¹ Metuh iyah, Kaisar Agustus maluar parintah nyaman diarakan sensus akan uras penduduk ka saluruh dunia. ² Itie am sensus penduduk am pertama kali diarakan metuh Kirenius jadie gubernur ka Siria. ³ Maka, uras urang baulang ka kota asal urang kaniri-kaniri nyaman mendaftarkan kaniri. ⁴ Yusuf jam maningal Nazaret, kota ka Galilea, lalue manguang Yudea, ka kota Daud am di joku Betlehem, laie inya baasal mula garis katurunan Daud, ⁵ nyaman inya didaftarkan barota kan Maria, tunangannya, am metuh nganung. ⁶ Metuh Yusuf rang nua Maria tege ka Betlehem, sampai waktunya akan Maria hona barana. ⁷ Maria jam barana Ana kalakinya am pertama. Inya mamungkus-Nya honie kain talampin lalue mangaling-Nya kalalam lulang lalue mayan ara kamar akan urang hona diam. ⁸ Ka daerah am samah, tege babarapa ana buah am diam ka padang nyaman manyaga kawanan domba urang metuh malam. Nyalenga, malaikat Tuhan badiri ka paharap urang lalue kemuliaan Tuhan basinar ka sakaliling urang lalue urang bujur gola. ¹⁰ Tapie, malaikat iyah baparah ka urang, "Hinang gola laie dongar, Aku mamarah ka kolai kabar baie tuntang sukacita bakah am diperuntukkan akan uras bangsa. ¹¹ Metuh arie itie, jadie lahir akan kolai siku Juru Selamat, iyah am Kristus, Tuhan, ka kota Daud. ¹² Itie am tana akan kolai: Kolai akan manapat Onin am dibungkus honie kain talampin lalue galing kalalam pangkat." ¹³ Nyalenga, tampa barota-rota malaikat iyah sakumpulan bakah tentara surgawi am mamuji Hatalla lalue baparah, ¹⁴ "Kemuliaan akan Hatalla ka homan am mahatingi lalue damai sejahtera ka bumi, ka antara urang-urang am bakahona ka Inya." ¹⁵ Metuh para malaikat maningal para umat iyah lalue baulang ka surga, para umat iyah baparah suti ka am bukan, "Ayo dirie ka Betlehem nyaman maila hal-hal am jadie tajadie itie, am jadie Tuhan parah ka dirie." ¹⁶ Lalue, urang copat-copat badari lalue manapat Maria rang nua Yusuf, lalue Onin am galing ka lulang. ¹⁷ Metuh para umat maila Inya, urang mangesah paner am jadie diparah ka urang tuntang Ana iyah. ¹⁸ Lalue, uras urang am manongar hal iyah hengan tingi hal-hal am diparah para umat ka urang. ¹⁹ Tapie, Maria mangora hal iyah lalue mamandam lalam hatinya. ²⁰ Lalue, para gembala baulang ka domba-domba urang samil memuliakan lalue mamuji Hatalla tingi urang am jadie urang ila lalue dongar bera am di parah ka urang. ²¹ Lalue, metuh ganap lapan arie hona manyunat Onin iyah, nama-Nya dijoku Yesus, bira nama am dibori laie malaikat sahompan Inya dikanung kalalam rahim. ²² Metuh arie penyucian sasuai hukum Musa limah jadie, Maria rang nua Yusuf manaing Yesus ka Yerusalem akan manyorah-Nya ka Tuhan, ²³ bira am tatulis lalam hukum Tuhan, "Satiap ana kalaki tungal harus dikuduskan akan Tuhan ²⁴ lalue akan mamori persembahan sasuai akan apa am diparah lalam hukum Tuhan, iyah am sapasang burung dara dua iku burung merpati bia." ²⁵ Tege siku kalaki banama Simeon am diam ka Yerusalem. Inya iyah am urang am bujur lalue saleh, am mananti-nanti penghiburan Hatalla tingi Israel, lalue Roh Barasih barota inya. ²⁶ Roh Barasih mamarahnya amun inya hinta