya. Hidangan Paskah ⁷ Limah iyah, senga arie raya Wadai Honta Baragi, iyahja saat akan mampersembahkan ana domba Paskah. ⁸ Metuh arie iyah, Yesus manyuruh Petrus rang nua Yohanes, uja-Nya, ''Badari keh siapkanja makanan Paskah akan diri museh.'' ⁹ Uja urang ka Yesus, ''Ka manih kah Kolai hona nyaman kami masiapkannya?'' ¹⁰ Jawab Yesus ka urang, ''Laie kolai jadi tama ka kota, kolai akan badapat dengan saurang kalaki am manaing kendi; iringja inya ka dangau am akan tamanya, ¹¹ lalue uja kan ja ka hompu dangau iyah, 'Guru batanya ka kolai: Ka manihkah ruang tamu homan Aku baulih makan Paskah barota murid-murid-Ku?' ¹² Maka, inya akan manunyukan ka kolai sabuah ruangan bakah ka lantai tingi, am paobatannya jadi siap. Pasiapkanja makanan akan diri ka koyah.'' ¹³ Lalue, Petrus barota Yohanes badari lalue badapat urasnya tarjadi bera am dijokukan Yesus lalue urang pun mampersiapkan makanan Paskah. Parjamuan Paskah ¹⁴ Laie jadi waktunya, Yesus dengan kawal rasul duru makan ka sakaliling meja. ¹⁵ Limah iyah, Yesus baparah ka urang, ''Aku hona sakali makan hidangan Paskah itie barota kolai, sahompan Aku sia-sia. ¹⁶ Laie Aku baparah ka kolai, Aku honta akan mamusehnya mula sampai hal itie digenap lalam Karajaan Hatalla.'' ¹⁷ Lalue, Yesus mangalap cangkir baisi anggur lalu maucap syukur, limah iyah baparah, ''Alapja cangkir itie lalue bagikan ja ka antara kolai. ¹⁸ Laie, Aku baparah ka kolai bahwa mulai botie tie Aku honta akan marai anggur sampai Karajaan Hatalla datang.'' ¹⁹ Limah iyah, Yesus mangalap wadai lalue maucap syukur, Inya mamocah-mocahkan wadai iyah lalu mamorikannya ka urang samil baparah, ''Wadai itie yaham tubuh-Ku am dibori ka kolai; ngaruh itie sabagai paringatan akan Aku.'' ²⁰ Sakian jam, jadie makan, Yesus mangalap cangkir anggur lalue baparah, ''Cangkir am ditumpahkan bagimu itie yaham Perjanjian baharu lalam darah-Ku. Mamarah tuntang Urang am Manyorahkan Yesus ²¹ Akan tapie, ila ja, jari urang am akan manyorahkan Aku tege barota dengan Aku ka meja itie. ²² Laie, Ana Kalunen akan badari dengan cara bera am jadi ditotapkan, tapie calaka ja urang am manyorahkan Inya!'' ²³ Murid-murid-Nya batanya suti samah am bukan tuntang sapa ka antara urang am akan mangaruhkannya. Jadija Urang am Malayan ²⁴ Bakalahi jam am tajadi ka antara kawal rasul tuntang sapakah ka antara urang am dianggap paling bakah. ²⁵ Akan tapie, Yesus baparah ka urang, ''Raja-raja bangsa am honta mangasene Tuhan bakuasa tingi rakyatnya, lalue urang-urang am bakuasa tingi raja-raja iyah dijoku 'Palindung Rakyat.' ²⁶ Amun, kolai umet bera iyah. Sabaliknya, am paling bakah ka antara kolai harus bartindak bera am paling mura, lalue pamimpin harus manjadi bera palayan. ²⁷ Sapa am lobih bakah, urang am duru makan atau am malayan? Bukankah urang am duru makan? Amun, Aku tege ka tongah-tongahmu sabagai urang am malayan. ²⁸ Kolai yaham urang am totap barota-Ku lalam pancobaan-Ku. ²⁹ Laie iyah, Aku mamorikan ka kolai sabuah karajaan, bera am diborikan Bapa-Ku ka-Aku, ³⁰ nyaman kolai baulih makan lalue marai semeja dengan-Ku lalam Karajaan-Ku. Lalue, kolai akan duru ka tingi takhta akan manghakim kadua bolas suku Israel.'' Petrus akan Manyakali Yesus ³¹ ''Simon, Simon, dongarkan Aku. Setan manuntut akan manampi kolai bera gandum, ³² tapie Aku jadie badoa akan kolai nyaman imanmu umet jatu. Lalue, jadi kolai batobat, kuatkan ja manyari-manyarimu.'' ³³ Amun, Petrus baparah ka Yesus, ''Tuhan, aku siap tama kapanjara bahkan mati barota-Mu!'' ³⁴ Jawab Yesus, ''Aku baparah ka kolai, Petrus, arie itie manu jagau honta akan mancuku sahompan tolu kali kolai marongka bahwa kolai mangenal Aku.'' Basiap-Siapja Maharap Kasulitan ³⁵ Limah iyah, Yesus batanya ka kawal murid, ''Laie Aku mamutus kolai tanpa kantong duit, tas, rang nua sandal, apakah kolai kakurangan sasuatu?'' Jawab urang, ''Honta.'' ³⁶ Uja-Nya ka urang, ''Amun botie tie, sapa pun am hompu kantong duit rang nua tas, taingja. Lalue, sapa am honta hompu pisau, ubahja inya manyual jubahnya lalue mamoli pisau. ³⁷ Laie, Aku baparah ka hemu bahwa apa am tatulis lalam Kitab Suci iyah harus digonap ka lalam Aku, 'Inya akan tahitung barota urang-urang badosa.' Yesaya 53:12 Laie, am tatulis tuntang Aku sadang tajadi botie tie.'' ³⁸ Lalue urang baparah, ''Ilaja Tuhan, ka kotie tege dua pisau.'' Lalue, Yesus baparah ka urang, ''Itie cukup.'' Yesus badoa ka Taman Getsemani ³⁹ Limah iyah, Yesus kaluar lalue badari bera ka Bukit Zaitun bera am biasa ngaruhkan-Nya; lalue murid-Nya jam badari ma iring Inya. ⁴⁰ Laie Yesus sampai ka homan itie, Inya baparah ka urang, ''Badoaja nyaman kolai umet tama ka lalam pancobaan.'' ⁴¹ Limah iyah, Yesus manjauhkan kaniri mula urang kira-kira sajauh manih batu, ditibar lalue balutut lalue badoa, ⁴² ''Ompai, jakai Kolai hona, ngalap cawan iyah mula-Aku. Akan tapie, umet ja kahona-Ku am tajadi, bukan kahona-Mu.'' ⁴³ Jadi itie, saurang malaikat mula surga manampakan kaniri ka-Inya lalue manguatkan-Nya. ⁴⁴ Lalue, lalam sia-sia-Nya, Inya badoa lobih bujur-bujur mula; bapoluh-Nya manjadi bera tetesan darah am menetes ka tanah. ⁴⁵ Laie Yesus jadi badoa, Inya ingkas ka murid-murid-Nya lalue baulih urang lagi tidur laie basedih. ⁴⁶ Yesus baparah ka urang, ''Ngapa kolai tidur? Misik lalue badoa ja nyaman kolai umet tama ka lalam pancobaan.'' Panangkap Yesus ⁴⁷ Metuh Yesus lagi bapaner, datang sarombongan urang; lalue inya am dijoku Yudas, salah suti mula kadua bolas murid iyah, mamimpin urang. Lalue, Yudas manamping Yesus hona manyium-Nya. ⁴⁸ Tapie, Yesus baparah ka inya, ''Yudas. apakah kolai manyorahkan Ana Kalunen lalue manyium?'' ⁴⁹ Metuh murid-murid am badiri ka sakaliling-Nya maila apa am akan tajadi, urang baparah, ''Tuhan, haruskah kami manyarang