¹ Keken katika ari, Yesus badoa ka Suti Homan. Katika Inya jadi badoa, Siku mula murid-murid-Nya bapaner ka-Inya, "Tuhan, lajar kami badoa samah bera Yohanes malajar murid-muridnya." ² Limah iyah Yesus bapaner ka urang, "katika kolai badoa, badoa bera itie: 'Ompai dibarasih nama-Mu. Datang karajaan-Mu. ³ Borie kami pamuseh am sasukupnya saban arie, ⁴ umakan ampun dosa-dosa kami sabab kami kanirie jam maampun saban urang am basalah ka kamu. Umakan, hinam manaing kami ka lalam pancuba." Pintakan, Gaukan, umakan togahkan ⁵ Limah Yesus bapaner ka urang, "Jakanya siku mula kolai bagora siku kawal umakan kolai ingkas ka dangau kawalmu iyah katika tongah malam umakan bapaner ka inya, 'Kawal,pinyam aku tolu roti, ⁶ laie siku kawalku am lagie mangaruh pajalan singah ka rangauku, tapie aku mayan ara apa-apa ka rangau honi manyarungie inya.' ⁷ Apa mungkin kawalmu mula lalam rangau manimat, 'Hinang manaur aku! Pintu jadi bakunci umaka aku barota ana-anaku jadi ka homan tidur. Aku honta tahu huas nyaman mamori apa jam kakolai.' ⁸ Aku bapaner bapaner ka kolai iyah am belai meh kawalmu iyah honta huas umakan mamorie apa jam ka kolai laie kolai kawalnya, tapie laie kolai tarus mamohon, inya pasti akan huas umakan mamorie apa am kolai kahona. ⁹ Jadie, Aku bapaner ka kolai pintakan, kolai akan manarima. Gaukan, kolai akan baulih. Togahkan, pintu dibuka akan kolai. ¹⁰ Sabab sapa jam am maminta akan manarima. sapa jam am mangau akan baulih. Umakan sapa jam manogah, pintu akan dibuka akan inya. ¹¹ Apa tege siku ompai mula antara kolai mamorie ular akan ananya jaka inya maminta lau? ¹² Atau mamorinya kala, jaka inya maminta tolur? ¹³ Jaka kolai am jahat ingat bera apa mamori pamori am baie ka ana-anamu, apamula Ompaimu amka surga. Inya mamori Roh Barasih ka urang-urang am maminta ka-Inya." Yesus Mahonie Kuasa Allah ¹⁴ Keken katika arie, Yesus mausir imun mula siku urang kalakie am bisu. Limah imun iyah maluar, urang am tarie bisu ulih bapaner umakan urang banya jadi cangang. ¹⁵ Tapie, babarapa urang bapaner, "Inya mausir imun honi kuasa Beelzebul, pamimpin Imun." ¹⁶ Babarapa urang am bukan hona mancuba Yesus, urang maminta Inya manunyu suti tana mula surga. ¹⁷ Tapie, Yesus ingat apa am urang pikir umakan bapaner ka urang, "Saban karajaan am pocah-bolah umakan saling manyarang akan hancur. Umakan, manyarie am angota-angotanya saling bamusuh akan pisah-biar ¹⁸ Jadie, jaka Iblis jam pocah-bolah umakn malawan arepnya kanirie, macam apa karajaannya ulih tatap batahan? Aku mamaner iyah laie kolai mamaner iyah am Aku mahonie kuasa Beelzebul nyaman mausir imun-imun. ¹⁹ Jaka Aku mausir imun-imun umakan Beelzebul, umakan kuasa sapa ana-anamu mausir urang? Laie iyah, urang am akan jadie hakimmu. ²⁰ Tapie, jaka Aku mahonie kuasa Allah nyaman mausir imun, Karajaan Allah jadi datang ka kolai. ²¹ Jaka siku urang am kuat umakan basanyata lengkap manyaga istananya kanirie, harta bananya pasti lalam ulah am aman. ²² Amun, jaka tege urang am lobih onya mula inya hona manyarang umakan mangalah inya, maka urang am lobih onya iyah harus mangalap sanyata-sanyata am dianal laie urang iyah umakan mamagi-magi harta kolipnya. ²³ sapa jam am honta tege ka pihak-Ku, inya malawan Aku. Umakan sapa jam am honta mangumpul barota Aku, inya mamisah-biar." Baulangnya Roh Isa ²⁴ Jaka roh isa maluar mula tuwuh siku urang,roh iyah akan bakaliling malalu homan-homan am rangkai nyaman mangau homan baranai, tapi inya honta manapatnya. Laie iyah, inya bapaner, 'Aku akan baulang ka rangau am jadi tingal ku.' ²⁵ Katika inya baulang, inya manapat rangau iyah lalam ulah tasapu barasih umakan taatur bujur baie. ²⁶ Limah iyah, roh isa iyah badari umakan manaing tujuh roh am lobih jahat mula inya nyaman tama umakan tingal ka rangau iyah nyaman ulah urang urang iyah jadi jauh lobih buru mula sulanya." Urang-Urang am Barami Sanang ²⁷ Metuh Yesus mamaner itie, siku urang am tege