¹ Yesu andu aleonikya kuja Bethelehemu o Uyahudi kala kija kya mangi Herode, lambwa, mamajusi vwa mashariki valeshika Yerusalemu, vwakededa, ² Nguku akeri ichu aonika mangi o Wayahudi? Kitevwi jaona ng'eng'eri yake mashariki, naise jacha jichemlambwa. ³ Mangi Herode eichwa ishoo, nyelekwichwa ovwichwa na Yerusalemu andwam nacho. ⁴ Kavwasang'irya vwadue vwa makuhani vwose na vweregha vwa vwandu, kashingha ologho kwa vwo, Kristo nguku aleonilaya? ⁵ Navwo vwakambia, kuja Bethelehemu o Uyahudi, ko kitevwi kudo kireghwa na mkimbi. ⁶ Naigwe Bethelehemu, orika lo Yuda, o mnina too ko ngaine o Yuda; mekoje kwapo apefuma mwitori apevwaombya vwandu vwakwa Israeli. ⁷ Herode kavwadikira mamajusi vwaja kishimoto kamanya kwavwo uloi o kigheri fuma ng'eng'eri ya lomva. ⁸ Kavwadamada Bethelehemu, kaambake, adenyi njia, mndevwesera munu shindo sha matuma, na mkame muona, mngendye ologho, matika nainyi ngiende nginde mkambwa. ⁹ Navwo vweichwa shidedo sha mangi vweleada njia, ke lambwa, ng'eng'eri ya vwaleiona mashariki ikavwasongoja ikavwadamada ikaimuka uye andu matuma akeri. ¹⁰ Navwo vweona ng'eng'eri ya vweleorokywa uorokywi uja mdue. ¹¹ Vwakaingya kanyi, vwakamwona matuna akeri na Mariamu mae, vwakagwa vwakamwilikua navwo vwakarugwa shisangu sha vwo, vwakamwara, zahabu, na uvumba na manemane. ¹² Navwo vwamechilywa na makilungu madionyi vwalamuuje Herode gwai, vwakadambuka kwavwo ko njia ingi. ¹³ Navwo vwedambuka, lambwa, malaika o mndumi kamfumya Yusufu madionyi kambia, kure umwirye matuma na mae, ukambije Misri, udamye ipo mpaka ngikuongoje mekoje Herode nyanemshigha matuma namwaghe. ¹⁴ Kakure kamwirya matuma na maekiyo kija kaida na Misri. ¹⁵ Kadamya ipo mpaka Herode kapa kimacha kishikye kidedo kija, kidedwa na mundumi ko mkimbi, kaambake. Ifuma Misri ngelemdikira mwanakua. ¹⁶ Nyikyo Herode eona ke amemenika na vwaja mamajusi, nyaleilusha munu, kaduma vwandu vwakaagha vwana vwose vwa vwomi vwaja vwekeri ipo Bethelehemu na shijongo shake shose, vwasa vwaode miaka ivwi na gwanda ya iho, ko kigheri kija elemanya ko mamajusi vwaja. ¹⁷ Nyiho kikashikya kidedo kidedwa na mkimbi Yeremia kambae ke, ¹⁸ Olodo luleichwa Rama ifugha na maombolezo vwafoje , Raheli akevwafughya vwana vwake ataidikye iteterywa, nukoje vwakeripo. ¹⁹ Herode epa lambwa malaika o mundumi kamfumya Yusufu madio nyi ipo Misri. ²⁰ Kambia kure umwirye matuma na mae uade njia udambuke orika lo Israeli mekoje vwamepa vwaja vweleishigha ngoo ya matuma. ²¹ Kakure kamirya matuma na mae, kaimka orika lo Israeli. ²² Kake aichwa ke Arikelau nyeleada ipo Uyahudi andu ko Herode ndiye nyeleogwa idambuko ipo nacho emechilwa madionyi, kaenda kiaro ipo Galilaya. ²³ Kaenda kadamyia mrig upelaghwa Nazareti, matika kishikije kidedo kija kidedwa na vwakimbi, nyapelaghwa Mnazareti.