¹ Qoomaadae Yesu ina waaraa'hh nar baraa' qamuu' angaano bo/oo deelor hungu/uumawo Eeharuuseero's ire qwarit angaano ngure pikimiisii ngure /suyi'. ² Mu'k Farisayo idooda kawa ar Yesu kure ba'y "Ga/aaweek eeharuuseero'k gar tlehhit a gar hariimaaka deelor hungu/umaawo'. ³ Yesu ngire ba'y, Ala soomusi'iikahe idooda Daudi aa tleehh qoomar awa qwariit? Ino's nee mukda ti kooma'. ⁴ Tana dah baraa' doo Mungu',j ino's mikaateeda taa qaa's as Mungu' ngire /aay tada ino's wa haiimaaka /aymaaro, tam mu'ka nee ino's ti kooma sleeme, aqo har geeraharuuser saalingw mu'k Yahudi kilooin. ⁵ Slama akasoomusi'iikahe baraa' hara'eyar Musawo'? Baraaadae ka gooin gidaaba' heerahamuuser saalingw mu'k Yahudi hara'eyar deelor hungu/uma ngin geqaaqeer baraa' doo Munguhe bo/oo deelor hungu/umaawo idoorihe ta dakuusiike? ⁶ Ala ani gar ni ka'h a gidaaba' diirehe hee' ak u'r deer doo' Mungu' ba/ati. ⁷ Kuunga' gidaabar' /ayme'eerika' geeraawo abar xua mu'k tlakweemaa' koomaaka' geera u askwasleemuta'aaka kaa gooin gidaaba' "Gar ni slaa a ilahhooarooka' alaa kuunga' kiloohu'ng tiwa gurtlatleera." ⁸ Asma garmaa hee an Aakoo' deelo'r hungu/uma. ⁹ Nangay Yesu ire tlay wa amooda ire da'h baraa' dooin oo saalingw. ¹⁰ Heeko a dawaa slo/oo i baraada' i dirii Yesu kure yaahaa's nee mu'k Farisayo tare oo' "xay i hariinda muu kuwa hhoooeemisi deelo'r hungu/umaawo?" Idoori kaa yaahaa's as kuwa askwasleemar wa slai. ¹¹ Yesu ngire ba'y "Dirhunge hee' a maa oo bee/iro's ar wa'k aa /et baraa' bohhonto i ale' oo ngi maw duu xaro as tawa deelo'r hung/uma. ¹² Hee i ak slahhaa iike beeli ba/a gawaa' idoorihe hhoooa kawa tleehhi deelo'r hunge/uma i hariin." ¹³ Aluuwa Yesu heeda ngure ba'y, " Dakok tumu'uuse' daka's ngure tumu'uus, ire hhooay idor kwadoo tsa'r wa ale. ¹⁴ Ala mukdoo' Farisayo tare ti'iit tare kwasleemuuu't wa gawaa' Yesu idor kur gaasi. ¹⁵ Yesu idooda ngawa tsaahh ma quu'tl didae kure digir deel nee mu'k yaariir ngire hhooeemiis slee'meero. ¹⁶ Yesu mukda ngure ba'y, "Ti ma hee' bawaara'." ¹⁷ Asma /aymuuda' aarusmo Isaya aa oo' iwa boo/i kwada awa oo'. ¹⁸ "Ga/aaweek asgadiyuusmooee' kwada" naa tsawaa'r a sla'aarusmooee kwad muunooee ngwa qwala/aas qeeruuee u diro's i hariis idogoo askwasleema ngu alki/iit dir mu'k xoordu slee'meero. ¹⁹ Ino's i ditsookuutiika', nee tseeiika nar afor ur slami hee afooro's ngi axaasiika baraa' uruuwaa. ²⁰ Daair aa qoombit ngi geeqayka ' slami taambir quuir duxuut ngi gaasiika' ay dir gari'amuu ino's huuwi i baalin. ²¹ Nee mu'k xoordu ino's kure haraxuu'. ²² Qooaadae hee neetlaame'r koo'm kuunguna huu'w amor Yesu heeda a taampa nee a afaa' wasli, kure hhooee's nee Yesu heeda' afa wasl ire axwee's nee ire xumiis. ²³ Boo/ayda slee'meero ire waa/oo/ tare oo' "Heewi a Garmaa' Daudiwooke?" ²⁴ Ala mu'k Farisayo idooda ngawa axaasii tre oo' " kwi gir neetlaame'r gusiisin gar ngir gusiisin a /uuruu' Bee/zebuli kwada' ur' oo neetlaame." ²⁵ Ala Yesu hasla' in ngawa tsaa'hh ire oo' "Umoo'qo waawiti'iimaro birti tlaampa'aamis kilo's ale i hhitiru't, slami gixsa laqaa' umoo'qo do'owo girti kilo's tlaampa'aamiis, do'oda' i sihhiitiika'. ²⁶ Nee neetlaangw ibir neetlangw hengeemiis ino's ti kilo's gusiisin. ²⁷ Ala waawuti'iimaro's ido'r sihhit a idooda? Nee Ani abar neetlaame an gusiisiim nar /uuruu Beelsebuli, xay mukhu'ng /uuruu' ngir gusiisine a /uuruu' maa'? ²⁸ Ala ani bar neetlaamer gusiisiim nar qeeruu' Mungu' waawuti'iimar Mungu' naa qaroo' amorhung a