ka tonga-tongah urang banya basoru, "Dituah porut am jadi barana Kolai umakan susu am manyusu Kolai." ²⁸ Tapi, Yesus bapaner, "Barami sanang urang-urang am manongar bungie Allah umakan mamatuhnya." Tana Yunus ²⁹ Metuh urang-urang am bakumpul sasar banya, Yesus bapaner, "Katurunan itie iyah am katurunan am jahat; urang manuntut suti tana, tapie mayan ara suti tana jam am akan ditunyu ka urang bukan mula tana Yunus. ³⁰ Bera Yunus am jadi tana akan urang-urang Niniwe, bera iyah am Anak Kalunen akan jadi tana akan katurunan itie. ³¹ Keken ari kiamat, Ratu mula Selatan akan huas barota urang-urang mula katurunan itie umakan inya akan mahukum urang laie inya datang mula hujung bumi nyaman manongar tuah Salomo, sadang ka ditie tege siku urang am lobih bakah mula Salomo. ³³ Mayan ara siku urang jam am limah maharupi palita, akan mangora palita iyah ka homan am tatawu atau ka lowa rangau. sabaliknya, urang mangora palita iyah ka kaki palita nyaman urang-urang am tama maila cahayanya. ³⁴ Mata iyah am palita tuwuhmu. Jaka matamu baie, uras tuwuhmu akan diponuh umakan torang. Tapi, jaka matamu jahat, uras tuwuhmu akan diponuh kapotang. ³⁵ Laie iyah, bahati-hati agar torang ka lalam kolai honta jadi potang. ³⁶ Jaka tuwuhmu diponuh umakan torang umakan mayan ara bahagiannya am potang, tuwuhmu iyah akan torang urasnya samah bera katika suti palita manorang kolai honie cahayanya." Yesus Manyalue Urang Farisi umakan Ahli Taurat ³⁷ Limah Yesus habis bapaner, siku urang Farisi marahi-Nya nyaman makan. Inya jam datang, limah iyah duru umakan makan. ³⁸ Tapie, urang Farisi iyah cangang katika maila Yesus honta masu jari-Nya saholu sahompan makan. ³⁹ Tapie, Tuhan bapaner ka inya, " Urang-urang Farisi bera kolai marasih bahagian luar cangkir umakan pingan, tapie ka lalam kolai ponuh laie kasarakah umakan kajahat. ⁴⁰ Uii urang-urang paleng! Hontanya Inya am mangaruh bahagian luar jam mangaruh bahagian lalam? ⁴¹ Laie iyah, bagikan apa am tege ka lalammu iyah jadi amalmu. Umakan bera iyah, kolai akan buju-bujur barasih. ⁴² Tapi, calaka kolai, urang-urang Farisi! Sabab, kolai mamorie persepuluhan timngie hasil selasih, inggu, umakan bamacam tanam tumuh huammu, tapi kolai maawai kaadilan umakan kasih Allah. Saharusnya, kolai mangaruh uras hal iyah tanpa maawai hal-hal am bukan. ⁴³ Calaka kolai, urang-urang Farisi laie kolai rajin duru ka homan am ta baie ka sinagoge umakan jam rajin manarima hormat ka pasar. ⁴⁴ Calaka kolai laie kolai bera kuburan am honta batana, am dijoja-joja urang honta urang ingat." ⁴⁵ Limah iyah, salah siku urang ahli Taurat bapaner ka Yesus, "Guru, katika Kolai mamaner hal-hal itie, Kolai jam mangacala kami." ⁴⁶ Tapie, Yesus manimat, "Calaka kolai, uii ahli-ahli Taurat! Sabab, kamu mangora beban am borat nyaman dihumpa urang bukan, tapie kolai kanirie honta hona manyuntu beban iyah honi suti tunyu jam ⁴⁷ Calaka kolai laie mamangun kuburan akan nabi-nabi am di patie hiyangmu. ⁴⁸ Sampai, kolai bauja ka uras urang iyah am kolai mangaku pangawi hiyangmu; urang am mampatie nabi-nabi iyah, tapie kolai mamangun kuburannya. ⁴⁹ Itie am sababnya, Allah lalam tuah-Nya bapaner, 'Aku akan mangirim nabi-nabi umakan rasul-rasul ka urang, tapie babarapa mula urang-urang am Kukirim iyah akan dipatie umakan dikiyan,' ⁵⁰ nyaman darah uras nabi, am tatumpah metuh dunia dikaruh, ulih dituntut mula katurunan itie, ⁵¹ nampara mula darah Hebel sampai darah Zakharia, am dipatie ka antara altar umakan Dangau Allah. Au, aku bapaner kakolai iyah katurunan itie akan batangung jawab ka hal itie. ⁵² Calaka kolai, uii ahli-ahli Taurat! Sabab kolai jadi maalap kunci kaharotie, tapie kolai kanirie honta hona tama umakan mahalang urang bukan akan tama." ⁵³ Limah Yesus maningal homan iyah, ahli-ahli Taurat umakan urang Farisi nampara mamusuh-Nya umakan mamonya-Nya honi bamacam tanya. ⁵⁴ Urang bapakat akan manompi Yesus honi paner am dipaner-Nya