¹ Yesu eeharuuseero's tada miba nee tsa'r ngawa hhe'ee's hara eyaaro ira tlay didae ire intsaahhatimisoo ay nee iidigoo ya/abto'r hho ngure alki/iit baraa' gixsaduu'in wa ale. ² Yahani ii digoo tlehhemi'ii Kristo a tseehh ngiwa axaas baraa' doo tsee gimor wa ale, eehamuuseera's ngire ya/aaw amo'r Yesu as kuwa yaahaasi gidaaba'. ³ Kuung' a kwada' xawaa laqaa hee hatla un daamaan?" ⁴ Yesu ire ilawaats ngire ba'y, "Tlawse" ti taaaande nee taa axase Yohani ti bete gidaaba'. ⁵ Tampapu i xumisiya toqooray i hi'iimiit, mu'k tiqtir tsatimit ku hhoohhoo'eemiis, mu'k xamaa' i axamiis, tu'u kiwaasla/atimiis nee leetlakuuse ka ya/abto'r hho' i alki/iit. ⁶ Hee' amohhoo a kwada insarehhmoo' koomaaka gawaa' eene'. ⁷ Eeharuuser Yohani awa tleer Yesu kangw Yohani ngure alki/iit dir boo/aydoo muk i ale ire ka'h gidaaba' "kuunga' tawa baraa' darmoo' keere mahe qaytsuu' eere' Gar taa qaytsani eere a gitsooro, tada tur'a dingitimis? Bar' gitsoorooka ala a mila? ⁸ A hee' taa tsiti'isi nar inqwaaroo hhohho' muk inqwaaroo hhohho' nga tsitatiit ala bare dir i diri'iya a baraa' maree waawita'. ⁹ Maka qaytsuu' eere ala? Ana aarusmoo arta' eeri" a lo' ani an ka'h slami ani kwada ur aarusmoo ba/a. ¹⁰ Kwi aan kwada ti ka as gooin "Ga /aaweek ani ya/abusmooee' u ya/aaw geeraawo'k wa ale oo uruuwaaro'k ngi amohhe'ee's geeraawoge. ¹¹ Ani kuunga tundu babaw baraa' mu'k /ameenaa laqwali hee' ur oo Yohanada' Baatimaamiis ngu baa/ i kaahh. Ala kwada niinaw baraa' waawuti' iimar dawriiwo kun ur ino's ba/ati. ¹² Iimir deluu' Yohanada Baatimaamiis ay hinti waawuti'iimar dawri kan i qwatliit nar /uuru nee mu'k /uum koom ngin hayohin na /uuru. ¹³ Asma aaruuse slee'meero nee haraeyar Musawo tana aariitin aya qoomar Yohani niwa ti'iit. ¹⁴ Ala kuunga bar, slaa' haratlintaa ooro ino's an Eliyada xa'w. ¹⁵ Hee' iia ngi koo'm ngi axaasi. ¹⁶ Mukuu' deloori gar ngur qoomees a mila? Gar ngir qoomees a na/aa naa iwiitii dir muu kuwa yaariir tawa morooweerimisi laqaa tawa moroo tlaxun i dida wa na/aa hatla /akaka iya. ¹⁷ Ta kaahi, "Filimbi ngewa ifaahha'n aka /atsi'iika tawa hhimaa'uusan aka /a/i'iika." ¹⁸ Asma Yohani mawa xay i /ayinaka slami i wahanaka kare oo' "kwi i neetlaamer kon." ¹⁹ Garmaa hee ninaxa'y i /ayin nee i wahani tare oo' "kwi a hheehhamusmo xufusmo mulgumoo ohomuuser koodi nee mu'k tlakuuse, ala sagalooar Mungu' idor tar lo kingina laqan nee tlehhemi'iiwo's." ²⁰ Yesu gixsaduuda a moroo xuawaslen oo yariir wa tlehhiit ngina i nanaaq as mu'k baraa' gixsaduuka hho' inika' ire oo'. ²¹ Ariyaok kiing gixsar korasini nee kiing gixsar Betsaida, Ariyarok askawasleemarhung kawa wa/akuta a saxwa asma morooda xuawaslen aa tlehharumiit dirhunge geera bar ina tlehharut baraa' Tiro nee Sidoni wa ale geera taa qaaro hho' i in nee gunayada kire tsiit tar iwiit baraa' de/ara tawa /aqamar hho'ii ing'in. ²² Tiro nee Sidoni askwasleemar'in kawa i laa ohi bo/oo deelor askwasleemaro an tsini kuunga ba/ati. ²³ Nee kiing gixsar Kapernaumu tin tsa/aasi xay ay gawaa' dawri? Aasla'ay tin /eetiis ay baraa' mu'k aa hha'n asma moroo xuawaslen aa tlehharuut diroge, geeraawo birina tlehharuut wa baraa' Sodoma nee Gomora i deer ay hinti. ²⁴ Ani gar ka'h dirhune a gidaaba' bo/oo deelor as kwasleemaro yaamuu Sodoma nee Gomora askwaslemar'in ngi ilaa i ohiya kuunga ba/ati. ²⁵ Qoomaadae Yesu ire axwee's ire oo "Ani kuung u sluufiis Baaba Aakoo dawri nee yaamu asma morowi uka laqaanduka dir mu'k dahareema koo'm nee faquraangw' ala una laqaan dir na/aa ninakw. ²⁶ Ee Baaba asma an idooda kuung kar sla'. ²⁷ Ire oo "Umoo' gaaro kinga dabaaee' i qaa's nee Baabooee' Ala hee' Barma ngu xuu' i kaahh aqo har Baaba kilo's slami hee' Baabangu xuu' kaahh aqo har Garma kilo's nee kwada Garma xu'utisaro aa slaa'. ²⁸ "Qwalaasiri amo'ee' kuunga slee'meero oo ditsookuusa nee oo taa al i loou'y nee huuwa ani kuunga' tundu hungu /uu's. ²⁹ Ingitir'ee' gawaa' sumihung i qaasaak dir ee' wa intsatsaahhaak, asma ani ti tsatsa'aar nee muunoo'ee ku gurhhoo Daqade kuunga' amohhooa a sleera baraa' munerhunge. ³⁰ Asma ingitr'ee i natsatsa' nee huuwa'ee' ki inslaahh.