¹ భాయిబందో, ఏ వాతేవజే సమ్యార్ కార్ణే కే, వక్తేవూర్ కార్ణేకే, తమేనే లకేరో జరూర్ ఛేని. ² కసన్ కతో రాత్ వణా చోర్ ఆవెజు ప్రభూర్ దాడోఆవెకన్ తమేనే మాలమ్. ³ జన్ సే ఆచో అటకళేతీ ఛేకన్ కేజనా, అణాచక్యేర్ నాశ్ ఓర్ ఉంపర్ ఆవఛే ఓ తపాలేనీ జణేవాళ్ బీరేనే దుక్కో ఆవెజు ఉ ఆవెఛే. ⁴ పణ్ భాయిబందో తమ్ అoధారేమా ఛోని, జేర్ వాసే ఓ దాడే తమార్ ఉంపరే చోరేర్ నై ఆయోర్ జరూర్ ఛేని. ⁵ తమ్ సే వజాళేర్ ఆద్మీ దియేర్ ఆద్మీ అపణ్ రాతేవాళ్ కొని ఆoధారేవాళ్ కొని. ⁶ జేర్ వాసే పరలేర్ నై అపణ్ నీoద్ లేతేరానీ అపణ్ జాగన్ జాగర్తాతీ రేణో. ⁷ నింద్ లేవాళో రాత్ వణా సోజాఛే నీసాతీ రేవాళ్ రాత్ వణా నీసాతిరఛే. ⁸ లపణ్ అపణ్ ధీయేర్ ఆద్మీఛా జేర్ వాసే అపణ్ నిస్సా నరజు, విశ్వాసేనె ప్రేమేనె హతేర్ పలకార్ నై ప్యార్ లేణో అపణ్ రక్షణేర్ నిరీక్షణ్ టోపీర్ నై ఘాల్ లేణో. ⁹ అపణ్ దేవేర్ రీసేనె తాక్ ణో కన్ దేవ్ అపణేనె కుంతో కొని పణ్, అపణ్ ప్రభు యేసుక్రీస్తూర్ కార్ణే రక్షణ్ లేలేనే అపణేనే కుంతో. ¹⁰ అపణ్ బంఛన్ రాతో మరన్ రాతీ, ఉ ఆవెజనా అపణ్ ఓత్తీసదా బంఛాఛ. ¹¹ ఏర్ కార్ణే ఏకీనే ఏక్ హిమ్మత్ కేలేన్ అబె కర్ జూజ్ ఏకీనె ఏక్ మద్దత్ కర్ లో. ¹² భాయిబందో, తమేనే చాలాయేనన్, బోద్ కరేనన్, ప్రభు కుంతో జేనే తమార్ వచ్చె కామ్ కర్ రేజేనే మాన్ దకాళో కన్ తమేనే నోరాకర్ రేఛ. ¹³ ఓ కర్ రేజకో కామేర్ కార్ణే ఉందేనే అస్మాన్ ప్రేమేతీ మానేతీ దేకో తమామా తమ్ శాoతీతీరో. ¹⁴ భాయిబందో, కామ్ కరేనీజేనే కబర్ దాన్ కన్ కో చమ్ కేవాళేనే హిమ్మత్ దో కమ్ జోరేవాళేనే మద్దత్ దో సేతీ ఓప్య్కాతీ రో. ¹⁵ కేనీతీ కీడేనే ఫేర్ హటో కీడ్ నీ కరేజు దేక్ లో ¹⁶ పణ్ సే వక్తేమా ఏకీనె ఏక్ సేనె మేల్ కరేనె కోశీస్ కరో. ¹⁷ హమేసా ఖుషీతీరో సే వకతేవూమా అరజ్ కరో స్వగ్లీ ¹⁸ కామూమా ఇమానేతీరో క్రీస్తూ యేసుమా తమార్ బత్కూ హనూ రేణో కన్ దేవేర్ ఖాతర్. ¹⁹ పవిత్తర్ ఆత్మానే ఆడమ్ కర్ మత్. ²⁰ భక్తిదారేర్ వాతేనే న మానజు రోమత్ సేనే పరిచో కర్ణో ²¹ ఆచేనే పకడో.స్వగ్లీ కీడేతీ దూర్ వేన్ రో ²² అపణేనే శాoతీ దేజకో దేవ్ తమేనే ²³ పూరోఓర్ నై కర్ లేన్, అపణ్ ప్రభు యేసుక్రీస్తు ఆవెజన్నా తమార్ ఆత్మానే, జావేనే, జీవేనే, సేనే కుణ్స తప్పు నీరజు జతన్ కరెజా. ²⁴ తమేనే బలాయొజకో నమ్మకమేవాళో, జేర్ వాసే ఉ తపెనీజు కరఛ. ²⁵ భాయిబందో, హమార్ వాసే అరజ్ కరో ²⁶ భాయిబంద్ సేనే పవిత్రమేతీ ఛుమ్ము వందనం కరో. ²⁷ ఈ ఉత్రo సే భాయిబందేనే వాంఛన్ సమ్లావ్ ణో కన్, ప్రభూర్ హాకమేతీ తమేనే కేరోచు. ²⁸ అపణ్ ప్రభు యేసుక్రీస్తూర్ కృప తమేనే రేజా.