honi pisau?'' ⁵⁰ Limah iyah, salah siku mula para murid iyah manyarang palayan Imam Agung sampai mamutus poning sorap kanannya. ⁵¹ Akan tapie Yesus baparah, ''Jadie, cukup!'' Lalue, Yesus manjamah poning palayan itie lalue mamaikannya. ⁵² Limah iyah, Yesus baparah ka imam kapala, kapala pangawal Bait Hatalla, lalue tuha-tuha am datang akan manangkap-Nya, ''Ngapa kolai uras datang dengan pisau lalue pantungan seakan-akan hona manangkap parampok? ⁵³ Limah Aku barota kolai ka Bait Hatalla satiap arie, kolai honta manangkap Aku. Amun, iyah ja saatnya bagimu lalue bagi kuasa kapotang.'' Petrus Marongka Yesus ⁵⁴ Jadie manangkap-Nya, urang-urang iyah pun mairing lalue manaing Yesus ka dangau imam bakah. Akan tapie, Petrus mairing urang mula jauh. ⁵⁵ Lalue jadie urang iyah mahidupkan api ka tongah-tongah halaman lalue duru barota-rota, Petrus jam duru ka antara urang. ⁵⁶ Amun, saurang palayan labini am maila Petrus duru ka damping parapian iyah maila muha Petrus lalue baparah, ''Urang itie jam barota dengan-Nya.'' ⁵⁷ Akan tapie, Petrus marongka, ujanya, ''Uy labini, aku honta mangasene Honta Inya.'' ⁵⁸ Honta lamat limah iyah, saurang am bukan mailanya lalue baparah, ''Kolai jam tarmasuk salah suti mula urang!'' Amun Petrus baparah, ''Honta, bukan aku salah suti mula urang!'' ⁵⁹ Kira-kira suti jam limah iyah, saurang am bukan mula baparah dengan parcaya, ''Pasti urang iyah jam barota dengan-Inya, laie urang jam Galilea.'' ⁶⁰ Akan tapie, Petrus baparah, ''Aku honta tahu apa am kolai panerkan!'' Saat itie jam, salagi Petrus masih bapaner, mancuku ja manu jagau. ⁶¹ Lalue, babali ja Yesus lalue manampai Petrus. Lalue, Petrus taingat akan bapaner Yesus, bahwa Inya baparah ka inya, ''Sahompan manu jagau bacuku arie itie, kolai jadi marongka Aku sabanya tolu kali.'' ⁶² Limah iyah Petrus badari ka luar lalue manangis dengan amat sedih. Bajaga Ma nyia-nyia Yesus ⁶³ Urang am manahan Yesus mulai mahina lalue manukuh-Nya. ⁶⁴ Urang manutup mata-Nya lalue baparah, ''Barnubuat ja! Sapa am manukuh Kolai?'' ⁶⁵ Urang jam mamarahkan banya hal am bukan manantang-Nya dengan mahina-Nya. Yesus ka Paharap Pamimpin Yahudi ⁶⁶ Ka arie pagi nya, tuha-tuha pamimpin Yahudi, imam-imam kapala, uras ahli-ahli Taurat bakumpul lalue manaing Yesus ka Mahkamah Agama urang. ⁶⁷ Urang baparah, ''Jakai Kolai yaham Mesias, baparahkan ja ka kami.'' Amun Yesus baparah ka urang, ''Jakai Aku mamarah ka kolai, kolai honta akan parcaya ka-Aku. ⁶⁸ Lalue jakai Aku batanya ka kolai, kolai honta akan manyawab. ⁶⁹ Akan tapie, mulai botie tie Ana Kalunen akan duru ka sorap kiba Hatalla Am Mahakuasa.'' ⁷⁰ Urang uras baparah, ''kolai bebeh, apakah Kolai Ana Hatalla?'' Yesus manyawab urang, ''Kolai ja am mamarahkan bahwa Aku ja Inya.'' ⁷¹ Limah iyah urang baparah, ''Kasaksian apa mula am diri perlukan? Diri jadi manongarnya kaniri mula nyawa-Nya!''