akan mati sahompan maila Kristus am diurapi Tuhan. ²⁷ Lalue, Simeon datang ka Dangau Hatalla tingi tuntunan Roh Barasih, metuh Yusuf rang nua Maria manaing Onin Yesus ka Dangau Hatalla hona mangaruh ka Inya apa am jadie ditentu laie hukum Taurat. ²⁸ Limah iyah, Simeon manangung Onin iyah lalue mamuji Hatalla, ujanya, ²⁹ "Wayah itie, o Tuhan, kiranya Kolai maizin palayanan-Mu itie badari lalam damai, sasuai kan firman-Mu; ³⁰ laie mataku jadie maila kasalamatan-Mu, ³¹ am jadie kolai sadia ka paharap uras bangsa; ³² iyah am cahaya am akan manorang bangsa-bangsa am hinta mangasene Tuhan, lalue am jadie kemuliaan akan umat-Mu Isreal," ³³ Yusuf rang nua inay Ana iyah jadie bingung tingi apa am diparah Simeon tuntang Inya. ³⁴ Limah iyah, Simeon memberkati urang lalue baparah ka Maria, inay Yesus, "Dongar, Ana itie jadie ditotapkan akan manyatu lalue mahuas banya urang ka Israel, lalue jadie tana am dituntang banya urang. ³⁵ (Lalue, sebilah pisau akan manucu jiwamu) nyaman isie hatie banya urang akan dinyatakan." ³⁶ Ka koyah jam tege siku nabiah banama Hana, ana Faneul mula suku Asyer. Inya jadie bujur tuha. Inya baya hidup uma lakinya palamat tujuh tahun sahompan kawin, ³⁷ lalue limah iyah jadie janda sampai umur 84 tahun. Inya hinta basa maningal Dangau Hatalla, tapie siang rang nua malam lalue bapuasa lalue badoa. ³⁸ Metuh iyah, Hana datang lalue inya maucap syukur ka Hatalla lalue mangesah tuntang Yesus kauras urang am mananti-nanti penebus Yerusalem. ³⁹ Limah Yusuf rang nua Maria mangaruh sagala suatu sasuai hukum Tuhan, urang baulang ka Galilea, ka kota asal urang, iyah am Nazaret. ⁴⁰ Ana iyah jam batumuh samakin bakah, onya, ponuh laie hikmat, lalue Hatalla memberkati-Nya. ⁴¹ Satiap tahun, urang tuha Yesus badari ka Yerusalem metuh Arie Raya Paskah. ⁴² Metuh Yesus baumur dua bolas tahun, urang badari ka koyah sasuai kebiasaan arie raya iyah. ⁴³ Limah perayaan iyah berakhir, urang pulang. Tapie Yesus totap tingal ka Yerusalem tanpa sapaingat urang tuha-Nya. ⁴⁴ Laie urang tuha Yesus maingat amun Inya tege kaantara rombongan, urang jam mangaruh pajalan sampai saarie ponuh. Lalue, urang nampara mangau-Nya ka antara kaum keluarga lalue urang-urang am rang kasene. ⁴⁵ Metuh urang hinta manapat Yesus, urang baulang ka Yerusalem hona mangau-Nya. ⁴⁶ Metuh tolu arie, urang manapat Yesus ka Dangau Hatalla metuh duru kaantara guru-guru agama, samil manongar lalue mamori pertanyaan ka urang. ⁴⁷ Uras urang am manongarnya bingung akan sapaingat lalue jawaban-jawaban-Nya. ⁴⁸ Metuh urang tuha-Nya maila Inya, urang jam bingung. Lalue, inay nya batanya, "Na, ngapa kolai mangaruh itie taharap kamie? Ompai-Mu lalue aku bujur bagonang mangau Kolai." ⁴⁹ Timat Yesus ka urang, "Ngapa kolai mangau Aku? Hinta ingat kolai amun Aku pasti tege kadangau Bapa-Ku?" ⁵⁰ Tapie, urang hinta ngerti apa am diparah-Nya ka urang. ⁵¹ Lalue, Yesus pulang barota urang ka Nazaret lalue mauma urang. Tapie, inay-Nya mangora paner iyah lalam hatinya. ⁵² Yesus batumuh semakin bakah lalue semakin bijaksana. Inya jam semakin disuka Hatalla lalue kalunen.