¹ Katikae Yesus nongga ka tinggie, Inya mailae babarapae urang tatau manamae pamorienya pamanya ka lalam patie parapah. ² Inya jam mailae siku urang balue susah manamae 2 buti duit tamagae. ³ Yesus bapaner, ''Aku baparah am sabujurnya ka kolaie, balue susah iyah mamorie lobih banya mulae uras urang tatau iyah. ⁴ Sabab, pamorie pamanya mulae kalowihnya, tapie balue iyah mamorie pamorienya mulae katapasnya, iyaham mulae apae am digoraenya honie manyamung hirup.'' (Tanae-Tanae Kahapus Zaman) ⁵ Katikae babarapae murid bapaner tahoyue Dangau Hatalla am diacie honie batue-batue am romis lalue pamorie, Yesus bapaner, ⁶ ''Akan datang katikaenya, uras am kolaie ilae tie kan hancur. Mayan arae suti batue gin batue am badirie tinggie batue am bukan am hontae akan jumang.'' ⁷ Lalue, kawan murid batanyae kan-Nya, "Gurue, papan iyah kan tajadi? Lalue apae tanae mun uras berae iyah tajadi?" ⁸ Timat Yesus, ''Rene-reneng supayae kolaie sosat sabab banya urang am datang mahonie namae-Ku lalue bapaner, 'Akutie Iyaham,' lalue 'Katikaenya jadi damping,' Hinangam kolaie maumae pamanya. ⁹ Tapi, katikae kolaie manongar tahoyue perang lalue mambarotak, hinang kolaie gola laie hal iyah memang puna holu tajadi, tapi pahapusnya hontae kan laca datang.'' ¹⁰ Limah Yesus bapaner kan pamanya, ''Bangsa kan huas malawan bangsa lalue karajaan akan huas malawan karajaan. ¹¹ Akan tajadi tanah bakanyah am mambahaya, bancana koporan lalue sampar panyakit. Diyah kan timul parastiwa managiat lalue tanae-tanae am giris mulae langit. ¹² Tapi, sahompan urasnya iyah tajadi, urang-urang kan manangkap lalue manggian kolaie. Pamanya kan manyorah kolaie dangau-dangau sambayang pamanya jam kan manamae kolaie ka lalam panjara. pamanya jam kan manaing kolaie maharap kawan raja lalue gubernur iyah laie nama-Ku. ¹³ Tapie, hal iyah am baie katikae kan kolaie basaksi. ¹⁴ Laie iyah, segahkan hatiemu hinang mulae mamikir apae am jadi kolaie paner honie mambela arep, ¹⁵ sabab Aku akan mamorie bunggie paner kapitar horotie akan kolaie am hontae ulih ditawu laie kawan musuhmu. ¹⁶ Kolaie di dawae laie urang tuhaemu, manyarie kalakiemu, babuhanmu, lalue kakawalanmu umakan pamanya kan mampatie saruai urang mulae kolaie. ¹⁷ Kolaie kan pangili uras urang laie nama-Ku. ¹⁸ Tapie, salamar balau mulae palaemu am hontae kan jatue. ¹⁹ Laie katukei umakan kasabarmu, kolaie kan baulih hirup.'' (Kabar tahoyue Kahancur Yerusalem) ²⁰ Nonae, kolaie mailae kota Yerusalem dikapung laie kawan pasukan tantara, kolaie mangasene bahwa kahancurnya jadi damping. ²¹ Ka ketuh iyah, urang-urang am tege ka wilayah Yudea uras badarie kabukit, urang-urang am tege kalalam kota uras maluar badarie mulae kota, lalue urang-urang am tege ka desa-desa hontae tahue tamae ka Kota Yerusalem. ²² Iyaham arie-arie am dihukum supaya uras hal am jadi tatulis tajadi. ²³ Gawatam labinie-labinie am metuh nganung umakan am manyusu ka metuh iyah sabab kan tajadi sampar am manyangit ka daerah itie, lalue pangusarnya manyangit jam ka bangsa itie. ²⁴ Pamanya kan dipatie honie padang lalue ditangkap laie bangsa-bangsa. Kota Yerusalem akan di kuasae bangsa-bangsa asing datang ka masa kajaya bangsa-bangsa iyah am pahapusnya.'' (Panatang Ana Kalunen laie Kamuliaan) ²⁵ Akan tege tanae-tanae ka mataarie, bulan, umakan bintang-bintang. Ka tanah, bangsa-bangsa kan gola bingung laie bunggie guhup tasi uamakan galumang babah. ²⁶ Urang-urang akan tujah laie pangola lalue manantie hal am kan tajadi tinggie tanah itie sabab uras kuasae am tege ka langit dideroh. ²⁷ Limah iyah, pamanya kan mailae Ana Kalunen datang tinggie amun honie kuasae umakan kamuliaan am bakah. ²⁸ Katikae hal iyah nampara tajadi, badiriam lalue incang palaemu laie katikae kolaie mamalas jadi damping.'' (Saupamae Puhun Ara) ²⁹ Limah Yesus mangesah suti saumpamae akan pamanya: ''Ilaekeh puhun ara lalue uras puhun am bukan. ³⁰ Pabila puhun-puhun iyah manumuh daunnya, kolaie kan mangarti lalue manahoyue bahwa musim pori jadi damping. ³¹ Beweh jam kolaie mailae uras iyah tajadi, kolaie kan maingat bahwa Karajaan Hatalla jadi damping. ³² Sabujurnya Aku bapaner kan kolaie, tarunan itie hontae kan matie sampaie uras hal itie tajadi. ³³ Langit umakan tanah akan hila, tapie pamaner-Ku hontae kan hila.'' (Basasiap Sariyaam) ³⁴ Barene-reneng nyaman hatimu hontae ponuh laie bapesta, bamawu-mawu, lalue watirkan hirup. Lalue, arie iyah akan datang malaie kolaie berae parangkap. ³⁵ Sabab, arie iyah akan datang ka tiggie sagala am uras diyam ka tanah itie ³⁶ Bajaga-jaga am tiap katikae lalue batukei badoa supayae kolaie baulih kaonyae honie malopas nirie mulae uras hal am kan tajadi iyah lalue honie badiri ka paharap Ana Kaluen.'' ³⁷ Metuh siang arie Yesus malajar urang banya ka lalam Dangau Hatalla, tapi metuh malam arie Inya ingkas ka kota lalue bamalam ka bukit Zaitun. ³⁸ Laleu sung arie uras urang datang ka Inya ka lalam Dangau Barasih hona manongar-Nya malajar.