harda't. ²⁹ Hee idor dahi baraa' do hee' /uruu' koo'm ire fisin heeda muuruu'kurngwa tseegiika' ala ale Burngwa tseeg daqade in as fisin moroo' ngu wa sla'y. ³⁰ Hee' brfee' i diriiaaka' kwisi ani ina sii' nee kwada buruumburiimaaka' dinkwa nee ani ino's in diyaya/a'n. ³¹ Gawaa' idoorihe ani tunda babaw gidaaba' muu ku gurtlay umoo'qo tlakweemaawo nee umooqo /aymuu gotlooro. Ala kwadoo' qeeruu' hhoohhoo ngwa gootli ku gurtlayka'. ³² Umoo'qo heewo oo /aymuu' gootlima ngu oo' gawaa' Garmaa' Hee ku gurtlay. Ala umoo'qo heewo oo /aymuu' gootlima ngu oo' gawaa' qeeruu' hhoohhoo' ku bo/oo gurtlayka baraa' yaamuukae, tam baraa' yaamuuda' xawa. ³³ "Xa'amo burku hhoo' /amuuwo's ku hho laqaa' xa'ano burku tlaa'kw /amuuwo's ku tlakw sleeme, asma xa'ano gar kur tsaahhi a /amuuwo's. ³⁴ Kuunga' xwaylar amatoolay kuunga kusi tlakw ido'r axweesa nee hhoo' kur axweesa? Asma hee gar axweesi a teda haats wa baraa' muunoowo's. ³⁵ Hee' hhoo' gar harmiisi a moroo' hho baraa' daqaari'iima'r muunoowo's tada' hhoe hee' tlaa'k baraa' daqaari'iima'r muunoow tada tlakwe gar harmiisi aqo moroo' tlakw. ³⁶ "Ala ani kuunga tundu babaw umoo'qo axweesanta 'gidaaba'r koomaaka' tada' muu ooin faaror axweesantada ka hariis bo/oo' deelo'r askwasleemaro. ³⁷ Asma kuung tu gari amu i harafaar as axweesanaywo'k kwada ta axwe's laqaa' kuung tu askwasleemuut as axweesanaywo'k kwada ta axwe's." ³⁸ Qoomaadae' Yesu kure ba'y, nee intsaahhatuuser har'eyar Musa nee mu'k Farasayo "Intsaahhatusumo ate'n taya a sla'aan arto ar kuung ta tlehh? ³⁹ Ala Yesu inooin ngire ba'y " Qarta' tla'kw nee ar weeruuse, i layar leelehhit, ala layar ta slay i kahh ala a har layar aruusmo Yona kilo's. ⁴⁰ Asma idooda Yona aar hoot baraa' guroo' siyo wa ale deelo ta'm tlaatla/aangw nee amsiiwo, Garma Hee sleeme in hoot baraa' guroo yaamuu' wa ale'. ⁴¹ Boloo' deelo'r askwasleemaro mu'k Ninawi i sihhiit dintkwa nee mu'k deeloori. Ala muk deeloori ku aslwasleemuut as tlakweemaain nee mu'k Ninawi, asma mu'k Ninawi ina hho'i' in as axweesanta' Mungu' tada Yona a alki/iit ngawa a xaasii', ala diriihe hee' ur i deer oo Yona ngu baa/. ⁴² Bo/oo' deelor askwasleemaro waawito'or basa i sihhit dinkwa nee mu'k deeloori nee ino's ngin askwasleemut asma tlakweemaain. Asma ino's amo'r saaw ngina wa tleer as sagalooar Sulemani ngiwa adaasar eer, ala dirine hee' ur' i deer oo sulemani ngu baa/. ⁴³ Neetlaangw bar hee' ngwa geema'y aqo in tla'y in harweeriirin wa baraa' yaamuu kaa haar as dir ihungu/uusi ngiwa leelehhiti ala ngi slayka'. ⁴⁴ Aluuwo ire oo' "Ani a kii/ amo'r dooee' kwada' ni daahh. Ala birna kuu/ do'da burngwa a'r ku kaahaar, slami kwa fiits nee kwa Suluguu's. ⁴⁵ In tla'y neeetlaame'r hatla' faangw ngin leehh ar ak tlakw ino's ba/a, nee tare dah tare hoot wa baraada' nee tlehhemuu' heewi in ak tlaku'y lo' wa ale kwadoo' geera ba/ati. Idoori an idooda' mukwi tlakw oo deeloori ku /iisi. ⁴⁶ Qooma'r Yesu iwa axweesi nee boo/aay aayooro's nee hhaaeewo's lagi ta afeenir wa sihhimiit tawa axweesanta' slai nee ino's. ⁴⁷ Heeko wa'k ire oo' Qaytsiit, Aayooro'k nee hhaeewok ta afeenir wa sihhiit kuung tu arta wa slaa'. ⁴⁸ Ala Yesu heeda iidig ngwa huuw ngure ba'y "Aayoor 'ee' a ma'a' nee haaee'ee' a i ma'a?" ⁴⁹ Diitsa ngie laqan amo'reeharuuseero's i ale ire oo' "ga/aaweek aayor'ee' nee hhaee'ee' em koka'." ⁵⁰ Asma umoo'qo heewo oo sla'aarur Baabooee kwadoo' gawaa' dawri nga tlee'hh an hhiyaaee' nee hho'oree' nee aayor'ee'."