¹ Para pangumpul pajak lalue urang badosa manamping ka Yesus laie manongar-Nya. ² Limah iyah urang-urang Farisi lalue ahli-ahli Taurat nampara menggerutu, "Urang itie manarima urang-urang badosa lalue makan barota urang." ³ Limah iyah Yesus mamarah saumpama itie ka urang, uja-Nya, ⁴ "Sapa kaantara kolai am hompu 100 iku domba, lalue hila siku, hinta akan maningal 99 iku am bukannya ka tayan? Bukan inya akan badari mangau am sosat iyah sampai inya manapatnya? ⁵ Lalue metuh inya manapatnya, inya akan manangung domba iyah katingi bahunya lalue basukacita. ⁶ Datang kadangau, inya akan badari manapat kawal-kawal nya lalue tetangganya lalue baparah ka urang, 'Barami barota aku laie aku jadie manapat dombaku am hila.' ⁷ Aku baparah ka kolai, bira iyah am akan tege sukacita am lobih bakah ka surga tingi 1 urang badosa am batobat mula tingi 99 urang bujur am hinta bahoni pertobatan. ⁸ Lalue labini manih am mahompu sapuluh bingkap duit perak, amun inya hila sutie bingkap kaantaranya, hinta manakil palita lalue manyapu dangaunya, lalue mangau bingkap duit iyah sacara baie-baie sampai inya manapatnya? ⁹ Lalue, amun inya manapatnya, inya manimai kawan kawalnya lalue tetangganya lalue baparah ka urang, 'Barami barotaku laie aku jadie manapat bingkap am hila iyah.' ¹⁰ Aku baparah ka kolai, bira iyah jam tege sukacita ka antara para malaikat Hatalla laie sutie urang badosa am batobat." (Saumpama Dua Ana Kalaki) Ana pamunsu maningal Ompainya. ¹¹ Limah iyah Yesus baparah, "Tege siku am mahompu dua ana kalaki. ¹² Ana am pamunsu baparah ka ompainya, 'Ompai, bori ka aku bagian harta am jadie hompuku.' Maka, ompainya mamagi kakayaannya ka kadua ananya. ¹³ Hinta lamat limah iyah, ana pamunsu iyah mamumpung uras am hompu henya, lalue badari ka negeri am jauh lalue ka koyah inya mahamur-hamur hompunya iyah lalue hirup bafoya-foya. ¹⁴ Metuh iyah inya jadie mahabis urasnya, tajadie bencana kaporan am hebat ka negeri iyah, lalue inya jam nampara bakakurangan. ¹⁵ Jadie, inya badari lalue bagawi ka siku penduduk negeri iyah, am manyuruhnya ka huma akan mamori pamakan bawie-bawienya. ¹⁶ Inya hona bujur maisi porutnya honie buah karoba am dipuseh bawie-bawie iyah, tapie hinta tege siku am mamori ka inya. Ana Pamunsu pulang ka Ompainya. ¹⁷ Metuh ana pamunsu iyah sadar, inya baparah, 'Banya gawi-gawi ompaiku am mahompu pamakan am balimpah-limpah, tapie aku ditie hampir matie kaporan. ¹⁸ Aku akan huas lalue baulang ka ompaiku. Aku akan baparah ka inya: Ompai, aku jadie badosa taharap surga lalue ka paharapmu. ¹⁹ Aku hinta mula pantas dijoku anamu, jadie aku salah sutie pangawimu.' ²⁰ Maka, badiri inya lalue badari ka ompainya. Tapie, metuh ana iyah masih bujur jauh, ompainya maila inya lalue ponuh balas kasih, ompainya iyah badari lalue mahekup lalue mansiumnya. ²¹ Limah iyah, ana iyah baparah ka ompainya, 'Ompai, aku jadie badosa taharap surga lalue kapaharapmu. Aku hinta mula pantas dijoku anamu.' ²² Tapie, ompainya iyah baparah ka pelayan-pelayannya, 'Copat! Taing jubah am baie lalue honikan ka inya. Honikan jam cincin ka tunyu jarinya lalue sanal ka kakinya. ²³ Taing koti ana sapi am jobu lalue samolihkan. Ayo dirie makan lalue barami, ²⁴ laie anaku itie jadie mati, tapie wayah itie baulang hirup! Inya jadie hila, tapie wayah itie jadie didapat!' Maka urang jam nampara barami. "Ana Panuha Gusar akan Ompainya. ²⁵ "Metuh iyah, ananya am tuha tege ka huma, lalue metuh inya jadie tege kadamping dangaunya, inya manongar suara musik lalue baigal. ²⁶ Jadie inya manimai siku mula umat iyah lalue batanya tuntang apa am lagie tajadie. ²⁷ Timat palayan iyah ka inya, 'Aringnya jadie datang, lalue ompaimu manyamolih ana sapi am jobu, laie inya pulang barigas baie.' ²⁸ Tapie, ana panuha iyah gusar lalue hinta hona tama lalue ompainya maluar lalue ngabaie inya. ²⁹ Tapie, inya baparah ka ompainya, 'Batahun-tahun aku jadie bagawi malayan kolai lalue hinta basa malalai parintahmu, tapie kolai bahkan hinta basa mamori ku siku kaming am bia nyaman aku tahu bapesta dengan kakawalanku. ³⁰ Tapie, metuh ana mu iyah pulang metuh mahabis hartamu akan kawan pelacur-pelacur, ompai manyamolih ana sapi am jobu akan inya.' ³¹ Maka, ompainya manimat ka inya, 'Anaku, kolai tarus barotaku, lalue uras am hompuku iyah am hompu hemu. ³² Tapie, arie itie dirie harus bapesta lalue basukacita laie aringmu itie jadie matie, tapie wayah itie inya jadie hirup mula; inya jadie hila tapie wayah itie jadie didapat."'