¹ Maka, tama Yesus lalu malalue kota Yerikho. ² Koyah tege siku urang kalaki am banama Zakheus, inya inyaham kapala kumpulan pajak lalu siku urang am kaya. ³ Inya bausaha mailae Yesus, tapie honta tahu laie tahalang urang banya; laie tubuhnya pana. ⁴ Jadi, Zakheus badiri manyahelu urang banya lalu maie puhun ara nyaman mailae Yesus Inya akan malalue jalan iyah. ⁵ Metuh Yesus sampai ka homan Zakheus tege, Inya manadah lalu bapaner ka inya,''Zakheus, laca turun laie arie itie Aku harus numpang ka dangaumu.'' ⁶ Maka, Zakheus jam laca turun lalu manarima Yesus lalu basukasita. ⁷ Tapie, metuh uras urang mailae hal iyah, urang manpara mangutu lalu bapaner,''Inya jadie tamu ka dangau siku urang am badosa.'' ⁸ Limah iyah, Zakheus badiri lalu bapaner ka Tuhan,''Tuhan, ilae, saparu mula hartaku akan kuborikan ka urang miskin, lalu amun aku jadi manggelapkan harta siku urang, aku akan mangalapnya 4 kali lipat.'' ⁹ Maka, Yesus bapaner ka Zakheus,''Mula arie itie, kasalamatan jadie datang ka tingie dangau itie laie urang itie jam ana Abraham. ¹⁰ Laie, Ana Kalunen datang nyaman mangau lalu manyalamatkan am hilae.'' (Hamba am Setia umakan Hamba am Jahat) ¹¹ Samantara urang manongar uras itie, Yesus malanjutkan lalu bakesah suti perumpamaan laie Inya jadi damping akan Yerusalem lalu laie urang manyangka Karajaan Hatalla akan laca datang. ¹² Liae iyah, Inya jam bapaner,''Siku urang bangsawan badari ka negeri am jauh nyaman kona angkat jadi raja, lalu limah iyah inya akan pulang. ¹³ Limah iyah, tuan iyah mangumpul sapuluh urang palayannya lalu mamori urang duit 10 mina. Ujanya ka urang,'Badaganglah honi duit itie sampai aku baulang.' ¹⁴ Akan tapi, urang sabangsanya pangilikan inya lalu mangirimkan perwakilan limah inya ingkas lalu bapaner,'Kami tonta hona urang itie jadie raja ka tingie kami.' ¹⁵ Limah kona angkat jadi raja, bangsawan iyah baulang lalu mamarintah hamba am jadi kona borinya duit iyah kona timai maharap inya nyaman inya tahu ingat barapa bakah kauntungan am urang dapat mula badagang. ¹⁶ Palayan am partama datang lalu bapaner,'Tuan, duit 1 mina am heku iyah jadi mahasilkan 10 mina mula.' ¹⁷ Raja iyah bapaner ka inya,'Romis bujur, ui kolai hamba am baie! Liae kolai satia lalam urusan am koni, kolai akan mamarintah sapuluh kota.' ¹⁸ palayan am kadua jam datang lalu bapaner,'Tuan, diut 1 mina am heku iyah jadi mahasilkan 5 mina.' ¹⁹ Lalu,sang raja bapaner ka hamba iyah,'Bakuasalah kolai ka 5 kota.' ²⁰ Limah iyah, datang hamba am siku mula lalu bapaner,'Tuan, itie duit 1 mina am heku am aku gora lalam sapu tangan. ²¹ Aku gola kan kolai laie kolai am karas. Kolai mangalap apa am honta basa kolai gora lalu mamanen apa am honta basa kolai tanam.' ²² Limah iyah, raja iyah bapaner ka inya,'Aku akan maadillimu sasuai akan pamanermu, ui kolai hamba am jahat! Jadie, kolai ingat aku iyaham urang am karas, am mangalap apa am honta basa kugora lalu mamanen apa amhonta aku tanam? ²³ Amun bera iyah, ngapa kolai honta maomah duitku ka homan urang manjalankan duit sampai katika aku baulang, aku akan manarima duitku iyah baserta bunganya?' ²⁴ Lalu, raja iyah bapaner ka urang am badiri diah,'Alap mina iyah mula inya