¹ Limah iyah, Yesus mangesah suti saumpamae akan murid-murid-Nya akan manahoyue pamanya bahwa pamanya harus badoa umakan hinang koni hati. ² Ujae-Nya, ''Ka suti kota, tege siku hakim am hontae gola akan Hatalla lalue hontae mahormar urang bukan. ³ Ka kota iyah, tege siku urang balue am tarus-manarus datang manguang hakim iyah lalue bapaner. 'Borikan kaadilan akan aku ta hadap lawanku.' ⁴ Akan sabarapae lamatnya. hakim iyah hontae hona marompuh balue iyah. Tapi, limah iyah hakim bapaner lalam hatinya, 'Mustinya aku hontae gola akan Hatalla lalue hontae mahurmat sapae ja, ⁵ tapie laie balue iyah tae-tarusan mangariseku, aku akan mamorie kaadilan akannya supayae inya hontae manaur akun laie panatangnya yah tae-tarusan.''' ⁶ Lalue, Tuhan bapaner, ''Dongar apae am dipaner hakim am hontae bujur yah. ⁷ Hontaekah Hatalla akan mamorie kaadil akan urang-urang am dipilih-Nya am basorue akan-Nya siang malam? Apae Inya kan lamat hale-hale marompuh pamanya? ⁸ Aku bapaner ka kolaie, Inya kan laca mamorie kaadil kan pamanya. Tapi, katikae Ana Kalunen sampaie, apae Inya mailae am ka tinggie tanah?'' (Saupamae tahoyue Urang Farisi lalue pangumpul pajak) ⁹ Yesus jam manyampaie saupamae iyah akan babarepae urang am mansaie arep pamanya bujur lalue mailae lowa urang bukan. ¹⁰ ''Tege duae urang ingkas ka Dangau Hatalla hona badoa. Am siku urang Farisi lalue am bukan iyaham urang pangumpul pajak. ¹¹ Urang Farisi iyah badirie lalue badoa tahoyue nirinya, 'Ya, Hatalla aku batarima kasih ka Kolaie laie aku hontae berae urang bukan; berae pamaksa, pamarongka, habanung, atawae berae pangumpul pajak itie. ¹² Aku bapuasa dua kali saminggu, aku mamorie sepersepuluh mulae hasil ulihku.' ¹³ Tapie, si pangumpul pajak badirie jauh, hontaemailae ka tinggie. Sabalinya ,inya manukuh-nukuh daraenya, samil bapaner, 'Ya, Hatalla siha kan akutie, am badusae itie.' ¹⁴ Aku bapaner kan kolaie, pangumpul pajak itie pulang ka dangaunya berae urang am lobih bujur mulae urang Farisi iyah sabab urang am maninggie nirienya akan paling lowa lalue urang am malowa nirienya akan ditinggie.'' (Yesus umakan Kawan-Baniya) ¹⁵ Lalue, urang-urang manaing ana pamanya am masi koni kan Yesus supaya Yesus marigapumakan mamberkat pamanya. Tapoie katikae kawan muridnya, pamanya nampara mangusar urang-urang iyah. ¹⁶ Yesus manimaie kawan babiya iyah manguang-Nya lalue bapaner, ''Nuahnya kawan babiya komi iyah manguang-Ku hinang mangirah pamanya sabab Karajaan Hatalla iyaham urang-urang am berae pamanya itie hompunya. ¹⁷ Aku mamaner am sabujurnya, kan kolaie, sapae ja am hontae manarimae Karajaan Hatalla berae siku urang babiya koni, inya hontae kan basae tamae ka lalamnya.'' (Urang Sugih umakan Karajaan Hatalla) ¹⁸ Tege siku urang pamimpin pamanya batanya ka Yesus, ''Guru am baie, apae am dikaruhku supayae ulih mawaris hirup am sapalamatnya?'' ¹⁹ Timat Yesus kannya, ''Ngapae kolaie nyokue Aku baie? Mayan arae siku urang gin am baie kacuali Hatalla kanirie. ²⁰ Kolaie jadi mangarti uras parentah-parentah itie: 