¹ Ka ditie, yaham barapa urang am mamarah Yesus tuntang urang Galilea am darahnya dicampurkan Pilatus dengan kurban parsembahan urang. ² Nyawab Yesus ka urang. ''Apa kolai mangira urang Galilea iyah lobih badosa mula urang Galilea bukan laie urang sia bera iyah? ³ Aku mamarah ka kolai, honta. Akan tapie, jakai kolai honta batobat, kolai uras akan mati jam. ⁴ Atau mangenal kadalapan bolas urang am mati, metuh manara ka damping kolam Siloam jatu lalu maningang urang, apa kolai mangira urang yaham padosa am lobih buru mula uras urang am tingal ka Yerusalem? ⁵ Aku baparah ka kolai, honta. Akan tapie, jakai kolai honta batobat, kolai uras akan mati jam!'' Puhun am Honta Babuah ⁶ Yesus jam mamarah parumpamaan iyah: ''Tege sasiku urang am hompu sabatang puhun ara am ditanam ka lahan anggurnya. Akan tapie, saat inya datang akan mangau buah ka puhun iyah, inya honta manapatkannya. ⁷ Jadi, inya baparah ka tukang lahannya, 'Jadi tolu tahun aku datang mangau buah ka puhun ara itie, tapie aku hompan basa manapatkan suti pun. Tobang ja puhun iyah! Ngapa harus manyia-nyiakan tanah akan puhun iyah?' ⁸ Akan tapie, tukang lahan iyah manyawab, 'Tuan, borikan puhun iyah kasempatan mula tahun iyah akan babuah. Ubahja aku mangali tanah ka sakitarnya lalu mamarahnya pupuk, ⁹ mungkin puhun iyah akan manghasilkan buah tahun akan harap. Jakai honta babuah jam, Tuan basa manobangnya.''' Yesus Mamayi ka Hari Sabat ¹⁰ Suatu kali, Yesus malajar ka sabuah sinagoge metuh ari Sabat. ¹¹ Ka koyah tege sasiku labini am karusakan roh senga mangaruhnya ka nyaman salama dalapan bolas tahun. Pungung labini iyah bungkuk senga honta baulih badiri tegak. ¹² Metuh Yesus mailanya, Inya manimai labini iyah lalu baparah, ''Uy labini, kolai jadi dibebaskan mula panyakitmu.'' ¹³ Limah, Yesus manompangkan jari-Nya labini iyah lalu metuh iyah jam, inya baulih badiri tegak lalu mamuji Hatalla. ¹⁴ Akan tapie, pamimpin sinagoge iyah manjadi geram laie Yesus mamaikan metuh ari Sabat. Inya baparah ka urang banya, ''Tege onam ari akan bagawi. Laie iyah, datangja akan dibaikan metuh ari iyah, bukan metuh ari Sabat.'' ¹⁵ Amun, Tuhan manyawab urang iyah, ''Kolai urang munafik! Bukankah kolai uras malopaskan sapi atau keledai hompumu am takekang ka kandang lalu manuntunnya kaluar akan marai metuh ari Sabat? ¹⁶ Laie iyah, hontakah labini itie, saurang katurunan Abraham am jadi dikobat salama dalapan bolas tahun laie Setan, jam harus dilopaskan mula belenggunya iyah metuh ari Sabat?'' ¹⁷ Metuh Yesus baparah samikian, uras lawan-Nya dimalukan, lalu urang banya basukacita tingi sagala pangawi ajaib am jadi digawikan-Nya. Parumpamaan Biji Sesawi lalu Ragi ¹⁸ Limah iyah, Yesus baparah, ''Bera apakah Karajaan Hatalla iyah? Dengan apakah Aku baulih mangumpamakannya? ¹⁹ Karjaan Hatalla iyah bera biji sesawi am dialap urang lalu ditanam ka lahannya; biji iyah tumuh manjadi puhun, lalu burung-burung ka udara basarang ka dahan-dahan-Nya.'' ²⁰ Lalu Inya baparah, ''Dengan apakah aku mangumpamakan karajaan Hatalla? ²¹ Karajaan Hatalla iyah bera ragi am dialap sasiku labini lalu bacampurkannya lalam 3 sukat topung sampai uras adonan iyah mangomang.'' Baya Koci am Disalamatkan ²² Yesus manyusuri kota-kota lalu desa-desa, inya malajar lalu tarus bajalan manunyu Yerusalem. ²³ Lalue, saurang batanya ka-INya, ''Tuhan, apakah baya koci urang am disalamatkan?'' Yesus baparah ka urang uras, ²⁴ ''Bajuangja akan baulih tama malalu pintu am sempit; laie Aku baparah ka kolai, banya urang akan bausaha tama ka koyah, tapie urang honta akan basa. ²⁵ Jakai tuan dangau badiri lalu manutup pintu dangaunya, sadangkan kolai badiri ka luar lalu magatok pintu samil baparah, 'Tuan, tolong bukankah bagi kami.' Inya akan manyawab, ' Aku honta tahu mula manih kolai baasal.' ²⁶ Lalue, kolai akan manyawab, 'Kami jadi makan lalu marai barota Kolai. Kolai jadi malajar ka jalan kota kami.' ²⁷ Amun, Inya akan manyawab, 'Aku honta mangasene kolai lalu honta tahu mula manih kolai baasal. Badarija mula paharapku, ikam uras palaku kajahatan!' ²⁸ Kolai akan manangis lalu mangertakkan gigi metuh maila Abraham, Ishak, lalu Yakub, barota uras nabi homan ka lalam Karajaan hatalla samantara kolai ditibarkan ka luar: ²⁹ Limah iyah, urang-urang akan datang mula timur lalu barat, lalu mula utara ka salatan. Urang duru makan lalu lalam Karajaan Hatalla. ³⁰ Sabujurnya, urang am tarakhir akan manjadi am partama lalu urang am partama akan manjadi am tarakhir.'' Yeusu Harus Badari ka Yerusalem ³¹ Metuh saat iyah, barapa urang Farisi datang ka Yesus lalu baparah, ''Badarija, tingalkan homan itie laie Herodes hona mamati-KOlai.'' ³² Yesus manyawab urang, ''Badarija lalu baparah ka rubah iyah, 'Ari iyah ari pagi, Aku akan mausir roh-roh jahat lalu mamaikan, urang, lalu ari katiga, Aku akan manyelesaikan pangawi-Ku.' ³³ Akan tapie, Aku harus malanjutkan pajalanan ari itie, pagi, atau lusa laie honta mungkin saurang nabi mati ka luar Yerusalem. ³⁴ Yerusalem, Yerusalem! Kolai mamati para nabi lalu mancam urang am diutus ka kolai! Baulang kali Aku kangen mangumpulkan ana-anamu, samah bera induk manu am mangumpulkan ana-ananya ka loba sayapnya. Akan tapie, kolai honta hona. ³⁵ Botie tie dangaumu akan dikosongkan manjadi sepi. Aku baparah ka kolai, kolai honta akan maila Aku mula sampai tiba waktunya kolai akan mamarahkan, 'Kaberkatija Inya am datang lalam nama Tuhan!'''