lalu borikan ka urang am bagora 10 mina.' ²⁵ Tapie, urang bapaner ka sang raja,'Tuan, hamba iyah jadie bagora 10 mina.' ²⁶ Jawab raja iyah,'Aku bapaner ka kolai, satiap urang am bagora akan kona bori lobih, tapi mula urang am honta bagara apa jam, uras am henya akan kona alap. ²⁷ Akan tapi, tentang musuhku am honta hona aku jadi raja tangie urang, taing urang kotie lalu patiekan urang ka paharapku.''' (Yesus Kona samut Jadie Raja) ²⁸ Limah Yesus mamarah hal iyah, Inya bajalan manyahelu manguang Yerusalem. ²⁹ Metuh Inya sampai damping banua Betfage umakan Betania, damping bukit am banama Bukit Zaitun, Inya mautus dua urang murid-Nya. ³⁰ Uja-Nya ka urang,''Badari ka banua am tege ka paharapmu iyah. Lalu, metuh kolai tama koyah, kolai akan mailae siku ana keledai am takowat lalu hompan basa kona taie urang. Lopaskan ana keledai iyah lalu taingkan kotie. ³¹ Amun mayan urang batanya ka kolai,'Ngapa kolai naing keledai iyah?',Parahkan bera itie: Tuhan mamarlunya ³² Lalu, badari ka dua murid am kona utus-Nya iyah lalu badapat sagalanya homan bera am jadi kona parah-Nya ka urang. ³³ Salagi urang malopas ana keledai iyah, hompunya batanya ka urang,''Ngapa kolai malopas ana keledai iyah?'' ³⁴ Urang jam manjawab,''Tuhan mamarlunya.'' ³⁵ Lalu, urang manaing ana keledai iyah ka Yesus lalu maomahkannya pakaiannya ka tingie punggung keledai iyah, limah iyah malumpatkan Yesus ka tingienya. ³⁶ Metuh Yesus malalue pajalan, urang mahalintang pakaian urang ka jalan. ³⁷ Lalu, metuh Yesus jadi damping Yerusalem, iyaham ka jalan am munurut mula arah bukit Zaitun, uras pangikut-Nya nampara mamuji Hatalla honi sukacita umakan suara am nyaring. Urang basyukur ka Hatalla atas uras mukjizat am jadi urang ilae. ³⁸ Urang basoru, ''Kona berkatlah Inya am datang jadi Raja lalam nama Tuhan, damai sejahtera ka surga lalu kamuliaan ka homan am mahatingie!''Mazmur 118:26 ³⁹ Babarapa urang Farisi mula karumunan urang banya iyah bapaner ka Yesus,"Guru, salukan murid-Mu." ⁴⁰ Akan tapie, Yesus manjawab,"Aku bapaner ka kolai, amun urang sunie, batu-batu itie am akan basoru." (Yesus Manangis Yerusalem) ⁴¹ Metuh Yesus jadie damping kota Yerusalem lalu mailae kota iyah, Inya jam nangis. ⁴² Uja-Nya,"Saindainya arie itie kolai ingat apa am datang damai sejahtera ka tingiemu. Akan tapie, wayah itie hal iyah mantabu mula matamu. ⁴³ Laie akan datang waktunya metuh musuhmu akan mambangun tembok panhalang ka sakalilingmu lalu magapungmu mula sagala arah. ⁴⁴ Urang akan maruntuhkanmu, kolai umakan anamu am balinung ka tembokmu. Lalu, urang honta akan manyiksakan suti batu am bukan ka lalammu laie kolai honta kasene waktu netuh Hatalla malawatmu." (Yesus Mausir Urang am Bajualan ka Bait Hatalla) ⁴⁵ Limah iyah, Yesus tama ka Bait Hatalla lalu manpara mausir maluar urang am bajualan koyah. ⁴⁶ Uja-Nya ka urang,"Tege tatulis:'Dangau-Ku akan jadi dangau doa,' tapie kolai metuh manjadikannya sarang parampok!" ⁴⁷ Lalu, Yesus malajar ka Bait Hatalla satiap arie. Tapie, imam-imam kapala, ahli Taurat, lalu para pamimpin bangsa iyah mangau cara nyaman mampati-Nya. ⁴⁸ Akan tapi, urang honta ingat apa ulah caranya laie uras urang marigap toguh pamaner Yesus.