¹ Limah iyah,Yesus bapaner kan kawan murit-Nya, ''Batu tampara pasti akan tege, tapi musibah kan urang am magaruhnya. ² Lobih baie suti batue bakah am di kowat ka lihir nya lalue inya di tibar ka lalam laut mulae inya manjadi pahalang kan ana koni itie. ³ Rene-reneng! jakae mayariemu magaruh dosae paharap kolaie. saluekan inyae; Jakae inyae mayosal kan dusaenya, ampun kan inyae. ⁴ Bahkan, jakae inyae badusae kan kolaie sabanya tujuh kalie lalam saarie, lalue pulang kan kolaie tujuh kalie samil bapaner, ,Akue mayosal,' ampun kan iyae." (Kuasae Iman) ⁵ Ujae Rasul iyah ka Tuhan, ''Tamahkan iman kamie!''' ⁶ Timat tuhan kan pamanya, ''Jakae kolaie bagorae iman sabakah gigie sawi mae, kolaie ulih bapaner kan puhun murbei itie, 'Tacabut mulae tanah lalue tatanam ka tasi,' lalue puhun iyah akan manulat kahonamu.'' (Hulun am Manulat Kahona Tuannya) ⁷ "Sapae jam mulae antarae kolaie am bagorae hulun, am lagie manaja humae umaekan manyakatik tabiri, akan bapaner kan hulunnya iyah katikae inyae baulang mulae humae, 'Ayo, duruam lalue makan? ⁸ Tapie inyae malah bapaner hulunnya iyah, 'Sariyakan pamakan akan akue lalue babajue am pantas akan umae akue salagie akue makan lalue maraie. limah iyah, harue kolaie makan lalue maraie'? ⁹ Apaejam inyae akan batarimae kasih kan hulunnya iyah laie magaruh am di rentahnya? ¹⁰ Berae iyah jam kan kolaie. Apabilae kolaie jadi manulat uras am di parintah kan kolaie, honalah kolaie bapaner, 'Kamie itie hulun am hontae barogae. Kamie cumae manulat apae am wajib kamie karuh.''' (Sepuluh Urang Kusta Disangkae) ¹¹ Metuh pajalan-Nya manguang Yerusalem, Yesus nitie helat antarae Samaria umakan Galilea. ¹² Metuh tamae ka suti desa, Inyae badapat ka sapuluh urang kusta am badirie jauh mulae Inya, ¹³ lalue pamanya basorue basuarae nyaring, ''Yesus, Guru, sihaekan kamie!'' ¹⁴ Katikae Yesus mailae pamanya, Inyae bapaner akan pamanya, ''Ingkasja lalue parahkan kolaie yah kan imam-imam.'' Diyah, katikae pamanya metuh bajalan, pamanya jadi barigas mulae panyakit. ¹⁵ Katikae siku urang pamaya mailae nirienya jadi ranaie barigas, inyae baulang lalue mamuji Hatalla karas basuarae nyaring, ¹⁶ Lalue suntup ka paharap kakie Yesus lalue batarimae kasih kan-Inya. Urang iyah iyaham urang Samaria. ¹⁷ Limah iyah, Yesus bapaner ka urang iyah, ''Tarie tege sapuluh urang am jadi barigas mulae panyakit? Kamanih samilan urang am bukan? ¹⁸ Hontae tege kah antarae pamanya am baulang akan mamujie Hatalla bukan mulae urang asing itie? ¹⁹ Lalue Yesus bapaner ka inya, ''Badiriam lalue ingkas keh, imanmu jadi mayalamatkan kolaie.'' (Panatang Karajaan Hatalla) ²⁰ Katikae ditanyae laie babarapae urang Farisi tahoyue papan Karajaan Hatalla akan datang, Yesus timat bungie pamaya lalue bapaner, Kerajaan Hatalla akan datang mayan tanae am ulih tailae, ²¹ Mayan arae urang am tege bapaner, 'Ilae, Karajaan Hatalla tege ditie!' atawae 'Karajaan Hatalla tege koyah!' laie sabujurnya Karajaan Hatalla tege ka tonga-tongah kolaie.'' ²² Limah iyah, Yesus bapaner kan murid-murid-Nyae, ''Akan datang metuhnya kolaie puna hona mailae suti arie mulae arie Ana Kalunen, tapie kolaie hontae ulih mailaenya. ²³ Urang akan bapaner ka kolaie, 'Ilae, koyah!' umaekan 'Ilae, ditie!' Tapi, hinang am kolaie ingkas lalue umae urang iyah.'' (Panatang Ana Kalunen) ²⁴ ''Sabab berae kilat am mamancar mulae hujung langit am suti ka hujung langit am bukan, beraeiyah jam Ana Kalunen ka arien-Nyae. ²⁵ Tapie, Ana Kalunen harus mandarita banya talobih holue hontae di tarimae laie katarunan itie. ²⁶ Samah, berae am jadi tajadi metuh arie Zaman Nuh, berae iyah jam nonae metuh arie Ana Kalunen. ²⁷ Urang makan maraie kawin umakan di kawinkan sampaie ka arie Nuh Tamae ka lalam banama lalue datangam banjir bakah lalue mampatie pamanya urasnya. ²⁸ Samah halnya am tajadi metuh jaman Lot, metuh iyah urang-urang makan, maraie, mamolie, manyual, mananam, lalue mambagun. ²⁹ Tapie, metuh katikae Lot badarie mulae kota Sodom, apie lalue balerang jatue mulae langit berae hujan lalue mamapatie pamanya urasnya. ³⁰ Berae iyaham tompaenyae arie katikae Ana Kalunen tampa. ³¹ Metuh arie iyah, Sapae jam am lagie tege ka hatap dangaue, lalue barang-barangnya tege ka lalam dangaue, hinamam iyae turun hona magalapnya; lalue sapae jam metuh tege ka humae, hinangam inyae pulang. ³² Ingat mah apae am tajadi ka binie Lot! ³³ Sapae jam am bausaha mahagae kosahnya, akan hilajam kosah. Lalue sapae jam am hila kosahnya, akan manyalamatkan inyae. ³⁴ Akue bapaner kan kolaie, metuh malam iyah akan tege 2 urang am tidur 1 homan tidur. Tapie, am siku urang akan ditaing, sadangkan am bukan akan ditingaljam. ³⁵ Duae labinie metuh nutu gandum. Am siku urang akan ditaing, sadangkan am bukan akan ditingalkan. ³⁶ [Berae iyah jam duae bagawie ka humae, am siku urang akan ditaing, sadangkan am bukan di tinggal.''] ³⁷ Lalue murid-murid batanyae ka Yesus, ''Ka manih, Tuhan?'' Timat Yesus ka pamanya, ''Ka manih tege bangkai, diyah tege burung holang akan bakumpul.''