¹ భాయిబందో, పచ్చాడియాపర్, దేవ్ ఖుషీ పావజు అపణ్ కు బంచ్ ణోకో తమ్ హమార్ డై సీక్ లీదే తమ్ సదా హనూజ్ బంచ్ రేఛో అబె తమ్ ఉజ్జీ జాదా హనూరేణోకన్ యేసు ప్రభూర్ నామేపర్ తమేనే మన్వికరన్ నోరాకర్ రేఛా. ² యేసు ప్రభూర్ హకమేతీ హమ్ తమేనే కాయి సీక్ దీనెకో ఓ తమేనె మాలమ్. ³ తమార్ కార్ణే దేవేర్ ఖాతర్ కాయికతో, తమ్ పవిత్తర్ రేన్ ఛనాళేతీ దూర్ రేణో కన్ ఊ కుంత్ రోఛే. ⁴ తమామా హర్యేకేనె పవిత్రేతీ, మానేతీ ఏకజ్ గ్వాణీతీ బంఛేరో మాలమ్ వేన్ రేణో. ⁵ వళకేనీ జకో పరల్ జన్ కీదెజు దుసర్ బీరేర్ ఉంపర్ ఆసాకరానీ. ⁶ కార్ణే కుణీతీ ఓర్ భాయీనే అన్యాలం న కరేజు రేణో కస్నెకతో, హమ్ ఏర్ ఆoగెజ్ తమేనే కే ఓర్ హక్యేనె ఆగమ్ కర్ సకానీ అసో కనూర్ కరేవాళేవూనె ప్రభు సిచ్చా ఘాలఛే కబర్ దాన్. ⁷ ఛనాళేమా రేనే దేవ్ అపణేనే బలాయొ కొనిపణ్, పవిత్తరేతీ బంఛేనే బలాయొ. ⁸ జేర్ వాసే ఈ బోదానె ఛోడేవాళో ఆద్మీనె కొని పణ్, తమేనె ఓర్ పవిత్తర్ ఆత్మనె దేజకో దేవేనె జమాకరేనీ. ⁹ సోబతేర్ విశ్వాసివాళేనె ప్రేమ్ కర్ ణోకన్ లకేర్ జరూర్ ఛేని తమ్ ఏకీనెఏక్ కు ప్రేమ్ కర్ ణోకో దేవజ్ తమేనే సికాయొ. ¹⁰ హనూజ్ తమ్ సదా మాసిదోనియమా ఛజే సే భాయిబందేర్ కార్ణే ప్రేమేతీ రే భాయి బందో, ఏతీ జ్యాదా ప్రేమ్ కర్ ణో కన్ తమేనె నోరాకర్ రేఛా. ¹¹ ఏర్ ఆoగె తమేనే కేజు, అటక్ ళేతీ బంఛేనన్, తమార్ ఖాసేర్ కామ్ కరేనన్, తమార్ బత్కు కమాలేనన్ ఏకజ్ ధ్యానేతీ చాలో. ¹² హనూ కరోతో కిరస్తాన్ వేకోనిజే జనూతీ తమ్ మెప్పు కమాలోఛో తమేనే ఛ్యావజకో చీజేవాసే పరలేర్ ఉంప్రే ఆధార్ పడేర్ జరూర్ రేని. ¹³ బాయిబందో, మర్గేజేర్ కార్ణే నిరీక్షణ్ ఛేనిజే పర్ లేర్ నై హాయి కరేర్ ఛేనికన్ తమ్ మాలమ్ కర్ లేణో. ¹⁴ మర్ జాన్ ఫేర్ ఉటోకన్ హామ్ నమ్ రేఛా జేర్ వాసే క్రీస్తూమా విశ్వాస్ రకాడన్ మర్గేజేనే దేవ్ ఓతీ సదా లావెకన్ విశ్వాస్ కర్ రేఛా. ¹⁵ కసన్ కతో, ప్రభూర్ ఉపదేశ్ ఈజ్ ప్రభూ ఆవేజే దాడూమా బంచ్ రేజకో అపణ్ మర్గేజేత్తీ ఆoగెజ్ జావానీ. ¹⁶ జనా హకమేతీ భళన్ రేజకో ఘోగ్, ఠసేర్ సోజార్ కంఠ, దేవేర్ తత్తూరార్ ఆట్ రఛే జనాప్రభూ ఊజ్ స్వర్గ్ లోకేమాయితీ ఫరన్ ఆవె క్రీస్తూమా విశ్వాస్ రకాడన్ మర్గేజకో అగ్ డీ ఉటేఛే. ¹⁷ పచ్చె బంఛన్ రాజకో అపణ్ ఉందేతీ సదా వాదళేతీ భళన్ వాళేమా ప్రభూనె సమ్నక్ భళాఛా జేర్ వాసే అపణ్ హమేసా ప్రభూతీ సదా రాఛా. ¹⁸ జేర్ వాసే తమ్ ఏ వాతేవూర్ కార్ణే ఏకీనేఏక్ హిమ్మత్ కేలో.