¹ Walyafiha insiku ili Pentekoste, bhondi bhali peeka isehemu yeeka. ² Panaapo bhulo hahafuma ahantu heha kubhuna kufuma kumwaanya unganti peepu ihali, yihizuzya inyuumba yoondi mwebhihaye. ³ Ipo zihafumila imili, unganti mili izya mwooto zisataanile, zihabha pamwenga yabho kila mundu. ⁴ Abhene bhondi bhahingilwa nupepu umufinjile bhahanda kulonga indongo izinji, anza umupepu wabhapiye kilonga. ⁵ Ishi bhalipo abhayahudi bhebhahihalaga mu Yerusalemu, bhaha muputaga uMulungu, kufuma kila insi pansi naku mwanya. ⁶ Kuyinga uku wekwavwiha, ipuga iyabhandu lihiza peeka uku bhafuyile kwe kunti kila mundu abhivuye bhakulonga kila mundu indongo yakwe wuyo mweene. ⁷ Bhahalungana nakuswiga, abhene bhahalonga, "Yooli, ibha bhani bhakulonga tebhaku Galilaya ha? ⁸ Huni itwe hetukubhivya, kila mundu kundoongo zye twapiliwe nazyo? ⁹ Abhaparthia na Abhamedi na Waelamu, nibho bhebhe hihalaga Mesopotamia, muwu Yahudi, nu mu Kapadokia, mu Ponto mu Asia, ¹⁰ mula mu Frigia, Pamfilia, mu Misiri, na musehemu iya muLibya namu Kirene, na bhajeni kufuma ku Rumi, ¹¹ Abhayahudi na waongofu, Wakilete abhaalabu, tukubhivwa we bhakelonga mundongo zyitu kunongwa yamaha uwi mbombo ya Mulungu." ¹² Bhondi bhaha bhakuswiga nakubha zwunguzya; Bhalonga bhibho kubhibho, "Ini pekwe kuti bhuli?" ¹³ Ilelo bhanu bhahasholonya bhahanti, ibha bhabhizuzizye umupwa.'' ¹⁴ Ilelo u Petro ahimilila peka na bhala ishimu na weka, ahahoola kwizwi, ahabhabhuzya, "Abhandu ibha ku Yudea nimwe mwendi mwekudila mu Yerusalemu, ili limanyishe kukwinyu tejele vyaji kuwusungamu amazwi gaani. ¹⁵ Abhandu ibha bhatahooliwe ha anza she mukukwina, ilelo ahabhalilo iha shilabhila musala zitatu. ¹⁶ Ilelo ili lyalongiwe kufuma kwa mukuwi u Yoeli: ¹⁷ Ihayibha insiku izya kumwisho; u Mulungu akuloonga, ahayita umupepu wani kubhandu bhondi, abhana bhinyu nabhalindu bhinyu bhayifumwa uwukuwi, abhana bhinyu abhatuunda bhahayiloonga izya mwilongilela bhope abhagoosi bhahayilootaga injozi. ¹⁸ Shishila na bhambi bhani peeka nabhabhimbi ibhashaanda, ikinku izyo, ihayita umupepu wani, bhoope bhayilonga zyezihayinza. ¹⁹ Ihayilolesya amayele kumwaanya kwibhingo ivilolesyo pansi munsiini, amabhanda, umwoto, nakutukuha kulyosi. ²⁰ Ni zubha lihayigaluhana kubha hisi nu mwezi kubha mabhaanda, ishe zishili kwinza insiku izya mayele ga mwene. ²¹ Ihayibha ya kunti kila weka wakwintila itaawa lya mwene ahayisatulwa.' ²² Abhandu ibha ku Israeli, tejele vwaji amazwi iga: U Yeesu uku Nazareti, umundu wasimishizizwe nu Mulungu kukwinyu kumbombo na maha agamayele, nivilolesyo ivya Mulungu kushilila awene na muhanti yinyu inza namwe munemwe she mukulola- ²³ kunongwa ya lusubhilo kufuma kuwandilo, nimbulani zya Mulungu afumilwe, nimwe, kunyobho zya bhandu abhamwamu, mwayivyize nakumugooga, ²⁴ wu Mulungu amubhusizye, ahefwa kunti