¹ Ishi uPetro nu Yohana bhamile bhakwendelela muhanti mushibhanza ahabhalilo aha puuto, musaa tisa. ² Umundu umo, udedeluha kufuma kupaapwa, ahapimbwaga insiku zyondi bhahamugonnaaga pamulyango uwashibhanza bhantinji mwinza, angawezye kulabha ifinjile kubhandu bhebhahabhaga mushibhanza. ³ Wabhalola u Petro nu Yohana bhapalamila kwinjila mushibhanza, ahalabha ifinjile. ⁴ U Petro, ahamudamulila amiso, peeka nu Yohana, ahalonga, ''ahanti twenye itwe.'' ⁵ Undendeluha ahabhenya ahanyelezyaga kuposhela ahanda hamu kufuma kukwabho. ⁶ Ilelo u Petro ahalonga, "ihela nizahaabu ine talinazyo, ilelo hala hindi naho indifumwe kukwaaho, mwitawa lya Yesu Klisiti uwaku Nazarethi, jendaaga.'' ⁷ U Petro ahamwega kunyobhe yakwe iyakundiilo, ahamubhusya kumwanya: panapo bhulo ivinama vya kwe muvizugamo mwondi muhabha na maha. ⁸ Aluka kumwanya, umundu udendeluha ahimilila nakwanda kujenda; ahinjila mushibhanza peeka u Petro nu Yohana, akujenda, akuluka, na kupaala u Mulungu. ⁹ Abhandu bhondi bhebhamuwenyi wakujenda akumupaala u Mulungu. ¹⁰ Bhahamanya kunti ali mundu ula wahihalaga pamulyango akulabha ifinjile pamulyango umwinza uwashibhanza; bhahalemwa nahaswigo kuhala hehafumiye kukwakwe. ¹¹ Wuyo shabhalemeleeye u Petro nu Yohana, abhandu bhondi peeka bhahashimbilila munyumba yebhahantinji iya Sulemani, bhahaswigaa ahaani. ¹² U Petro walilola ili, awenene aha bhitishiha abhandu, "'Imwe mubhandu ibha Israeli, hooni hemukuswiga? Honi he mukwenya amisoginyu kukwitu, ungati pe mukuti twamubhomba unu kuti ajendaje kumaha gitu tuneetwe awe kumaha gitu?.'' ¹³ U Mulungu uwa Ibrahimu, nuwa Yisaka, nu wa Yakobo, u Mulungu u wa yisie bhitu, amubhusa umubhombi waakwe u Yesu. Unu wewuyo imwe we mwapiye naku muhana pilongolela yamiso ga Pilato, ilelo aweene ayitishile kumuleha bhulo. ¹⁴ Mwalemile upole uwana lyoli, panapo pe muhanti waagojili wemumuleshe bhulo. ¹⁵ Imwe mwamugojile umwene uwa wimi, we u Mulungu amuzwusizye kubhafwe - Itwe twa bhakenti bhalilyo. ¹⁶ Ishi, kulwitiho mwitawa lyakwe, umundu unu wemukumlola nakumumanya, ahabhombwa kubha na maha. Ulwitiho lwelukushilila kwa Yesu uwene umubhili unu watimiye, pilongolela yinyi imwe mwendi. ¹⁷ Ishi, bhaholo, mwabhombile kunongwa ya wulema, awinza she bhabhombile alongozi bhinyu. ¹⁸ Lakini gala ge u Mulungu abhabhuzizye zila kumalomu gabhakuwi bhondi, kunti u Klisiti unu ahayiyimba, ishi abhombile. ¹⁹ Ilelo, yitishi galuhani, ingalelo imbibhi zyinyu zyondi zipate kwepa yoli, anga hize ahabhalilo aha kwimba kufumilana na kubha kwa mweene; ²⁰ anga wezye kumusontelezya u Klisiti we asabhuliliwe kunongwa finyu, u Yesu. ²¹ Awene we wuyo yoli imwanya zimuposhele paka habhalilo aha kuduzya ivindu vyondi, vwe u Mulungu alonjile imaandihani kumalomu aga bhakuwi abhatonsu. ²² Yoli u Musa alonjile, 'Umwene uMulungu ahayibhusya umukuwi anzine kufuma muhanti muholo bhinyu. Muyimutejele vwa kila handu hahayibhabhuzya imwe. ²³ Ihayibha kila mundu watakutejele vwa kufuma kwa mukuwi uyo ayi gogwa yoli ayepe mubhandu.' ²⁴ Ena, nabha kuwi bhondi kufumila kwa Samweli na bhala bhebhe landatile palusalo yakwe, bhalonjile nabhahalalasya insiku izi. ²⁵ Imwe mwebhana bhabha kuwi nulwivyano lwe u Mulungu abhombile peeka nabha maama, anza shalonjile kwa Abrahamu, 'Mumbeyu yaho ihaya zyondi izya munsi zihayimishilwe.' ²⁶ We u Mulungu amubhusya umubhombi wakwe, amusontelezizye kukwinyu sunti, inga abhasaye imwe kwe kunti muhagaluhana kufuma kumbibhi.''