'Hinang habanung, hinang mampatie, hinang mangolit, hinang marongka, umakan hormat kan ompaie inaiemu.''' ²¹ Timat urang iyah, ''Aku jadi manulat uras iyah mulae aku masih biya.'' ²² Katikae Yesus manongornya, Inya bapaner kan urang iyah, ''Masih tege suti mulae am tapas. Jualkan uras am tege di goraemu lalue boriekan ka urang-urang susah, makae kolaie bogorae panatau ka surga; lalue kotie umae Aku.'' ²³ Katikae urang iyah manongar paner Yesus, inya sakit hati sabab inya banya panatau. ²⁴ Limah iyah Yesus mailaenya lalue bapaner, ''Puna sulitnya akan urang-urang tatau tamae ka lalam Karajaan Hatalla! ²⁵ Bahkan, hona murah siku unt tamae ka luwang jarum mulae urang tatau tamae ka lalam karajaan Hatalla.'' (Am Umae Yesus kan Manarimae Hirup Sapalamatnya) ²⁶ Urang-urang am manongar paner iyah bapaner, ''Jakae beweh, sapae am tahue salamat?'' ²⁷ Timat Yesus, ''Apae am mustahil bagie kalunen iyah tahue bagie Hatalla.'' ²⁸ Lalue, Petrus bapaner, ''Ilae, kamie jadi badarie mulae uras am kamie gorae lalue umae Kolaie.'' ²⁹ Yesus bapaner ka pamanya, ''Aku baparah am sabujurnya ka kolaie, mayan siku urang gln am jadi badarie mulae dangau, binie, kulae manyarie, urang tuhae, atawae ana-ananya laie Karajaan Hatalla, ³⁰ am hontae manarimae hal iyah balipa-lipat kametuh itie, lalue kametuh am kan datang, iyaham hirup am sapalamatnya.'' (Baparah tahoyue Pampatie umakan Pampisik Yesus) ³¹ Lalue, Yesus mangumpul ka dua bolas murid-Nya lalue bapaner kan pamanya, ''Dongar, dirie akan ingkas ka Yerusalem lalue sagala am jadi di tulis laie kawan nabi tahoyue Ana Kalunen akan tajadi. ³² Inya akan disorah ka urang-urang am hontae mangasene Hatalla. Inya akan diolo-olo, dikiyan, lalue dilujah. ³³ Lalue, limah pamanya mancambuk-Nya, pamanya akan mampatie-Nya. Tapie, katikae arie am katolue, Inya akan misik mulae.'' ³⁴ Tapie, kawan murid hontae mangarti suti gin mulae hal iyah. Arti paner iyah tatawu akan pamanya laie iyah pamanya hontae paham apae ja am jadi dipaner. (Yesus Manyangkae Urang Butae) ³⁵ Kametuh Yesus jadi damping ka kota Yerikho, tege siku urang butae am metuh duru ka sisi jalan minta sadakah. ³⁶ Katikae urang butae iyah manongar urang banya lalue, inya batanya apae metuh tie tajadi. ³⁷ Diyah, urang-urang bapaner kannya, ''Yesus mulae Nazaret metuh lalue.'' ³⁸ Makae, basoru urang butae iyah, ''Yesus, Ana Daud, sihae kan aku tie!'' ³⁹ Urang-urang am bajalan holue ka paharap, mangusar urang butae iyah lalue manyuruhnya sunie. Tapie, inya malah basorue sasar karas, "Ana Daud, sihae kan aku tie!" ⁴⁰ Diyah Yesus bahontie lalue manyuruh urang butae iyah ditaing kan-Nya. Kametuh urang butae iyah damping, Inya batanya ka inya, ⁴¹ "Apae am kolaie kahona am Dikaruh kan kolaie?" Urang butae iyah timat, ''Tuhan, aku hona mataeku tahue mailae.'' ⁴² Yesus bapaner kan inya, ''Mailaeam, imanmu jadi manyangkae kolaie.'' ⁴³ Sakatikae iyah jam, inya ulih mailae lalue nampara umae Yesus samil mamuji Hatalla. Katikae urang banya mailae hal iyah, pamanya jam mamuji Hatalla.