patabhobhaje kuwufwe waakwe, kwekunti itaho ye kukwakwe, kutemwa nuyo. ²⁵ Ipo u Daudi ahalonga kunongwa yakwe, 'Namuloolile umwene yoli pilongolela pamiso gaani, aweene alikunyobhe yani iyakundilo ipo lelo tehabhasejelezye. ²⁶ Kwekuti umwoyo woni washiiye nulumili lwani bhalusesizye. Uwinza umubhili wani wuhadilaga kwakuyidaya. ²⁷ Tuhayileshe inafasi yani yibhale kwa shetani, iwinza tuhitishe kunti umufinjile kuwulola uwoli. ²⁸ Iwe usimishizizye kukwoni kubha lidala lya wumi; untimbishi inizule uluseshelo pilongolela pamiso gaho.' ²⁹ Bhaholo imbwezizye kulonga kukwinyu kumaha kunongwa ya yise witu u Daudi: awene afuuye nabhahamusyila, ni inpipa yakwe yilipeka nifwa hata musanyunu. ³⁰ Ilelo ali mukuwi amanyile kunti u Mulungu alipile ilapo kukwakwe, kunti ahayibhiha weka mupapo yakwe pashitengo isha wila. ³¹ Alilolile ili nalubhilo, ahalonga isha zya kuzwaha u Klisiti, 'anahabhili bhatamuleshile kuwuzimu ha wope umubhili wakwe wutabholile ha.' ³² U Yesu unu -Mulungu amwusizye, alelo itwe twendi twabhakeeti. ³³ Ilelo ahabha bhamubhusya munyobhe ya Mulungu iya kundilo, uku aposheleeye ulubhilo ulwa mupepu umufinjile kufuma kwa taata, awene ayitilo ulusubhilo ulu, we imwe mukulola na kwivwa. ³⁴ Ilelo uDaudi bhata mupiye kubhala kumwanya, ilelo haloonga, ³⁵ ''Umweene alonjile kwa mweene uMulungu, yihala kunyobhe yani iya kundiilo, paka wenabhabhomba abhafwi bhaho litengo kuvinama vyaho. ³⁶ Ilelo inyumba yoondi iya kuisilaeli yimanye izwana yooli kunti u Mulungu amubhomba weene wu mweene uKlisiti, u Yesu unu we mwamutesile." ³⁷ Ishi webhivya igo, bhahalaswa mumoyo gabho, bhamubhu zya u Petro na bhasontelezya obhanji, "'Bhaholo, tulibhuli?" ³⁸ U Petro ahabhabhuzya, "Yitishi na mwozelwe, weka weka, mwitawa lya Yesu Klisiti kunoongwa yakubhatuyila imbibhi zyiinyi muhayi poshela uwinza uwa mupepu umufinjile. ³⁹ Kwe kunti kukwinyu lusubhilo kubhana bhinyu nakubhala bhondi bhebhali ukhutali, abhandu abhinji kulingana nu mwene uMulungu wetu shatibhabhishile.'' ⁴⁰ Kumazwi aminji abhapembuliye, nakubhasoha; ahalonga, ''Yitihaji mwepe mupaapo ini imbibhi." ⁴¹ Pebhahaposhela amazwi gaakwe nakwozelwa, ipo bhahonjila muhonti musiku izyo anganti nafaasi elfu zitaatu. ⁴² Bhahendelela mumanyizo izya bhasotelezya umukaati na kuputa. ⁴³ Kutuuya kubha popondi, na mayole aminji ivilolesyo vihabhombe kushilila abhasotelezya. ⁴⁴ Bhondi bhebhintishile bhalipeekoo nivindu vwaabho vyondi peeka. ⁴⁵ Bhakazizye ivundu vwabho navwelemile wila na kubhana wondi kefwaatana na kila mundu shakwanza. ⁴⁶ Bhahabhomba isho isiku nisiku bhahabhomba shinisho bhali ninjele yeka mula mushibhanza bhahamenyaga umukati muhaya, bhaliye peeku ishekulya nuwutonsu nu mwoyo; ⁴⁷ Bhaha musalifwa uMulungu bhitishililwe na bhandu bhondi, umwene. Bhabhonjezya indabhi nindabhila bhala bhebhahitihaga.